Падчас чарговага пасяджэння адзінаццатай сесіі Савета Рэспублікі прыняты законапраекты «Аб рэспубліканскім бюджэце на 2024 год» і «Аб змяненні законаў па пытаннях падаткаабкладання». Раней быў зацверджаны праект Закона «Аб бюджэце дзяржаўнага пазабюджэтнага фонду сацыяльнай абароны насельніцтва Рэспублікі Беларусь на 2024 год». Такім чынам, работа абедзвюх палат парламента над галоўнымі фінансавымі дакументамі краіны на будучы год завершана — цяпер яны будуць накіраваны на разгляд кіраўніку дзяржавы.
У 2024 годзе даходы рэспубліканскага бюджэту плануюцца ў памеры 39 906,4 млн. рублёў, кансалідаванага бюджэту — 67 526,8 млн. рублёў, што адпаведна на 2,8% і 6,3% больш, чым ацэнка паступленняў 2023 года. Расходы рэспубліканскага бюджэту ў будучым годзе плануюцца ў суме 44 657,4 млн. рублёў, кансалідаванага бюджэту — 72 679,6 млн. рублёў, або 113,9% і 112,1% адпаведна да ацэнкі мінулага года.
Прыярытэтнымі кірункамі бюджэтнай палітыкі ў наступным годзе застаюцца сацыяльная сфера, павышэнне дабрабыту грамадзян за кошт павелічэння памеру заработнай платы, падтрымка нацыянальнай эканомікі ва ўмовах, якія існуюць. У прыватнасці, у расходах рэспубліканскага бюджэту на 2024 год прадугледжаны сродкі на выплату «сямейнага капіталу» — 382,5 млн. рублёў, фінансаванне будаўніцтва жылля з дзяржаўнай падтрымкай — 1,7 млрд. рублёў.
Што датычыцца падатковых змяненняў, прадугледжваецца індэксацыя ставак падаткаў з улікам інфляцыйных працэсаў, адмена асобных малаэфектыўных падатковых ільгот, прадастаўленне падатковага выліку выпускнікам устаноў сярэдняй спецыяльнай і прафесійна-тэхнічнай адукацыі, накіраваных на работу па размеркаванні, — у памеры мінімальнай заработнай платы на тэрмін да сямі гадоў.
«Змяненні ў Падатковы кодэкс накіраваны на павелічэнне даходаў бюджэту і стварэнне большай сацыяльнай справядлівасці ў грамадстве, — адзначыў член Пастаяннай камісіі Савета Рэспублікі па эканоміцы, бюджэце і фінансах Валянцін Байко. — Адбываецца індэксацыя зямельнага і экалагічнага падаткаў у сярэднім да 107,5%, мяняецца стаўка падаходнага падатку з 13% да 25% на звышдаход. Калі даход у грамадзян складзе больш 200 тысяч рублёў у год, будзе выплачвацца падаходны падатак у памеры 25%. Павялічваецца падатак на прыбытак для арганізацый, якія атрымліваюць больш 25 мільёнаў рублёў у год. Такіх арганізацый у нас у краіне каля 155 з 38 тысяч. Калі індывідуальныя прадпрымальнікі атрымліваюць у год даход звыш 500 тысяч у год, стаўка падаходнага падатку складзе 30%. Уводзіцца падатак на люксавыя аўтамабілі з коштам больш як 100 тысяч долараў, з года выпуску якіх прайшло не больш за тры гады». Пры гэтым стаўка падатку на транспартныя сродкі павышанай камфортнасці будзе павялічана ў дзесяць разоў.
Уводзіцца паняцце «адзіны маёмасны плацеж», які ўяўляе сабой агульную суму падатку на нерухомую маёмасць, зямельнага падатку і транспартнага падатку і будзе выплачвацца фізічнай асобай на адзін рахунак рэспубліканскага бюджэту.
Адобрылі сенатары і праект Закона «Аб спыненні міжнародных дагавораў па пытаннях барацьбы з карупцыяй». Дакумент падрыхтаваны з мэтай дэнансацыі Рэспублікай Беларусь Канвенцыі аб крымінальнай адказнасці за карупцыю, Дадатковага пратакола да Канвенцыі аб крымінальнай адказнасці за карупцыю, Канвенцыі аб грамадзянска-прававой адказнасці за карупцыю, спынення дзеяння Пагаднення паміж Рэспублікай Беларусь і Саветам Еўропы адносна прывілей і імунітэтаў прадстаўнікоў членаў Групы дзяржаў супраць карупцыі (ГРЕКО) і членаў інспекцыйных груп, а таксама выканання ўнутрыдзяржаўных працэдур для спынення ўдзелу Рэспублікі Беларусь у ГРЕКО.
Як адзначыў генеральны пракурор Андрэй Швед, не з’яўляючыся членам Савета Еўропы, Рэспубліка Беларусь добраахвотна прыняла на сябе абавязацельствы па ўдзеле ў механізмах агульнаеўрапейскага супрацоўніцтва па пытаннях барацьбы з карупцыяй. «Акрамя таго, наша краіна падпісала Пагадненне з Саветам Еўропы і са студзеня 2011 года стала членам ГРЕКО (Групы дзяржаў супраць карупцыі), — заўважыў кіраўнік ведамства. — Генеральная пракуратура ва ўзаемадзеянні з іншымі зацікаўленымі органамі і арганізацыямі прыкладала неабходныя намаганні па выкананні дадзеных рэкамендацый, накіроўвала адпаведную інфармацыю ў выканкам ГРЕКО. Разам з тым многія рэкамендацыі насілі палітычны характар і патрабавалі ўнясення змяненняў у Канстытуцыю і нацыянальнае заканадаўства, што з’яўляецца непрымальным. ГРЕКО нашы довады аб немагчымасці рэалізацыі патрабаванняў, якія прад’яўляліся, не ўспрымала, пастаянна крытыкавала нашу краіну за незадавальняючы, па іх меркаванні, узровень выканання рэкамендацый».
