Дамоўленасці па канкрэтных кірунках узаемадзеяння былі дасягнуты падчас сустрэчы Старшыні Палаты прадстаўнікоў Уладзіміра АНДРЭЙЧАНКІ з міністрам замежных спраў Баліварыянскай Рэспублікі Венесуэла Іванам Хілем ПІНТА. Гэта першы візіт дыпламата ў нашу краіну ў новай пасадзе. Спікер ніжняй палаты парламента ўпэўнены, што работа міністра будзе садзейнічаць развіццю, паглыбленню і пашырэнню супрацоўніцтва паміж Беларуссю і Венесуэлай.
Уладзімір Андрэйчанка падкрэсліў, што на працягу невялікага па маштабах гісторыі часу паміж дзвюма краінамі выбудаваны вельмі добрыя адносіны — трывалыя і дружалюбныя. Па яго словах, падмуркам гэтых адносін найперш з’яўляюцца шчырыя і даверлівыя адносіны, якія склаліся паміж прэзідэнтамі дзяржаў.
«Час сёння няпросты, і нягледзячы на тое, што нашымі апанентамі ствараюцца розныя перашкоды супраць сяброўства нашых краін, нашы адносіны, наша супрацоўніцтва паспяхова развіваюцца, — звярнуў увагу Старшыня Палаты прадстаўнікоў. — У вашай краіне распрацавана праграма-план развіцця да 2025 года, і мы ведаем, што ў гэтым плане асаблівая роля адводзіцца Рэспубліцы Беларусь».
Кажучы аб няпростай сітуацыі ў свеце, Уладзімір Андрэйчанка лічыць, што дзвюм краінам трэба аб’ядноўвацца. «Мы бачым, як Злучаныя Штаты Амерыкі, краіны Захаду вядуць актыўнае ўмяшальніцтва ва ўнутраныя справы іншых суверэнных дзяржаў: праводзяць палітыку ціску, шантажу, санкцый, — канкрэтызаваў ён. — І мы бачым, што ў гэтай сітуацыі вельмі важна кіравацца прапановай Прэзідэнта Рэспублікі Беларусь аб запуску новага міжнароднага дыялогу па пытаннях бяспекі.»
Уладзімір Андрэйчанка адзначыў, што ўважліва азнаёміўся з выступленнем міністра замежных спраў Венесуэлы на 78-й Генеральнай Асамблеі Арганізацыі Аб’яднаных Нацый. Рэспубліка Беларусь, па яго словах, мае падобныя погляды па многіх пазіцыях. «Наша краіна падтрымала ініцыятыву лідара вашай дзяржавы Нікаласа Мадуры аб стварэнні Групы сяброў у абарону Статута Арганізацыі Аб’яднаных Нацый, — адзначыў спікер. — Мы заўсёды былі і будзем прыхільныя міралюбівым і аб’яднаўчым ініцыятывам. Лічым, што нам патрэбна больш актыўна выкарыстоўваць патэнцыял створанай групы на нашых міжпарламенцкіх пляцоўках: такіх, як Міжпарламенцкі саюз, Рух недалучэння, Лацінаамерыканскі парламент. Што датычыцца механізмаў рэалізацыі гэтых задач, то яны ў нас маюцца і мы вітаем фарміраванне ў кастрычніку гэтага года Нацыянальнай асамблеяй Венесуэлы групы сяброўства з парламентам Рэспублікі Беларусь».
Уладзімір Андрэйчанка перадаў шчырыя словы ўдзячнасці свайму калегу — старшыні Нацыянальнай асамблеі Венесуэлы, які пасля абрання на гэтую пасаду ў ліку першых унёс прапанову аб стварэнні групы сяброўства з Беларуссю. Праграма далейшай дзейнасці будзе вызначана ў бліжэйшы час.
Як адзначыў міністр замежных спраў Баліварыянскай Рэспублікі Венесуэла Іван Хіль ПІНТА, Венесуэлу і Беларусь звязвае гісторыя, няхай і нядоўгая, але напоўненая плённай працай. «За 20 гадоў інтэнсіўнай работы ўдалося дасягнуць важных вынікаў, — нагадаў ён. — З моманту сустрэчы Уга Чавеса з Аляксандрам Лукашэнкам пачалі будавацца адносіны сяброўства паміж нашымі народамі, якія на сённяшні дзень непарушныя. Быў рэалізаваны шэраг сумесных праектаў у розных галінах эканомікі, прамысловасці, сельскай гаспадарцы, будаўнічай сферы, у выніку чаго ў Венесуэле была пабудавана цэлая інфраструктура дзякуючы гэтаму супрацоўніцтву».
Міністр замежных спраў заўважыў, што краінам удалося выбудаваць дружалюбныя адносіны, зыходзячы з пэўных прынцыпаў у зменлівай бягучай геапалітычнай сітуацыі. «Венесуэла і Беларусь прытрымліваюцца аднолькавых прынцыпаў, і гэта дае магчымасць мець падобную знешнюю палітыку, — удакладніў ён. — Мы, безумоўна, падзяляем прынцыпы суверэнітэту, правы народаў на самавызначэнне, неўмяшанне ва ўнутраныя справы замежных дзяржаў. Нашы адносіны — гэта не проста падтрымка пры галасаванні ў міжнародных арганізацыях. Мы з’яўляемся сапраўднымі стратэгічнымі партнёрамі на міжнароднай арэне. І, вядома, нягледзячы на тое, што ў выніку пандэміі і санкцый адносіны паміж нашымі дзяржавамі крыху пацярпелі, сёння мы знаходзімся ў адпраўным пункце, які дазволіць вярнуць іх на ранейшы ўзровень».
Бакі абмеркавалі аспекты магчымага супрацоўніцтва ў палітычнай і эканамічнай сферы. Чакаецца вялікая работа не толькі ў рамках рабочых груп па супрацоўніцтве паміж парламентамі, але і на ўсіх узроўнях.
Як паведаміў у размове з журналістамі член Пастаяннай камісіі Палаты прадстаўнікоў па адукацыі, культуры і навуцы, кіраўнік рабочай групы Нацыянальнага сходу па супрацоўніцтве з парламентам Венесуэлы Сяргей КЛІШЭВІЧ, беларуска-венесуэльскія адносіны маюць трывалы падмурак, выбудаваны ў свой час Аляксандрам Лукашэнкам і Уга Чавесам. «На базе гэтага падмурка мы можам развіваць нашы адносіны ў любой плоскасці, — дадаў дэпутат. — Размова ідзе аб перазагрузцы, яна актыўна пачалася. Нашы кампаніі аднаўляюць работу ў Венесуэле: у першую чаргу гэта будаўнічая галіна, сельская гаспадарка. Беларусь і Венесуэла з павагай адносяцца да палітыкі адна адной, таксама ў пэўнай ступені мы з’яўляемся маякамі для ўсяго свету ў пабудове ўласнай палітыкі, заснаванай на сацыяльнай справядлівасці, і выступаем за шматпалярны свет. Мы будзем развіваць нашы адносіны ў гандлёва-эканамічнай плоскасці, нашы эканомікі ўзаемадапаўняльныя, нам ёсць што прапанаваць адно аднаму. Безумоўна, пераадолеем санкцыі і будзем працаваць на тое, каб нашы народы жылі лепш, каб наша сяброўства мацнела ва ўсіх адносінах».
Вераніка КАНЮТА
Фота БелТА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
