Што вы ўяўляеце, калі чуеце слова «ферма»? Напэўна, буйных жывёл, стойлы, кормараздатчыкі...
А мы вам раскажам пра незвычайную ферму, гадаванцы якой, напрыклад, лёгка змяшчаюцца на далоні…
Гаворка пойдзе пра ферму смаўжоў «ПіліпУлі», што ў 7 км ад Брэста.
Сямейная смаўжовая ферма з’явілася ў вёсцы Падлессе-Радваніцкае ў 2019 годзе. Вы можаце запытацца, навошта разводзіць смаўжоў, калі іх і так поўна навокал... Усё не так проста. Справа ў тым, што ферма спецыялізуецца на развядзенні і вырошчванні міжземнаморскіх смаўжоў Хелікс Асперса Мюлер і Хелікс Асперса Максіма. Дарэчы, яны піянеры ў Беларусі ў гэтай справе.
Таксама на ферме ёсць некалькі смаўжоў-ахацін. Яны вырастаюць памерам з далонь дарослага чалавека. Аднак хутка стала зразумела, што разводзіць іх у прамысловых маштабах нерэнтабельна — патрабуюць занадта шмат корму (а ядуць яны ўсё). Між іншым, у некаторых краінах іх развядзенне строга забаронена, таму што ахаціны хутка размнажаюцца і становяцца злоснымі шкоднікамі.
У Беларусі гэты від смаўжоў карыстаецца папулярнасцю сярод аматараў нестандартных хатніх гадаванцаў. Шкоднікамі ў нашым клімаце ім не стаць: ахаціны цеплалюбівыя і выжыць на волі не змогуць.
З 2022 года на ферме пачалі праводзіць экскурсіі. Асаблівай папулярнасцю яны карыстаюцца сярод дзяцей. Дарослым таксама не будзе сумна: акрамя займальнай інтэрактыўнай праграмы для іх прадугледжана... дэгустацыя смаўжоў «Эскарго» і канапе з ікрой смаўжоў.
Лізавета ГОЛАД
Фота аўтара
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».