Вы тут

Беларускія парламентарыі наведалі Германію


На мінулым тыдні адбыўся візіт у Германію дэлегацыі рабочай групы Нацыянальнага сходу Рэспублікі Беларусь па супрацоўніцтве з парламентам ФРГ.


Фота sovrep.gov.by

Па запрашэнні германска-беларускай парламенцкай групы Бундэстага з 20 па 23 лістапада рабочая група па супрацоўніцтве з парламентам ФРГ, якую ўзначаліў яе кіраўнік, намеснік старшыні Пастаяннай камісіі Савета Рэспублікі па рэгіянальнай палітыцы і мясцовым самакіраванні Ігар Жук, наведала Германію.

У склад беларускай дэлегацыі таксама ўвайшла намеснік кіраўніка рабочай групы, старшыня Пастаяннай камісіі Палаты прадстаўнікоў па пытаннях экалогіі, прыродакарыстання і чарнобыльскай катастрофы Таццяна Кананчук. Адзначым, што гэта першы візіт беларускай парламенцкай дэлегацыі за апошнія гады. У рамках яго беларускія парламентарыі сустрэліся з віцэ-прэзідэнтам Бундэстага ФРГ Петрай Пау. Адбыўся зацікаўлены абмен меркаваннямі па шырокім спектры пытанняў двухбаковага супрацоўніцтва і магчымых фарматах далейшага міжпарламенцкага ўзаемадзеяння з членамі германска-беларускай парламенцкай групы.

Між іншым, падчас візіту ў цэнтры ўвагі беларускай парламенцкай дэлегацыі знаходзіліся і іншыя тэмы. Напрыклад, пытанні супрацоўніцтва ў сферах сельскай гаспадаркі, аховы навакольнага асяроддзя і ўстойлівага развіцця абмяркоўваліся на сустрэчах з кіраўніцтвам і членамі камітэтаў Бундэстага па сельскай гаспадарцы і харчаванні, а таксама па навакольным асяроддзі, ахове прыроды і бяспецы ядзерных рэактараў.

Члены беларускай парламенцкай дэлегацыі правялі таксама сустрэчы ў Бундэсраце, ведамстве федэральнага канцлера і Федэральным міністэрстве замежных спраў ФРГ. З парламенцкім дзяржсакратаром Федэральнага міністэрства ўнутраных спраў Штэфанам Маерам дэталёва абмеркавалі пытанні процідзеяння тэрарызму і нелегальнай міграцыі.

Як паведаміў Ігар Жук, і ў Бундэстагу, і ў Бундэсраце, міністэрстве замежных спраў, на іншых сустрэчах цёпла ставіліся да беларускай дэлегацыі і адзначалі істотную ролю ў міжнароднай палітыцы, якую сёння адыгрывае Беларусь. Мінск, які стаў міратворчай пляцоўкай для ўрэгулявання канфлікту на Украіне, дзе прайшла Мюнхенская канфэрэнцыя па бяспецы, безумоўна, прыцягвае ўвагу міжнароднай грамадскасці.

— На ўсіх сустрэчах адначалася, што Беларусь праводзіць дружалюбную палітыку, не вылучаючы кагосьці асобна. Безумоўна, у нас ёсць стратэгічны партнёр — Расія, аднак наша шматвектарная палітыка, накіраваная на развіццё гандлёвых, эканамічных, культурных, гуманітарных адносін з краінамі Еўрасаюза, у тым ліку Германіяй, не застаецца па-за ўвагай, — адзначыў суразмоўнік.

Што датычыцца міжпарламенцкіх адносін, па словах Ігара Жука, парламентарыі Германіі зацікаўленыя ў наладжванні стабільных кантактаў з беларускімі калегамі. Са свайго боку, старшыня рабочай групы па супрацоўніцтве з парламентам ФРГ запрасіў нямецкіх парламентарыяў бліжэй пазнаёміцца з вопытам работы органаў мясцовага самакіравання ў Беларусі.

У рамках візіту беларуская парламенцкая дэлегацыя таксама наведала федэральную зямлю Цюрынгія, дзе прайшлі перагаворы з кіраўніком па старшынстве Цюрынгскага ландтага Эльке Хольцапфель і азнаямленне з сістэмай абарачэння тары ў Германіі.

Падчас сустрэчы была дасягнута папярэдняя дамоўленасць аб заключэнні дагавора аб супрацоўніцтве паміж Гродзенскім абласным Саветам дэпутатаў і лангдатам Цюрынгіі.

Вольга АНУФРЫЕВА

Загаловак у газеце: Зацікаўленасць з абодвух бакоў

Выбар рэдакцыі

Грамадства

Першая зімоўка на Паўднёвым полюсе можа адбыцца ў 2020 годзе

Першая зімоўка на Паўднёвым полюсе можа адбыцца ў 2020 годзе

«Знаходжанне беларускіх палярнікаў у Антарктыдзе — гэта не вандроўка натуралістаў і не туры для экстрэмалаў, а сур'ёзная і карпатлівая штод

Спорт

Апублікаваны даведнік «Мінск» — карысны для турыстаў і падарожнікаў

Апублікаваны даведнік «Мінск» — карысны для турыстаў і падарожнікаў

Ён быў падрыхтаваны адмыслова напярэдадні II Еўрапейскіх гульняў.

Грамадства

У Полацку ўпершыню знойдзена пахаванне князя

У Полацку ўпершыню знойдзена пахаванне князя

Сярод знаходак — нямала сенсацый.

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.