Вы тут

Узаемадзеянне Беларусі з КНР развіваецца цягам амаль трох дзесяцігоддзяў


Эканамічны эфект супрацоўніцтва з Паднябеснай відавочны. Актыўна пашыраецца яно ў сацыяльнай сферы, у прыватнасці, у сістэме адукацыі. Адзін з яскравых прыкладаў — кітайскі вектар найбуйнейшага адукацыйнага, навукова-вытворчага цэнтра нашай краіны — Беларускага дзяржаўнага ўніверсітэта. 2019, які, дарэчы, быў абвешчаны Годам адукацыі Беларусі ў Кітаі, у плане рэалізаваных магчымасцяў шмат у чым стаў знакавым для БДУ. Якія ж адукацыйныя трэнды набылі ўвасабленне?


Рэктар БДУ Андрэй Кароль і дырэктар падрыхтоўчага цэнтра ўніверсітэта ў Санья Чжан Лэй падчас адкрыцця кабінета беларускай мовы і культуры імя Янкі Купалы.

Крэатыў ад сумеснага інстытута

У БДУ атрымліваюць адукацыю, якая адпавядае ўсім сучасным стандартам, звыш 3,7 тысячы замежнікаў з больш чым 60 краін. Сярод іх — Аўстралія, ЗША, Канада, Германія, Японія, Вялікабрытанія, Францыя, Швейцарыя, Турцыя, Шры-Ланка, Сірыя, Лівія, Кот-д'Івуар, Эквадор, Тога. Пералічваць, вядома, можна яшчэ доўга. Канешне ж, навучаюцца ў БДУ і грамадзяне дзяржаў постсавецкай прасторы. Найбольш прадстаўнічая «дэлегацыя» — 1889 чалавек, — навучэнцы з Паднябеснай. 365 кітайцаў займаюцца ў магістратуры, 89 — у аспірантуры. Найбольш запатрабаваныя эканамічны і філалагічны факультэты, а таксама факультэты журналістыкі і міжнародных адносін.

З 2007-га БДУ развівае плённае супрацоўніцтва з Далянскім політэхнічным універсітэтам (ДПУ). Як паведаміў начальнік упраўлення міжнародных сувязяў БДУ Аляксандр Жук, тры гады таму была адкрыта першая ў нацыянальнай сістэме беларуска-кітайская ВНУ — сумесны інстытут ДПУ-БДУ. Летась у яго паступілі 78 студэнтаў. З іх 40 — на спецыяльнасць «Інжынерная механіка», 38 — «прыкладная фізіка». Усяго ў сумесным інстытуце цяпер навучаюцца 244 студэнты. У яго склад уваходзяць тры факультэты — прыкладной фізікі, інжынернай механікі, а таксама матэматыкі і прыкладной матэматыкі. Адметна, што навучанне з удзелам выкладчыкаў БДУ вядзецца на англійскай мове.

З 1 верасня бягучага года на базе БДУ пачаў работу сумесны беларуска-кітайскі інстытут БДУ-ДПУ (СІБД). Гэта першы вопыт у айчыннай сістэме вышэйшай адукацыі ў галіне сумеснай падрыхтоўкі спецыялістаў першай ступені на базе беларускай ВНУ. Выпускнікі інстытута будуць запатрабаваныя прамысловымі, адукацыйна-навуковымі прадпрыемствамі Беларусі і Кітая, а таксама ў індустрыяльным парку «Вялікі камень».

Падрыхтоўка тут вядзецца па такіх спецыяльнасцях, як «сусветная эканоміка», «фізіка (вытворчая дзейнасць)», «механіка і матэматычнае мадэляванне». У далейшым мяркуецца павялічыць пералік спецыяльнасцяў, а таксама адкрыць падрыхтоўку ў магістратуру. Цяпер на першым курсе навучаецца больш паўсотні студэнтаў. Сёлета набор плануецца павялічыць.

