«Траецкі фестываль» у Астроўне - атмасферны фэст-кірмаш

У аграгарадку Астроўна Бешанковіцкага раёна прайшло свята духоўнай культуры і народнай творчасці «Траецкі фестываль».

Напярэдадні праваслаўнай Тройцы адбыліся плэнер дзіцячага малюнка, духоўныя асветныя чытанні, а ў нядзелю – святочная літургія ў Траецкім храме, канцэрт духоўнай музыкі, тэатральныя пастаноўкі і канцэрт народных самадзейных калектываў.

Каля сельскага Дома культуры разгарнуўся кірмаш, у якім прынялі ўдзел майстры раённага дома рамёстваў і цэнтра дзяцей і моладзі.

Калісьці ў Астроўне ў гэты нядзельны дзень праводзіліся фэсты-кірмашы, таму для адраджэння традыцыі і было задумана гэтае свята.

На гэты раз на яго прыехалі выканаўцы народных і духоўных песень з Віцебска, Талачына, Навалукомля, Лёзна, вёскі Домжарыцы Лепельскага раёна, вядома, не абышлося і без удзелу сваіх — Бешанковіцкіх і Астраўлянскіх калектываў.

Гаспадары частавалі ўдзельнікаў і гасцей свята сваімі мясцовымі кулінарнымі стравамі — юшкай і яешняй, якія гатаваліся на адкрытым агні. Каб хапіла ўсім жадаючым, прыйшлося падсмажыць амаль трыста яек.

Анатоль КЛЯШЧУК, фота аўтара