У Мінску адбыўся канцэрт, прымеркаваны да Міжнароднага дня інвалідаў

Адрозненні ў культуры, мовах, магчымасцях не з’яўляюцца перашкодамі для творчасці. Наадварот, дзякучы асаблівасцям можна ствараць непаўторныя, цікавыя, яскравыя праекты. Рэспубліканскі цэнтр нацыянальных культур актыўна супрацоўнічае з Мінскай гарадской арганізацыяй «Беларускае таварыства інвалідаў». Установы правялі шэраг сумесных мерапрыемстваў, сярод якіх — выстаўкі, канцэрты, літаратурна-музычныя вечары. Пры гэтым людзі з абмежаванымі магчымасцямі выступаюць не толькі ў якасці гледачоў, але і артыстаў. Так было і падчас канцэрта «Ад сэрца да сэрца», у ім узялі ўдзел артысты Беларускага таварыства інвалідаў, якія з’яўляюцца лаўрэатамі розных конкурсаў і фестываляў у галіне культуры і мастацтва. Разам з імі на сцэну выходзілі творчыя калектывы нацыянальна-культурных аб’яднанняў, прадстаўнікі азербайджанскай, армянскай, башкірскай, грузінскай, індыйскай, іранскай, казахскай, карэйскай, малдаўскай, рускай і татарскай нацыянальнасцяў. 

Да канцэртнай праграмы далучыліся і вучні мінскай спецыяльнай школы № 13. Дзеці выступалі разам са спецыяльным госцем з Масквы Яўгеніяй Караткевіч. Дзяўчына — уражэнка Магілёва. З адзінаццаці гадоў яна прымае ўдзел у дабрачынных канцэртах. Яшчэ малой дзяўчынкай выступала разам з магілёўскім ансамблем «Радуга» ў дзіцячых дамах і дамах састарэлых. Пасталеўшы, Яўгенія Караткевіч заснавала свой дабрачынны фонд, які дапамагае таленавітым дзецям. Дзякуючы яму ўжо прайшло некалькі канцэртаў, на якіх выступалі разам дзеці з асаблівымі магчымасцямі з Расіі і Беларусі. 

У час канцэртнай праграмы «Ад сэрца да сэрца» юныя артысты з асаблівасцямі слыху паказалі, як яны адчуваюць музыку, словы песні яны выказвалі жэстамі.

Старшыня праўлення Мінскай гарадской арганізацыі «Беларускае таварыства інвалідаў» Валянціна Максіменка не хавала сваіх эмоцый: «Мы адчуваем сябе роўнымі сярод роўных. Хочам сказаць вялікі дзякуй за тоё, што мы разам, за вашу увагу, за ваша сяброўства». 

Алена ДЗЯДЗЮЛЯ

Фота аўтара