16 студзеня, субота

Вы тут

Старшыня Савета Рэспублiкi Наталля Качанава правяла прамую лiнiю


Трэба сказаць, звычайна ў гэты дзень тэлефон у яе рабочым кабiнеце не змаўкае нi на хвiлiну — ахвотных расказаць асабiста спiкеру верхняй палаты парламента аб тым, што хвалюе, з кожным разам менш не становiцца. I гэта добра — веданне таго, з якiмi праблемамi сутыкаюцца жыхары таго цi iншага рэгiёна, дазваляе рэспублiканскiм органам дзяржаўнага кiравання адэкватна рэагаваць на патрэбы i запыты людзей на месцах.


У асноўным тэматыка зваротаў застаецца нязменная: зямельныя i камунальна-бытавыя пытаннi складаюсь «касцяк» усiх праблем, з якiмi звяртаюцца заяўнiкi. Напрыклад, 75-гадовую пенсiянерку з Бабруйска Эму Iванаўну непакоiць тое, што на зямлi, якой яна валодае ў вёсцы Вiнаградаўка Сычкаўскага сельсавета, пакуль немагчыма пабудаваць жыллё. Жанчына пераканана, што яе спадчыннiкi ў будучым хацелi б гэта зрабiць, але мясцовыя ўлады адмаўляюць з нагоды таго, што, маўляў, участкак будзе выкарыстоўвацца не па прызначэннi.

З крыху iншай праблемай, але ўсё ж таксама па зямлi, да старшынi Савета Рэспублiкi звярнуўся фермер з Дзяржынскага раёна. Ён расказаў, што ў свой час узвёў дзве пабудовы на сваiм участку ў вёсцы Каменка Негарэльскага сельсавета, але са змяненнем нормаў адпаведнага заканадаўства трапiў у непрыемнае становiшча: вось ужо пяць гадоў не можа ўзаконiць гэтыя будынкi.

Жыхарка Заслаўя Таццяна Васiлеўна агучыла прапанову наконт магчымасцi прадпрыемстваў, якiя валодаюць непрыдатным i старым жыллём, прадаваць яго мясцовым жыхарам, — можа, знойдуцца ахвотныя пашырыць свае плошчы вось такiм чынам?!

Спiкер верхняй палаты парламента пагадзiлася, што пытаннi па зямлi i жыллi актуальныя, i даручыла Дзяржкамiтэту па маёмасцi акцэнтаваць на iх увагу.

Гэтая ж заяўнiца агучыла яшчэ адну тэму: уладальнiкi жылля сядзiбнай забудовы часта вымушаны ацяпляць свае пабудовы з дапамогай печаў (а хацелася б ужо i электрычнасцю), награваць ваду бойлерамi — мiж тым, карыстанне электрабытавымi прыборамi сёння нятаннае. Цi ёсць магчымасць перагледзець нормы льгот па аплаце электраэнергii, спытала яна.

Сярод агучаных на прамой лiнii прапаноў асаблiвую ўвагу выклiкае вось гэтая: мiнчанка Таiсiя Iосiфаўна лiчыць мэтазгодным адмянiць аплату праезду ў грамадскiм транспарце для сталiчных жыхароў, якiя маюць статус «дзецi вайны», як гэта зроблена ў дачыненнi да ветэранаў.

Тэлефанавалi з розных рэгiёнаў краiны, каб проста падзякаваць за тое, што, нягледзячы на ўсе выпрабаваннi, кiраўнiцтва краiны змагло захаваць мiр i стабiльнасць. У прыватнасцi, пенсiянер з Крычава абураўся паводзiнамi сваiх аднагодкаў, якiя выходзяць на вулiцы:

— Чаго не хапае?! Пенсii павышаюцца, усё ёсць! Дзякуй вам, што ў складаную хвiлiну вы падтрымалi Прэзiдэнта...

Словы ўдзячнасцi i падтрымкi таксама выказалi заяўнiцы з Бабруйска Любоў Сцяпанаўна i Эма Iванаўна.

Што датычыцца зваротнай сувязi, заўсёды цiкавiла, як вырашаюцца праблемныя пытаннi, з якiмi людзi звяртаюцца на прамую лiнiю да Наталлi Качанавай.

Як паведамiлi ў Савеце Рэспублiкi, на адну з апошнiх лiнiй патэлефанаваў жыхар Баранавiч з просьбай пасадзейнiчаць у працаўладкаваннi. Раней ён звяртаўся да адказных асоб на розных узроўнях, але яго пытанне так i не вырашылася. Пасля прынятых Саветам Рэспублiкi мер заяўнiк быў працаўладкаваны.