Праект Закона «Аб змене законаў па пытаннях барацьбы з тэрарызмам», за які прагаласавалі члены Савета Рэспублікі, накіраваны на павышэнне эфектыўнасці мер па папярэджанні, выяўленні і спыненні актаў тэрарызму. У прыватнасці, органы дзяржаўнай бяспекі надзяляюцца кампетэнцыяй па каардынацыі дзейнасці суб’ектаў, якія непасрэдна ажыццяўляюць барацьбу з тэрарызмам (за выключэннем Службы бяспекі Прэзідэнта Рэспублікі Беларусь), іншых дзяржаўных органаў і іншых арганізацый у частцы рэалізацыі імі сваіх паўнамоцтваў у галіне барацьбы з тэрарызмам. Служба інкасацыі будзе працягвацца да аховы аб’ектаў, суправаджэння і забеспячэння бяспекі фізічных асоб і транспартных сродкаў у зоне правядзення контртэрарыстычнай аперацыі.
Сенатары адобрылі законапраект, які даўно чакалі грамадзяне, — «Аб змяненні законаў па пытаннях кіравання жыллёвым фондам і яго эксплуатацыі». Удакладняецца паняційны апарат у адносінах да арганізацый забудоўшчыкаў (жыллёвых і жыллёва-будаўнічых спажывецкіх кааператываў), якія змогуць стварацца толькі на базе аднаго шматкватэрнага жылога дома. Устанаўліваецца адзіны парадак акумулявання грашовых сродкаў плацельшчыкаў на капітальны рамонт жылых дамоў на спецыяльных рахунках мясцовых выканаўчых і распарадчых органаў для іх мэтавага выкарыстання. Урад надзяляецца паўнамоцтвамі па вызначэнні парадку атэстацыі суб’ектаў гаспадарання, якія эксплуатуюць жыллёвы фонд і (або) прадастаўляюць жыллёва-камунальныя паслугі. Мясцовым выканаўчым і распарадчым органам прадастаўляецца права ануляваць пасведчанне аб праходжанні прафесійнай атэстацыі старшыні праўлення арганізацыі ўласнікаў, прызначаць упаўнаважаную асобу для кіравання агульнай маёмасцю сумеснага домаўладання ў выпадках анулявання такога пасведчання або спынення тэрміну яго дзеяння, а таксама прымаць рашэнне аб ліквідацыі арганізацыі ўласнікаў. Для грамадзяніна ўстанаўліваецца абмежаванне на займанне пасады старшыні праўлення толькі ў адной арганізацыі ўласнікаў.
Старшыня Савета Рэспублікі Наталля Качанава паведаміла, што гэты законапраект некалькі разоў разглядаўся на экспертным савеце. Яна расказала, што ні адзін прыём грамадзян не абыходзіцца без скаргаў на работу таварыстваў уласнікаў. Таму, па словах спікера верхняй палаты парламента, тыя новаўвядзенні, якія прапаноўваюцца ўрадам, на дадзены момант з’ўляюцца аптымальнымі.
Праектам Закона «Аб змене Закона Рэспублікі Беларусь «Аб меліярацыі зямель» удакладняецца паняційны апарат, а таксама ўводзяцца новыя тэрміны і іх вызначэнні для выключэння праблемных пытанняў пры бюджэтным фінансаванні мерапрыемстваў у галіне меліярацыі зямель. Мінсельгасхарч надзяляецца паўнамоцтвамі па арганізацыі правядзення навукова-даследчых і доследна-канструктарскіх работ, каардынацыі дзейнасці органаў дзяржаўнага кіравання і арганізацый у галіне меліярацыі зямель. Удасканальваюцца падыходы адносна планавання меліярацыйных мерапрыемстваў з улікам вынікаў інвентарызацыі меліярацыйных сістэм, якая праводзіцца адзін раз у пяць гадоў, і іншае.
Унесены змены ў заканадаўства «Аб ахове азонавага слою» і «Аб абыходжанні з адходамі». Як звярнуў увагу старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаіл Русы, тая кліматычная павестка, агучаная кіраўніком дзяржавы ў Дубаі, у нашай краіне не словы, а канкрэтныя справы. Аб гэтым сведчыць блок прыродаахоўных дакументаў, разгледжаны парламентарыямі. «Закон „Аб меліярацыі зямель“ вельмі неабходны сёння, асабліва для сяльчан, — удакладніў старшыня камісіі. — Ужо дзясятак гадоў кіраўнік дзяржавы выказвае заклапочанасць аб уцягванні ў абарот меліяратыўных земляў, якія павінны прыносіць аддачу. Гэта дадатковыя кармы, збожжа, прадукцыя жывёлагадоўлі — а значыць валюта».
Таксама сенатары адобрылі змяненні, якія закрануць заканадаўства аб дарожным руху, дзейнасці рэлігійных арганізацый, дзяржаўных узнагародах, ліцэнзаванні. Ратыфікаваны шэраг міжнародных пратаколаў і пагадненняў.
Вераніка КАНЮТА
Фота БелТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
