Справа па душы

Адным з удзельнікаў святочнага мерапрыемства «Скарынаўскія чытанні», якое адбылося ў старажытным Полацку, была спецыяліст па паштовай дзейнасці АПС № 14 г. Полацк Вера Якаўлева. З яе дапамогай кожны ахвотны мог аформіць падпіску на рэспубліканскія газеты і часопісы. Ветлівая і ўсмешлівая, яна з задавальненнем выконвала свае службовыя абавязкі, і жыхары Полацка часта звярталіся да яе.

— Па адукацыі я эканаміст, — адзначыла Вера ў размове. — На пошту прыйшла пасля заканчэння Полацкага дзяржаўнага ўніверсітэта імя Еўфрасінні Полацкай. Адразу, калі ўбачыла аб'яву аб запрашэнні працаваць на пошце. Справа ў тым, што з дзяцінства мне вельмі падабалася збіраць і разглядаць паштоўкі і паштовыя маркі. Вось так маё дзіцячае захапленне адыграла галоўную ролю пры выбары будучай прафесіі. І я ўдзячная лёсу, што спыніла выбар менавіта на гэтай працы.

У паштовым аддзяленні Веры Якаўлевай прапанавалі пасаду аператара. Па словах дзяўчыны, яна адразу настроілася на сур'ёзную і добрасумленную працу. Зарэкамендавала сябе добра і праз паўгода стала спецыялістам па паштовай дзейнасці. Прызнаецца, што ў пачатку працоўнага шляху трэба было засвойваць шмат новай інфармацыі, але з часам усё стала на свае месцы. Настаўнікам стала кваліфікаваны і вопытны спецыяліст па паштовай дзейнасці Алена Варанчонак. З яе дапамогай спецыяльнасць была асвоена хутка. Яшчэ Вера дадала, што ў калектыве паштовага аддзялення, куды яна прыйшла працаваць, дзяўчыну сустрэлі прыязна. А апошнім часам ёй даверылі замяняць начальніка аддзялення.

— Сёння ў працэссе працы я выдаю і прымаю пасылкі, афармляю плацяжы, узаемадзейнічаю з мясцовымі філатэлістамі. Таксама прыемна ўдзельнічаць у спартыўных спаборніцтвах, якія праводзяцца сярод паштавікоў. Мару паступіць у Акадэмію сувязі, а таксама прыняць удзел у конкурсе прафесійнага майстэрства. На пошце мне працуецца лёгка, я не дарма вырашыла звязаць жыццё з сувяззю. Прыемна, што і людзі ставяцца да мяне добра, — з усмешкай паведаміла суразмоўніца.

Сяргей РУЧАНАЎ

Фота аўтара