Вы тут

У Беларусі пачынаецца навагодняя акцыя «Нашы дзеці»


Сёлета рэспубліканская дабрачынная акцыя «Нашы дзеці» стартуе ў адзін дзень, 9 снежня, адначасова ва ўсіх рэгіёнах краіны. Ужо 24-ы раз у розныя сацыяльныя ўстановы Беларусі ўсе нераўнадушныя павязуць віншаванні і падарункі. У сталіцы акцыя пачнецца ў 16 гадзін у Нацыянальным цэнтры мастацкай творчасці дзяцей і моладзі.


Цырк, «Папялушка» і «Калядная зорка»

Адным з самых значных мерапрыемстваў акцыі стане галоўная ёлка краіны ў Палацы рэспублікі, на якую з'едуцца 2370 малых з усёй краіны. Гэта і пераможцы алімпіяд, конкурсаў, і турніраў розных узроўняў, і сіроты, інваліды, бежанцы, і дзеці ваеннаслужачых, якія загінулі падчас выканання сваіх абавязкаў.

— На жаль, запрасіць усіх дзетак, якія заслугоўваюць прысутнічаць на галоўнай ёлцы, мы не можам. Толькі па 100 малых прыедзе з абласцей краіны, 300 з Мінскай вобласці і 1570 — са сталіцы, — заўважыла Ларыса ЕМЯЛЬЯНЧЫК, кансультант упраўлення сацыяльнай, выхаваўчай і ідэалагічнай работы Міністэрства адукацыі. — Усе яны атрымаюць падарункі і ўбачаць спектакль, а 500 дзетак трапяць яшчэ і ў цырк.

Два навагоднія святы для дзетак з малазабяспечаных і няпоўных сем'яў пройдуць і ў Палацы Незалежнасці, што стала традыцыяй цягам апошніх гадоў. Распачне дабрачынны марафон «Нашы дзеці» ў сталіцы Нацыянальны цэнтр мастацкай творчасці дзяцей і моладзі. 9 снежня тут адкрыецца рэспубліканская выстаўка дэкаратыўна-прыкладной творчасці «Калядная зорка».

— Дзеці ўбачаць на выстаўцы мноства цікавых і прыгожых вырабаў. Да малых прыйдуць Дзед Мароз і Снягурка. Дзетак чакаюць таксама танцы, песні, спектакль, — расказала Надзея КОРШУНАВА, кіраўнік Нацыянальнага цэнтра мастацкай творчасці дзяцей і моладзі. — А на майстар-класе яны ўласнымі рукамі зробяць сабе ў падарунак прыгожую адкрытку.

Цукеркі, падарункі ад Дзеда Мароза і лыжы

Штогод да акцыі далучаюцца не толькі прадстаўнікі дзяржорганаў і прадпрыемстваў, але і грамадскія, прыватныя арганізацыі, а таксама звычайныя грамадзяне. Апошнія могуць звярнуцца ва ўстановы адукацыі і органы ўлады, каб даведацца, чым і каму яны могуць дапамагчы.

Дзеці атрымліваюць не толькі салодкія падарункі, але і тэхніку для ўстаноў, дзе яны жывуць. Апошнія гады дораць шмат спартыўнага інвентару, у прыватнасці лыжы.

— Малыя таксама пішуць лісты Дзеду Марозу, і ў некаторых установах адукацыі краіны падарункі падбіраюць згодна з жаданнямі дзяцей. Усім сацыяльным установам мы таксама заўжды раім улічваць пажаданні і надзённыя патрэбы малых. Аднак на індывідуальныя падарункі найбольш арыентаваны грамадскія арганізацыі, індывідуальныя прадпрымальнікі і прыватныя структуры, — кажа Ларыса Емяльянчык.

У першую чаргу падчас акцыі стараюцца паклапаціцца пра дзяцей, якія апынуліся ў цяжкай жыццёвай сітуацыі: сірот, дзяцей, якія жывуць у інтэрнатах, апякунскіх, прыёмных, шматдзетных сем'ях, дзіцячых дамах сямейнага тыпу, малых, якія ў перадсвяточныя дні трапілі ў бальніцы.

Летась на падарункі і матэрыяльную дапамогу патрацілі больш за 1,5 мільёна рублёў. У дабрачынны праект за гады яго правядзення ўцягнута больш за 238 тысяч дзяцей. У краіне звыш 130 сацыяльных устаноў, наведвальнікаў і жыхароў якіх віншуюць з Новым годам.

— Сярод нас існуе ўжо нават пэўная канкурэнцыя за той ці іншы сацыяльна значны для наведвання аб'ект. Сёлета выказала жаданне далучыцца да акцыі амаль 100 арганізацый, прадстаўнікоў органаў дзяржкіравання. У многіх з пэўнымі ўстановамі ўжо склаліся шматгадовыя сяброўскія адносіны, — дадала прадстаўніца міністэрства. 

Ірына СІДАРОК

Фота БЕЛТА

Загаловак у газеце: Калі здзяйсняюцца мары...

Выбар рэдакцыі

Культура

Што з нашага парадку дня трапляе ў «афіцыйнае» дакументальнае кіно

Што з нашага парадку дня трапляе ў «афіцыйнае» дакументальнае кіно

Свавольныя традыцыі, постчарнобыльскі рай і камп'ютарныя курсы для пенсіянераў.

Эканоміка

Як наладзіць бізнес у невялікім райцэнтры, дзе няма чыгункі

Як наладзіць бізнес у невялікім райцэнтры, дзе няма чыгункі

Уздзенскі касцёл, які пабудавалі ў канцы ХVІІІ стагоддзя, мясцовыя ўлады не адзін раз спрабавалі прадаць праз электронны аўкцыён, але ахвотных аднавіць помнік архітэктуры не знаходзілася. 

Спорт

«Дзясятае месца — гэта наша памылка». Беларускія гандбалісты не выйшлі ў алімпійскі кваліфікацыйны турнір

«Дзясятае месца — гэта наша памылка». Беларускія гандбалісты не выйшлі ў алімпійскі кваліфікацыйны турнір

У заключным матчы ЧЕ па гандболе зборная Беларусі згуляла ўнічыю з камандай Аўстрыі — 36:36