Жыхары Лельчыцкага раёна атрымалі ў падарунак сучасны гарадскі стадыён

У Дзень Кастрычніцкай рэвалюцыі жыхары Лельчыцкага раёна атрымалі ў падарунак сучасны гарадскі стадыён, паведамляе сайт Гомельскага аблвыканкама.

Адкрываючы абноўлены стадыён у Лельчыцах, намеснік старшыні аблвыканкама Дзмітрый Алейнікаў падкрэсліў, што развіццё спорту — ключавая задача дзяржавы. «Здароўе нацыі — гэта клопат не толькі медыкаў, але і кожнага з нас, — працытаваў намеснік губернатара Прэзідэнта краіны. — Бо без фізічнай актыўнасці, заняткаў спортам не будзе здаровай нацыі».

Дзмітрый Алейнікаў дадаў, што кіраўніцтва вобласці надае вялікую ўвагу ўдасканаленню спартыўнай інфраструктуры. Летась увялі ў эксплуатацыю лядовую арэну ў Жлобіне і стадыён у Добрушы. Сёлета, напярэдадні II Гульняў краін СНД, абнавілі лядовы палац у Гомелі, у снежні плануецца адкрыць сучасны лядовы палац у Светлагорску. На завяршальнай стадыі будаўніцтва стадыёнаў у Нароўлі, Карме і Ельску.

Адкрыццё стадыёна прайшло маштабна — з віншаваннямі ад ганаровых гасцей, падарункамі, эстафетай і музычнымі нумарамі.

Пасля афіцыйнага адкрыцця пачаўся футбольны матч: ветэраны супраць юніёраў.

Фота Гомельскага аблвыканкама