2 кастрычніка ў Доме літаратара адбыўся літаратурна-музычны вечар, прымеркаваны да 100-годдзя народнага паэта Дагестана Расула Гамзатава.
Мерапрыемства адкрыў прэм’ер-міністр Рэспублікі Дагестан Абдулмуслім Абдулмуслімаў, які ў сваім звароце да прысутных адзначыў агульныя культурныя каштоўнасці і погляды на развіццё духоўна-маральнага выхавання ў нашых рэспубліках, значэнне творчасці народнага паэта Дагестана Расула Гамзатава.
Арганізатар паэтычнага свята старшыня праўлення Міжнароднага грамадскага аб’яднання «Горо» Хізры Асадулаеў запрашаў на сцэну беларускіх пісьменнікаў, паэтаў, перакладчыкаў, грамадскіх дзеячаў, артыстаў. Са сцэны гучалі вершы Расула Гамзатава на беларускай, рускай, аварскай мовах, песні на вершы класіка, артысты сваімі танцамі не пакінулі абыякавым ніводнага прысутнага ў зале.
— Расул Гамзатаў пакінуў нам вялікае завяшчанне. Калі «увесь свет звар’яцеў і думае толькі аб карысці, выгадзе», у гэтым свеце ёсць тая прастора, якая дарагая нам, якая павінна заставацца дарагой, роднай, блізкай для пакаленняў нашых дзяцей, нашых унукаў, для ўсіх наступных пакаленняў. Расул Гамзатаў не выпадкова так адчуваў Беларусь і разумеў Беларусь. Таму што ён убачыў Хатынь, і яму не трэба было тлумачыць, чаму ў нас ёсць такія помнікі, — падкрэсліў у сваім выступленні старшыня Саюза пісьменнікаў Беларусі, галоўны рэдактар Выдавецкага дома «Звязда» Аляксандр Карлюкевіч.
Міністр культуры Рэспублікі Дагестан Зарэма Бутаева ўручыла беларускім дзеячам літаратуры, культуры і мастацтва ганаровыя граматы Міністэрства культуры Рэспублікі Дагестан за вялікі асабісты ўклад у папулярызацыю і захаванне культурнай спадчыны народаў Рэспублікі Дагестан у Рэспубліцы Беларусь, умацаванне міжкультурных сувязяў, актыўную творчую і грамадскую дзейнасць.
Мерапрыемства завяршылася песняй Я. Фрэнкеля на вершы Р. Гамзатава «Жураўлі» ў выкананні заслужанага артыста Беларусі Алега Сямёнава, якую зала слухала стоячы.
У вечары прынялі ўдзел: заслужаны дзеяч культуры Беларусі старшыня Мінскага гарадскога аддзялення Саюза пісьменнікаў Беларусі, паэт, перакладчык Міхаіл Пазнякоў, паэт, перакладчык Анатоль Аўруцін, саліст народнага хору рускай песні ім. А.Нікіцінай Аляксандр Валодчанка, лаўрэат міжнародных конкурсаў Васіль Астрамецкі, фальклорны гурт «Эдэльвейсы», танцавальны ансамбль «Сонечная Грузія», заслужаны артыст Беларусі Дзмітрый Сяргееў і іншыя.
Віктар ІВАНЧЫКАЎ
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