Усе навучальныя планы і праграмы навучальных дысцыплін распрацоўваюцца і зацвярджаюцца пры ўдзеле двух бакоў і актуалізуюцца ў адпаведнасці з апошнімі дасягненнямі навукі, тэхнікі і прамысловасці краін — удзельніц адукацыйнага праекта. Выпускнікі сумеснага беларуска-кітайскага інстытута атрымаюць два дыпломы — БДУ і ДПУ. У прафесарска-выкладчыцкі склад СІБД увойдуць прадстаўнікі беларускага і кітайскага ўніверсітэтаў. Летась у студзені паміж двума ўніверсітэтамі падпісана пагадненне аб стварэнні навукова-інавацыйнага цэнтра. Ён быў адкрыты ўжо ў чэрвені 2019-га. Мяркуецца, што ў гэтым цэнтры з выкарыстаннем сучаснага навукова-лабараторнага абсталявання будуць праходзіць практыку і студэнты Беларускага дзяржаўнага ўніверсітэта.

Таксама супрацоўніцтва БДУ—ДПУ прадугледжвае правядзенне шэрагу сумесных мерапрыемстваў. У прыватнасці, у студзені мінулага года на базе Беларускага дзяржаўнага ўніверсітэта была арганізавана грунтоўная Зімовая школа. Для студэнтаў з Кітая былі зладжаны лекцыі па праблемах сучаснай фізікі, матэматыкі, механікі. У навуковых і вучэбных лабараторыях факультэтаў БДУ прайшлі творчыя заняткі па спецыяльнасцях «фізіка (вытворчая дзейнасць)», а таксама «механіка і матэматычнае мадэляванне». А ў чэрвені 2019-га на базе Далянскага політэхнічнага ўніверсітэта была арганізавана Летняя школа. Яе слухачамі сталі 20 студэнтаў механіка-матэматычнага і фізічнага факультэтаў БДУ. Праграма школы ўключала вывучэнне сучасных праблем прыкладной фізікі і механікі, заняткі прайшлі ў даследчай лабараторыі ДПУ.

Цяпер узаемадзеянне БДУ з універсітэтамі і навуковымі інстытутамі Кітая ладзіцца ў межах 77 двухбаковых дакументаў (мемарандумаў, пагадненняў, праграм супрацоўніцтва). Напрыклад, партнёрамі, апроч ужо згаданых, з'яўляюцца Пекінскі, Хэнанскі, Фашанскі, Усходне-Кітайскі педагагічны ўніверсітэты, Шанхайскі ўніверсітэт транспарту, а таксама Харбінскі ўніверсітэт навукі і тэхналогій, Кітайскі ўніверсітэт міжнародных адносін і шэраг іншых. Летась падпісана 12 двухбаковых дакументаў з установамі адукацыі КНР. Асобныя былі накіраваны на пашырэнне партнёрскіх адносін. Сярод іх — пагадненне аб абмене навучэнцамі з Далянскім політэхнічным універсітэтам. Летась БДУ пашырыў кола сваіх партнёраў у Кітаі. Асобна тут варта адзначыць падпісанне мемарандума аб узаемаразуменні з Пекінскім універсітэтам — адной з вядучых ВНУ Паднябеснай.

Начальнік упраўлення міжнародных сувязяў БДУ Аляксандр Жук і кіраўнік інфармацыйна-адукацыйнага цэнтра ўніверсітэта ў Кітаі Ван Яацян абмяркоўваюць перспектывы супрацоўніцтва.

Рызыкнуць і выйграць

Насамрэч, крэатыўным і іміджавым для Белдзяржуніверсітэта стаў праект, у межах якога ў канцы 2017 года ў Пекіне быў адкрыты інфармацыйна-адукацыйны цэнтр БДУ. Яго кіраўніком і каардынатарам стаў Ван Яацян. Ён, дарэчы, выпускнік БДУ, у Мінску абараніў кандыдацкую па эканамічным профілі і вырашыў не губляць сувязі з альма-матэр, а, наадварот, паглыбляць узаемадзеянне. «Было вялікае жаданне расказаць пра Беларусь, яе адукацыйныя магчымасці, — кажа Ван Яацян. — Дагэтуль кітайцы добра ведалі пра магчымасць атрымаць адукацыю ў Еўропе, Расіі, ЗША. Пра той жа БДУ было зусім няшмат інфармацыі.
А між тым універсітэт знаходзіцца на высокіх пазіцыях у сусветным рэйтынгу. Якасць адукацыі тут адпавядае міжнародным стандартам, я ў гэтым асабіста пераканаўся».

