Будучыя афіцэры са зброяй у руках, перад тварам сваіх таварышаў, родных і блізкіх атрымалі права насіць курсанцкія пагоны і ганаровае званне абаронцы Айчыны. Ваенную прысягу прынялі больш як 600 учарашніх школьнікаў, гімназістаў і сувораўцаў, якія папоўнілі шэрагі курсантаў галоўнай ваеннай ВНУ краіны.
Перш чым надзець курсанцкія пагоны, першакурснікі прайшлі паглыблены прафесійна-псіхалагічны адбор, уступныя іспыты і курс пачатковай ваеннай падрыхтоўкі, асвойваючы асновы ваеннай справы. Спачатку хлопцаў і дзяўчат вучылі падшываць каўнерыкі і засцілаць вайсковыя ложкі, хадзіць страявым крокам, пазней яны прайшлі абкатку танкам і здзейснілі першыя стрэльбы са стралковай зброі.
У Беларусі створана ўласная ваенная школа. Сёння падрыхтоўка спецыялістаў для Узброеных Сіл ажыццяўляецца ў Ваеннай акадэміі і на шасці ваенных факультэтах — у БДУ, БДМУ, БНТУ, БДУІР, БелДУТ, ГрДУ імя Янкі Купалы, МГВАК. З прыняццем Ваеннай прысягі будучымі афіцэрамі можа параўнаць хіба што атрыманне запаветных лейтэнанцкіх пагонаў. Гэта знамянальная падзея — свята не толькі для саміх курсантаў, але і для іх родных і блізкіх.
Прыняцце ваеннай Прысягі начальнік Ваеннай акадэміі Рэспублікі Беларусь генерал-маёр Генадзь ЛЯПЕШКА назваў першым крокам на шляху да афіцэрскіх зорак. «У нашай краіне абарона Радзімы была і будзе ў руках моцных духам і адважных людзей, — падкрэсліў ён, звяртаючыся на першакурснікаў. — Выбраўшы для сябе шлях служэння Айчыне, вы зрабілі высакародны выбар — узялі на сябе адказнасць за мір і бяспеку на роднай зямлі. Знамянальна, што вы пачынаеце свой шлях служэння Радзіме ў Год міру і стваральнай працы, што з’яўляецца галоўнымі ўмовамі развіцця беларускай дзяржавы. Таму, прыносячы Ваенную прысягу перад абліччам сваіх таварышаў, перад роднымі і блізкімі, кожны з вас публічна пацвярджае сваю гатоўнасць і імкненне сумленна выконваць воінскі абавязак, дае клятву вернасці нашаму беларускаму народу».
І вось прагучаў доўгачаканы загад: «Курсантаў 1-га курса Ваеннай акадэміі да Ваеннай прысягі прывесці!». Шматгалоссем загучалі ўрачыстыя словы: «Я, грамадзянін Рэспублікі Беларусь...», «Клянуся годна выконваць свой воінскі абавязак!», і гучнае рэха разносіла іх над пляцам.
Вымавіў запаветныя словы клятвы і курсант Ілья Матус. «Напярэдадні сённяшняй урачыстасці вельмі хваляваўся, бо прыняцце Ваеннай прысягі — гэта вялікая адказнасць, — заўважыў юнак. — Але цяпер хваляванне змянілася гонарам, з гэтага часу я — паўнапраўны абаронца Айчыны».
Малады чалавек — з маленькага мястэчка Зэльва, што ў Гродзенскай вобласці. Яго прадзядуля — ветэран Вялікай Айчыннай вайны, быў узнагароджаны медалём «За адвагу» і ордэнам «Айчыннай вайны II ступені». Стрыечны брат Ільі служыць ва Узброеных Сілах, таму тое, што ён абраў для сябе ваенны шлях, — абсалютна лагічна і свядома.
У завяршэнні мерапрыемства курсанты хорам, зладжана і натхнёна выканалі пад акампанемент ваеннага аркестра Дзяржаўны гімн. Наперадзе ў курсантаў — цяжкая, але цікавая вайсковая дарога. За гады вучобы яны набудуць новыя веды, уменні і навыкі, стануць мацнейшымі духам і целам, умацуюцца ў веры ў свае сілы і вернасці Айчыне. Першыя крокі на гэтым шляху ўжо зроблены. Шчаслівай службы вам, будучыя лейтэнанты!
Алег НЯКАЛА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