Цi вось яшчэ прыклад. Раней да старшынi Савета Рэспублiкi звярнулася маладая барысаўчанка, якая выхоўвае дзiця, з просьбай дапамагчы ёй у атрыманнi жылля ў iнтэрнаце i, адпаведна, рэгiстрацыi там. Разгляду яе звароту аддалi пiльную ўвагу ў мясцовым райвыканкаме. Пасля таго як жанчына сабрала неабходныя дакументы i яны былi разгледжаны на пасяджэннi жыллёвай камiсii райвыканкама, у адпаведнасцi з заканадаўствам сям'i было выдзелена жылое памяшканне ў iнтэрнаце.

Канешне, не ўсе пытаннi, з якiмi звяртаюцца грамадзяне, можна вырашыць адразу. Некаторыя з iх патрабуюць дэталёвай прапрацоўкi з зацiкаўленымi i застаюцца на кантролi ў Савеце Рэспублiкi.

Так, напрыклад, на прамую лiнiю звярнулася сталiчная жыхарка з iнiцыятывай стварэння ў горадзе скейтадрома i распрацоўкай праекта з дапамогай маладых архiтэктараў у выглядзе студэнцкiх дыпломных праектаў. Iдэю накiравалi ў Мiнгарвыканкам для разгляду з усiмi зацiкаўленымi бакамi. Вынiкам стала дамоўленасць з БНТУ аб распрацоўцы студэнтамi архiтэктурнага факультэта ўнiверсiтэта праекта скейтпарка ў межах курсавога праектавання вясной 2021 года. Пад такiя аб'екты вызначаны пляцоўкi ў парку Перамогi. БНТУ перададзены даныя тапаграфiчнай здымкi, а таксама заданне на праектаванне, падрыхтаванае з удзелам грамадскай арганiзацыi «Беларуская федэрацыя скейтбордынга». Засталося толькi крыху пачакаць, каб скейтары, нарэшце, атрымалi годнае месца для ўдасканальвання свайго майстэрства.

У тэму

Большасць зваротаў — ад мiнчан

За 9 месяцаў бягучага года членамi Савета Рэспублiкi былi разгледжаны 3417 зваротаў, у тым лiку членамi Прэзiдыума Савета Рэспублiкi — 2446 (68,6 %), праведзены 674 асабiстыя прыёмы, на якiя звярнулiся 1965 грамадзян, а таксама 276 прамых лiнiй.

У верхнюю палату парламента звяртаюцца пераважна пiсьмова. Дарэчы, за дзевяць месяцаў 2020 года колькасць зваротаў вырасла ў пяць разоў у параўнаннi з такiм жа леташнiм перыядам.

Як паведамiлi ў Савеце Рэспублiкi, аўтарамi найбольшай колькасцi пiсьмовых зваротаў з'яўляюцца жыхары сталiцы — 789 (42,3 %). Другiмi iдуць прадстаўнiкi Мiнскай вобласцi — 314 (16,8 %). Самая малая колькасць пiсьмовых зваротаў фiксуецца ад жыхароў Гродзеншчыны — 84 (4,5 %).

Па структуры пытаннi насiлi iндывiдуальны характар i датычылiся жыллёвага фонду i ЖКГ (20,1 %), землеўладання i землекарыстання (6,7 %), працаўладкавання i занятасцi (5,1 %), сацыяльнага i пенсiйнага забеспячэння (4,5 %), архiтэктуры i будаўнiцтва (2,6 %).

Вольга АНУФРЫЕВА

Фота БЕЛТА

Загаловак у газеце: Просьбы, прапановы, падзякi...

Выбар рэдакцыі

Грамадства

Калі маці як дзіця, або Як пасябраваць з самымі роднымі людзьмі, якія на старасці гадоў сталі асаблівымі

Калі маці як дзіця, або Як пасябраваць з самымі роднымі людзьмі, якія на старасці гадоў сталі асаблівымі

Што рабіць, калі нечакана маці або бацька сталі вельмі настойліва заяўляць пра сябе?

Культура

Слухаць сняжынкі, сачыць за ростам травы. Янка Сіпакоў не любіў тусовак  і лічыў адзіным багаццем кнігі

Слухаць сняжынкі, сачыць за ростам травы. Янка Сіпакоў не любіў тусовак і лічыў адзіным багаццем кнігі

Вось ужо дзесяць гадоў, як пісьменнік Янка Сіпакоў застаўся ў сваіх кнігах — і тых, што падарыў, а найперш, у тых, што напісаў... А споўнілася б яму сёння 85 гадоў.