Для БДУ арганізацыя цэнтра ў Паднябеснай — смелы эксперымент, у якім была немалая доля рызыкі. Аднак такі інавацыйны падыход да рэкрутынгу студэнтаў сябе апраўдаў. Пра гэта сёння можна казаць з упэўненасцю. «Ужо менш чым праз год пасля адкрыцця базавага «пункта» ў кітайскай сталіцы — у верасні 2018-га — была набрана першая група навучэнцаў. Падрыхтоўчы цэнтр БДУ з'явіўся ў вядомым горадзе Санья, што на востраве Хайнань, — адзначае Аляксандр Жук. — Ён быў створаны з мэтай моўнай падрыхтоўкі кітайскіх абітурыентаў, якія плануюць паступленне ў БДУ. Першая група — 60 чалавек — з верасня прыступіла да навучання на журфаку».

Сёння ў падрыхтоўчым цэнтры ў Санья навучаецца ўжо 140 слухачоў па вучэбных праграмах беларускага ВНУ. Ужо ў пачатку сакавіка гэтая група прыедзе ў Мінск і працягне навучанне ў БДУ. Адбор у цэнтры адбываецца на конкурснай аснове з удзелам прадстаўнікоў 17 школ, трох універсітэтаў 12 правінцый Кітая. Уся інфраструктура ў Санья нагадвае пра беларускія рэаліі. Вучэбныя кабінеты маюць назвы станцый метро Мінска, сцены ўпрыгожаны фатаграфіямі, калажамі і карцінамі з выявамі беларускіх асветнікаў, славутых турыстычных месцаў і рэгіёнаў. Кітайскім слухачам даступны фонд фільмаў, прэзентацый, твораў беларускіх пісьменнікаў, перыёдыкі, спіс якіх рэгулярна будзе папаўняцца пры падтрымцы БДУ. Адным з важных кірункаў работы цэнтра з'яўляецца сацыякультурная адаптацыя замежных грамадзян перад іх навучаннем у нашай краіне. Гэтая ўстанова праз адукацыйную дзейнасць актыўна садзейнічае распаўсюджванню
інфармацыі пра Беларусь у Кітаі.

Летась у лістападзе адбылася знакавая падзея — у падрыхтоўчым цэнтры БДУ з'явіўся кабінет беларускай мовы і культуры імя Янкі Купалы. Урачыстая цырымонія адкрыцця імянной аўдыторыі Песняра прайшла пры ўдзеле дэлегацыі беларускай ВНУ на чале з рэктарам Андрэем Каралём, дырэктара падрыхтоўчага цэнтра Чжан Лэя, слухачоў і выкладчыкаў. Адбылося тэатралізаванае прадстаўленне кітайскіх навучэнцаў, якія падрыхтавалі музычна-танцавальныя нумары, вершы і песні на беларускай, рускай і кітайскай мовах. Цяпер слухачы падрыхтоўчага цэнтра маюць цудоўную магчымасць папрацаваць з арыгінальнымі матэрыяламі па лінгвістыцы, гісторыі, мастацтве і краіназнаўстве Беларусі. Плануецца, што тут будуць арганізоўвацца адукацыйна-культурныя мерапрыемствы профільнай тэматыкі.

А яшчэ ў планах — пашырэнне сеткі падрыхтоўчых цэнтраў БДУ ў Паднябеснай Сёлета, як мяркуецца, адпаведныя ўстановы будуць адкрыты ва Ухані, а таксама ў кітайскай сталіцы. Так што інавацыі пашыраюцца.

Даслоўна

Рэктар БДУ Андрэй Кароль:

З упэўненасцю адзначу, БДУ сёння — лідар беларуска-кітайскага супрацоўніцтва па шэрагу перспектыўных кірункаў. Галіна адукацыі тут не выключэнне. Сёння кожны трэці кітайскі студэнт, які навучаецца ў беларускіх ВНУ, — вучыцца ў БДУ. Наш Рэспубліканскі інстытут кітаязнаўства імя Канфуцыя стаў першым Узорным інстытутам Канфуцыя сярод інстытутаў кітаязнаўства краін СНД і адзіным, які атрымаў права за межамі Кітая праводзіць міжнародны кваліфікацыйны экзамен для перакладчыкаў CATTІ.

