У Свіслацкім раёне 78-гадовы пенсіянер сядзеў пад плотам на ўласным прысядзібным участку і патрапіў у бальніцу. А ўсё таму, што адбылося неверагоднае супадзенне, якое і прывяло да атрымання траўм. Падрабязнасці здарэння паведамляе аддзяленне інфармацыі і грамадскіх сувязяў УУС Гродзенскага аблвыканкама.
У вёсцы Дудзічы ў спякотнае надвор’е мужчына вырашыў пасядзець у цяньку на сваім участку. Побач знаходзілася прамая дарога, па якой праязджае за гадзіну ўсяго пару аўтамабіляў. Менавіта ў той момант, калі пенсіянер сядзеў пад плотам, міма яго дома праязджаў на «Аўдзі 100» 48-гадовы жыхар суседняй вёскі Яцвезь. Кіроўца знаходзіўся ў стане алкагольнага ап’янення, заснуў, аўтамабіль з’ехаў у кювет і накіраваўся менавіта ў тое месца, дзе сядзеў пацярпелы.
У выніку наезду з траўмамі галёнак абедзвюх ног пенсіянер шпіталізаваны ў бальніцу, а на кіроўцу за язду ў нецвярозым стане і ДТЗ складзены адміністрацыйныя пратаколы.
Сяргей РАСОЛЬКА
Фота УУС Гродзенскага аблвыканкама
Сумесныя праекты ядзерных тэхналогій.
