Вы тут

У Магілёўскім раёне жыхары наводзяць прыгажосць у сваіх населеных пунктах


Гаворка ідзе пра Семукацкі сельсавет, у складзе якога 29 населеных пунктаў з агульнай колькасцю 949 жыхароў. Паміж вёскамі няма рэгулярных транспартных зносін, але гэта не перашкаджае людзям быць у курсе спраў суседзяў. Старасты і актывісты з'яўляюцца злучальным звяном паміж насельніцтвам і органамі мясцовага кіравання і самакіравання, ствараюць умовы для развіцця грамадскай ініцыятывы і прыцягваюць аднавяскоўцаў да вырашэння праблем мясцовага значэння.


Напрыклад, у вёсцы Вялікія Бялевічы з дапамогай грамадскасці добраўпарадкавана паркавая зона: зроблены альтанкі, лаўкі і нават дзіцячая пляцоўка. Будаўніцтва апошняй ініцыявалі шматдзетныя маці. Вольга Курдыль, якая выхоўвае пяцярых дзяцей, стала адным з актыўных натхняльнікаў і рэалізатараў ідэі. У вёсцы болей за 50 дзяцей, але тут амаль няма сацыяльных аб'ектаў. І дзіцячая пляцоўка была проста неабходная. Да ініцыятыўных бацькоў далучыўся мясцовы фермер Уладзімір Укружскі, які на сваёй пілараме зрабіў усе неабходныя нарыхтоўкі за ўласны кошт.

У аграгарадку Семукачы праблем з пітной вадой няма, жыхары карыстаюцца цэнтралізаваным водазабеспячэннем. Але стала шкада, што прападае калодзеж. Ён быў выкапаны дзесяць гадоў таму і стаяў закінуты. Мясцовы жыхар Рыгор Венгерэнка ўзяўся за арганізацыю работ па яго аднаўленні. У выніку натхнёныя ім актывісты зрабілі агаловак (наземную частку калодзежа), пафарбавалі яго і купілі вядро.

А ў Паўлаўску вярнулі да жыцця дзве крыніцы. Кажуць, што адной з іх было сто гадоў, не меней. Зруб унутры яе ўжо згніў, таму актывісты зрабілі новы. А другую крынічку ледзь знайшлі. Старажылы ўзгадалі, што ёй карысталіся яшчэ іх продкі. Яе пачысцілі і акультурылі з удзелам усё таго ж фермера Уладзіміра Укружскага. Цяпер сюды па ваду ездзіць палова сельсавета.

Вялікая работа зроблена па добраўпарадкаванні могілак. Вёска Алень сёння амаль выміраючая, а раней была досыць вялікай. Нават працягласць яе каля пяці кіламетраў. Цяпер тут у асноўным жывуць дачнікі. Вясковыя могілкі былі ў вельмі непрывабным стане, і жыхароў гэта непакоіла. Старшыня сельсавета прапанавала зрабіць капітальную прыборку. Мясцовыя арганізацыі дапамаглі выразаць аварыйныя дрэвы і хмызняк. Адкрыццём стала, што на самых старых могілках стаялі валуны. На іх не засталося ніякіх апазнавальных знакаў, але старажылы сцвярджаюць, што гэта былі своеасаблівыя помнікі. Людзі з дапамогай тэхнікі перанеслі іх на ўскраек могілак, устанавілі там крыж і такім чынам утварыўся агульны памятны знак у гонар продкаў. Цяпер да яго прыносяць кветкі.

А на могілках у Вялікіх Бялевічах жыхары аднавілі нават помнік XIX стагоддзя. Ён ляжаў у хмызняку і быў напалову пашкоджаны вандаламі. Высветлілася, што яго ўсталявалі на пахаванні тутэйшага пана Пятра Гайдукова. Дарэчы, на помніку пазначана, што ён быў зроблены ў маскоўскай майстэрні. Яго паднялі, пачысцілі і замацавалі. А мясцовы жыхар на свае грошы паставіў металічную агароджу.

— Асабліва вызначыліся ў навядзенні парадку стараста Таццяна Сімакова і Тамара Бельская, — кажа Тамара Укружская, старшыня Семукацкага сельвыканкама. — І такіх, як яны, ініцыятыўных, у нас шмат. Два гады таму, калі я ўзначаліла сельсавет, адразу ж патлумачыла людзям, што якасць нашага жыцця шмат у чым залежыць ад нас саміх. Разам мы прыдумалі праект «Вяртанне да вытокаў» і пад яго эгідай сталі наводзіць парадак у вёсках. Спачатку людзі неахвотна здавалі грошы, але, калі ўбачылі, што эфект ёсць, сталі самі прапаноўваць ідэі для рэалізацыі. За гэты час агульнымі намаганнямі зроблена шмат. Галоўнае — шчырае жаданне саміх жыхароў. Мы праводзілі сельскія сходы, выяўлялі праблемы, выслухоўвалі прапановы грамадзян, шукалі шляхі вырашэння праблем. У выніку за сродкі грамадзян і з іх удзелам агароджаныя і пафарбаваныя сем грамадзянскіх могілак, чатыры з якіх прыводзіліся ў парадак упершыню. Насельніцтва за свой кошт адрамантавала 24 агалоўкі на шахтавых калодзежах, добраўпарадкавала крыніцу. Праведзеныя за грошы жыхароў і з іх удзелам работы ацэньваюцца ў пяць тысяч рублёў. Вядома, што без дапамогі з боку камунальных, сельскагаспадарчых і лясных службаў было б немагчыма зрабіць такі фронт работ. Не засталіся ўбаку сацыяльныя службы і Семукацкая сярэдняя школа. Разам мы зрабілі нашы вёскі больш прыгожымі і ўтульнымі. Радуе, што ініцыятыўных грамадзян становіцца ўсё больш. І ўжо не мы да іх, а яны да нас ідуць з прапановай зрабіць нешта яшчэ.

Нэлі ЗІГУЛЯ

Фота Тамары УКРУЖСКАЙ

Выбар рэдакцыі

Грамадства

Нацыянальная акадэмія навук ініцыюе стварэнне народнага летапісу Вялікай Айчыннай вайны

Нацыянальная акадэмія навук ініцыюе стварэнне народнага летапісу Вялікай Айчыннай вайны

Навукоўцы звяртаюцца да кіраўніцтва абласных і раённых выканаўчых камітэтаў, устаноў адукацыі і культуры, грамадскіх арганізацый, усіх зацікаўленых грамадзян з просьбай разгарнуць работу па зборы ўспамінаў і фатаграфій удзельнікаў падзей Вялікай Айчыннай вайны.

Грамадства

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

З Леанiдам Левiным, славутым нашым архiтэктарам, мяне пазнаёмiў Генадзь Бураўкiн — яго даўнi, харошы сябра.

Грамадства

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Без мiлiцыi мы нiяк», — рэзюмаваў Прэзiдэнт Беларусi Аляксандр Лукашэнка падчас сустрэчы з мiнiстрам унутраных спраў Юрыем Караевым, маючы на ўвазе сiтуацыю з каранавiрусам.