Больш за 12 працэнтаў ад агульнай колькасці ўсіх міжнародных пагадненняў у галіне адукацыі і навукі ў нас заключана з кітайскімі ўстановамі. Штогод адзначаецца павелічэнне колькасці слухачоў факультэта даўніверсітэцкай адукацыі БДУ з ліку кітайскіх грамадзян. Гэтаму спрыяе створаная інфраструктура экспарту адукацыйных паслуг. Калі ў 2017/2018 навучальным годзе мы налічвалі на падрыхтоўчым аддзяленні ФДА 287 чалавек, то цяпер іх ужо 596, з якіх — 580 з КНР. А гэта патэнцыйныя студэнты БДУ і значныя інвестыцыі ў нашу краіну.

Новыя перспектывы з Кітаем бачацца ў пашырэнні спектру сумеснай падрыхтоўкі спецыялістаў і развіцці культурных сувязяў. У найбліжэйшы час прапануем кітайскім калегам праграмы павышэння кваліфікацыі для работнікаў сістэмы адукацыі ў галіне крэатыўнага і эўрыстычнага навучання. Эўрыстычныя тэхналогіі дазваляюць навучэнцам паглядзець на сябе з боку, адкрыць сябе і свае магчымасці, праверыць межы свайго няведання. Таму сёння такое навучанне вельмі запатрабаванае ў свеце. Новыя адукацыйныя падыходы накіраваны не на ўзнаўленне і засваенне ўсіх дасягненняў чалавецтва, а на стварэнне студэнтам свайго прадукту, адрознага ад таго, што зрабіў яго аднагрупнік; цяпер вучаць задаваць пытанні, а не даваць аднолькавыя адказы. Гэтыя інавацыі мы актыўна выкарыстоўваем у БДУ для павышэння якасці адукацыі.

Наш вопыт у гэтым кірунку зацікавіў кітайскіх калег падчас візіту ў падрыхтоўчы цэнтр у Санья. Ужо ёсць дамоўленасць, што першымі слухачамі праграмы павышэння кваліфікацыі стануць нашы калегі з навучальных устаноў гэтага горада. Кабінет беларускай мовы і культуры імя Янкі Купалы, які працуе ў цэнтры, — адметны культурна-адукацыйны цэнтр Беларусі ў КНР. Ён спрыяе папулярызацыі беларускай гісторыі, літаратуры, нашых нацыянальных традыцый, асаблівасцяў, славутасцяў сярод кітайскіх грамадзян. Упэўнены, такія структуры маюць добрую будучыню. Кітайскія слухачы разам з падрыхтоўкай да паступлення ў БДУ адчуваюць сацыякультурную атмасферу Беларусі. Пашырэнне ведаў пра нашу краіну цягне за сабой прырост замежных грамадзян, умацоўвае дзяржаўны імідж за мяжой. Дарэчы, па выніках візіту ў Санья набор кітайскіх слухачоў для падрыхтоўкі да паступлення ў БДУ павялічаны да 500 чалавек. Перакананы, што і гэта не максімум.

Мікалай ЛІТВІНАЎ

Фота Яўгена ПЯСЕЦКАГА і з архіва БДУ

Загаловак у газеце: Купала крочыць па Паднябеснай

Выбар рэдакцыі

Грамадства

Гродзенскі заапарк без страт выходзіць з зімоўкі і рыхтуецца да новага сезона

Гродзенскі заапарк без страт выходзіць з зімоўкі і рыхтуецца да новага сезона

Літаральна нядаўна з'явіўся і першы ў гэтым годзе прыплод.

Грамадства

Анёл па імені Алена. Як прадпрымальніца стала сацработнікам

Анёл па імені Алена. Як прадпрымальніца стала сацработнікам

Сацыяльны работнік тэрытарыяльнага цэнтра сацыяльнай абароны насельніцтва Маскоўскага раёна Мінска Алена Сцепаненка працуе на сваім месцы каля двух гадоў.

Эканоміка

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Сідаравічы — невялікі аграгарадок паміж Магілёвам і Быхавам. Менавіта тут знаходзіцца вядомая ў Магілёўскім раёне фермерская гаспадарка Сяргея Куцанава.