Вы тут

Беларусь гатова значна павялічыць гандаль з Іркуцкай вобласцю


Аляксандр Лукашэнка абмеркаваў з губернатарам Іркуцкай вобласці Сяргеем Леўчанкам перспектыўныя напрамкі супрацоўніцтва.


«Перакананыя, што дзякуючы высокім прафесійным вашым якасцям і асабліва кіраўніцкаму досведу вы і надалей будзеце садзейнічаць нашаму ўсебаковаму супрацоўніцтву паміж вобласцю і нашай Беларуссю», — сказаў кіраўнік дзяржавы.

Прэзідэнт нагадаў, што амаль два гады прайшло з папярэдняга візіту Сяргея Леўчанкі ў Беларусь. «Трэба сказаць, што тое, пра што мы дамаўляліся, пытанні вырашаюцца, сведчаннем таму з'яўляецца павелічэнне тавараабароту вобласці і Беларусі», — падкрэсліў ён.

Іркуцкая вобласць — прамыслова развіты рэгіён, у якім сканцэнтраваны прадпрыемствы здабыўной галіны. Традыцыйна наша тэхніка, асабліва БЕЛАЗ-ы, выкарыстоўваецца ў вобласці.

Акрамя таго, кіраўнік дзяржавы выказаў надзею, што жыхары Іркуцка змаглі па вартасці ацаніць беларускія аўтобусы, якія з'явіліся на гарадскіх маршрутах. Паводле яго слоў, у гэтым ёсць вялікая патрэба, паколькі не ўсе перасоўваюцца на асабістых аўтамабілях.

Таксама дэлегацыя Іркуцкай вобласці наведае прадпрыемствы «Белкамунмаш», «Штадлер Мінск», азнаёміцца з экалагічнымі электробусамі і камфартабельнымі электрычкамі. На думку Аляксандра Лукашэнкі, свет рухаецца ў кірунку чыстай прадукцыі, у тым ліку і Расія.

«Мы вельмі разлічваем на доўгатэрміновае развіццё нашых кааперацыйных сувязяў паміж беларускімі і іркуцкімі прамысловымі прадпрыемствамі», — сказаў Прэзідэнт.

У якасці прыкладу паспяховай работы ён назваў стварэнне зборачнага завода «Магілёўліфтмаш-Усолье». Цікава, што за дзевяць месяцаў працы здадзена каля 350 ліфтаў.

Ёсць і іншыя кірункі двухбаковага супрацоўніцтва. Беларускі лідар прапанаваў ацаніць магчымасць нарыхтоўкі і перапрацоўкі дзелавой драўніны і рэалізоўваць узаемавыгадныя праекты ў гэтай сферы. Так, беларускае прадпрыемства «Амкадор» гатова аснасціць іркуцкіх лесапрамыслоўцаў сучаснымі лесанарыхтоўчымі комплексамі.

Флагман расійскага машынабудавання — Іркуцкі авіяцыйны завод — у 2019 годзе плануе пачаць серыйную вытворчасць сярэднемагістральных пасажырскіх самалётаў новага пакалення МС-21. Паводле слоў Аляксандра Лукашэнкі, Беларусь вельмі ўважліва прыглядаецца да гэтага самалёта, нашы авіятары прапанавалі іх закупляць, аднак на думку Прэзідэнта, хацелася б, маючы вопыт абслугоўвання тэхнікі савецкага перыяду, перапрафіляваць нашы прадпрыемствы і працаваць у кааперацыі з іркуцкім прадпрыемствам.

Лукашэнка дадаў, што Беларусь можа прапанаваць новыя ўзоры трактароў, корма - і збожжаўборачных камбайнаў, якія па сваіх тэхнічных характарыстыках і якасці не саступаюць замежным аналагам, а то і пераўзыходзяць іх, асабліва па кошце.

Кіраўнік дзяржавы нагадаў, што бакі ўзаемадзейнічаюць і ў сельскай гаспадарцы, асабліва ў жывёлагадоўлі, раслінаводстве, укараненні перадавых тэхналогій у вытворчасць і перапрацоўку сельгаспрадукцыі. Ён адзначыў, што беларусы ставяцца да жыхароў Іркуцкай вобласці як да блізкіх і родных людзей, таму мы заўсёды гатовыя падзяліцца ўсім тым, што мы маем. Безумоўна, беларускія аграрыі валодаюць усім неабходным.

Яшчэ ў Іркуцкай вобласці працягваецца рэалізацыя жыллёвых праграм, вядзецца праца па стварэнні новых аўтамабільных дарог і рэканструкцыі існуючых.

«Калі мы спатрэбімся ў гэтым плане вам, то, калі ласка, мы з задавальненнем прымем удзел у рэалізацыі тых ці іншых праектаў — ад праектавання да будаўніцтва пад ключ», — сказаў ён.

Прэзідэнт таксама дадаў, што тое ж датычыцца і аб'ектаў фізічнай культуры і спорту, калі будзе неабходнасць.

«У гэтым плане мы гатовы значна павялічыць паказчыкі ва ўзаемным гандлі і будзем рабіць тое, што залежыць ад нас. Паверце, за намі справа не стане, усе дамоўленасці, якія вы дасягнулі ў ходзе гэтага візіту і яшчэ дасягнеце нейкіх дамоўленасцей, яны будуць няўхільна выконвацца , — адзначыў Аляксандр Лукашэнка. — Перакананы, што ваш цяперашні візіт будзе садзейнічаць далейшаму нарошчванню нашага супрацоўніцтва».

Кіраўнік дзяржавы дадаў, што беларусы жывуць на іх землях, роўна як і расіяне — у Беларусі. «Тут вы заўсёды знойдзеце разуменне, падтрымку і дапамогу», — дадаў ён.

У адказ Сяргей Леўчанка падзякаваў за цёплы прыём і магчымасць сустрэчы. Ён распавёў аб ходзе візіту дэлегацыі, пра пасяджанне працоўнай групы і адзначыў, што ўсе дамоўленасці, якія былі прынятыя два гады таму, выкананы. Губернатар назваў Беларусь вядучым партнёрам у розных відах супрацоўніцтва.

Даведка

  • У студзені—жніўні 2018 года тавараабарот Беларусі з Іркуцкай вобласцю склаў 67,1 мільёна долараў і ў параўнанні з аналагічным перыядам 2017 года павялічыўся на 33,4 %, экспарт — 37,7 мільёна долараў і павялічыўся ў 2,2 раза, імпарт — 29,4 мільёны долараў і скараціўся на 11,3 %. Сальда станоўчае — 8,3 мільёна долараў.
  • Аснову экспарту склалі пастаўкі грузавых аўтамабіляў, фтарыдаў, фторасілікатаў, фтораалюмінатаў, шын, машын і прылад для пад'ёму, перамяшчэння, пагрузкі або разгрузкі, аўтамабіляў спецыяльнага прызначэння, ізаляваных правадоў і кабеляў.
  • Аснову імпарту склалі пастаўкі алюмініевага дроту, неапрацаванага алюмінію, ізаляваных правадоў і кабеляў, драўнянай цэлюлозы, натроннай або сульфатнай, а таксама электрычных трансфарматараў.
  • У рэгіён праз дылерскую сетку беларускіх прадпрыемстваў у Іркуцку і ​​Краснаярску ажыццяўляюцца пастаўкі тэхнікі ААТ "БелАЗ", "МАЗ", "МТЗ", "Амкадор", "Гомсельмаш".

Уладзіслаў ЛУКАШЭВІЧ

Фота БЕЛТА

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.