Вы тут

Ці дасць беларускі ракфор фору французскаму?


Асноўны рухавік экспарту ў сегменце малочнай прадукцыі сёлета — сыры. Пра гэта паведаміў начальнік галоўнага ўпраўлення знешнеэканамічнай дзейнасці Міністэрства сельскай гаспадаркі і харчавання Аляксей БАГДАНАЎ падчас прэс-канферэнцыі ў Нацыянальным прэс-цэнтры.


Фота БелТА.

У першым паўгоддзі аграрная галіна Беларусі ў экспартным кірунку спрацавала з плюсам. Па словах Аляксея Багданава, продаж сельгаспрадукцыі і прадуктаў харчавання за мяжу склаў з пачатку года 101,6 працэнта, ці 2 557 мільёнаў долараў. Беларусь гандлявала з 88 краінамі — дарэчы, пяць дадаліся летась.

Начальнік упраўлення падкрэсліў, што ў міністэрстве ўвесь час працуюць над дыверсіфікацыяй і пашырэннем геаграфіі экспарту. Сёлета аграрыі здолелі асвоіць дванаццаць новых рынкаў, у тым ліку Афганістана, Пакістана, Тайланда, Кеніі, Лівіі, Маўрытаніі, Албаніі, Босніі і Герцагавіны, Аргенціны.

«Стратэгія апошніх гадоў — максімальна скараціць вытворчасць сыравінных тавараў кшталту сухога малака і павялічыць аб'ёмы вырабу гатовай прадукцыі, якая непасрэдна трапляе на паліцу крамы. Пакупнік бачыць, што сыр, ёгурт, смятана, масла — беларускія. Ствараецца пазнавальнасць брэнда, выхоўваецца лаяльнасць да нашага тавару», — растлумачыў Аляксей Багданаў. Ён адзначыў і рост на 8,4 % экспарту гатовых мясных вырабаў.

Аднак у адным з найбуйнейшых сегментаў экспарту — мясным — адзначаецца спад. У першую чаргу гэта тлумачыцца абмежаваннямі на пастаўку мяса на костцы ў Расію. Таму таварныя групы пераразмеркаваныя, для кампенсацыі аграрыі адкрываюць новыя рынкі. Напрыклад, ужо да канца года айчынная ялавічына можа быць пастаўлена ў Турцыю.

Зроблена ў Беларусі, прададзена ў СНД

Пастаўкі ў Расію крыху скараціліся, але па-ранейшаму ўсходняя суседка купляе 80 працэнтаў прадуктаў харчавання, вырабленых беларускімі аграрыямі. У міністэрстве палітыка наступная: калі пастаўкі па адной пазіцыі скарачаюцца, па іншай — аб'ёмы нарошчваюцца. Такім чынам, аб'ём экспарту свініны ў Расію ўзрос у тры разы ў параўнанні з мінулым годам, павялічыўся продаж мяса птушкі, а малочнай прадукцыі амаль дасягнуў мільярда долараў — у асноўным за кошт масла. Добра купляюць у Расіі нашу бульбу, ільновалакно, жэлацін, рапсавы алей.

А ялавічыну на костцы, пастаўкі якой у Расію абмежаваныя, накіравалі ў іншыя краіны СНД і прадалі ў два разы больш, чым летась. Экспарт мясапрадуктаў у Садружнасць склаў 147 працэнтаў ад узроўню аналагічнага паказчыка мінулага года. Павялічыліся і пастаўкі гатовых мясных вырабаў нароўні з малочнай прадукцыяй.

Экспарт беларускіх сыроў вырас на 29 працэнтаў ад леташняга ўзроўню аналагічнага перыяду мінулага года. «У гэтым сегменце ёсць пэўны поспех. Рэч у тым, што сыры — тавар, які не так проста прадаць. Бо ў кожнай краіне ёсць свае смакавыя перавагі. Сыроў больш за трыста відаў. А на рынку Расіі, СНД у нас склаліся даўнія аднолькавыя смакавыя перавагі, яшчэ з часоў Савецкага Саюза. Мы іх ведаем, умеем з імі працаваць, і дынаміка сведчыць аб правільнасці абранай стратэгіі», — падкрэсліў Аляксей Багданаў.

У Кітай — па чыгунцы і морам

Найбольш цікавым і перспектыўным для экспарту сельскагаспадарчай і харчовай прадукцыі начальнік упраўлення назваў рынак Кітая. З канца мінулага года ў Паднябесную адпраўлена восем поўнакантэйнерных цягнікоў з малочнай прадукцыяй. Прапрацоўваецца пытанне арганізацыі паставак ялавічыны і мяса птушкі па маршруце «шаўковага шляху». На гэты момант экспартныя пастаўкі мяса ў Кітай ужо ўзраслі ў 38 разоў. Павялічыліся таксама пастаўкі шакаладу і іншых харчовых прадуктаў, звязаных з шакаладам, вод.

Аляксей Багданаў паведаміў, што для паставак у Кітай выкарыстоўваюцца два лагістычныя шляхі: марскі і чыгуначны. У цягнік уваходзіць 41 кантэйнер — 1 025 тон прадукцыі.

На рынках дальняга замежжа сёлета больш за ўсё павялічыўся экспарт беларускага мяса — у чатыры разы. Узраслі пастаўкі сыру, бульбы, агародніны, грыбоў, ільновалакна. Экспарт у краіны Еўрапейскага Саюза вырас на 22 працэнты. На першым месцы па аб'ёме паставак з Беларусі — Літва, у лідарах таксама Польшча і Германія.

Варвара МАРОЗАВА

Загаловак у газеце: Дзіркі ў сыры — прыбытак у экспарце

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.