Чыгунка па-ранейшаму застаецца зонай павышанай небяспекі. Тым не менш, спяшаючыся або скарачаючы шлях, людзі пераходзяць чыгунку ў неўстаноўленым месцы або на забараняльны сігнал святлафора. Іншыя засунуць у вушы навушнікі, нацягнуць капюшон на галаву і ўвогуле нічога не чуюць ды не бачаць. Менавіта з-за няўважлівасці, ігнаравання мер бяспекі, як правіла, і здараюцца няшчасныя выпадкі на аб’ектах чыгуначнага транспарту.
У 2023 годзе на стальных магістралях пацярпелі 92 чалавекі. 70 з іх загінулі, астатнія былі траўміраваны. Няшчасныя выпадкі на чыгунцы адбыліся і з удзелам пяці непаўналетніх. Чатыры дзіцяці атрымалі траўмы, несумяшчальныя з жыццём. Сярод пацярпелых — 31 пенсіянер. Практычна кожны другі траўміраваны чыгуначным саставам знаходзіўся ў стане алкагольнага ап’янення.
Год толькі пачаўся, а на чыгунцы — ужо першыя ахвяры. 28 студзеня, у 17.12, на прыпыначным пункце Зарэчнае, што ў Смалявіцкім раёне, цягніком рэгіянальных ліній эканомкласа № 6020 Мінск — Орша быў траўміраваны дзевятнаццацігадовы хлопец. Мясцовага жыхара шпіталізавалі ў рэанімацыйнае аддзяленне Смалявіцкай цэнтральнай раённай бальніцы, дзе ад атрыманых цялесных пашкоджанняў ён памёр. Як потым высветлілася, малады чалавек рухаўся па краі платформы. Акурат у гэты час набліжаўся цягнік. Хутчэй за ўсё, хлопец яго проста не заўважыў — на месцы здарэння былі знойдзены навушнікі.
12 лютага на адным маршруце адбылася двайная трагедыя. Цягнік рэгіянальных ліній эканомкласа № 6134, які рухаўся з Маладзечна ў Мінск, у 20.50 на станцыі Уша смяротна траўміраваў жыхара Маладзечанскага раёна. Здарэнне адбылося на тэхнічнай пешаходнай дарожцы, размешчанай па-за межамі платформы. Мужчына выйшаў на чыгуначныя пуці, калі цягнік знаходзіўся ад яго на адлегласці каля 20 метраў. Ужо ў Мінску, на прыпыначным пункце Масюкоўшчына, у 22.09 пад гэты ж састаў трапіў жыхар Мінскага раёна, які саскочыў з пасадачнай платформы на галоўны шлях. Нягледзячы на прымяненне экстраннага тармажэння, наезду прадухіліць не ўдалося. Мужчына загінуў. Падобных прыкладаў з трагічным фіналам, на жаль, нямала. Большасць здарэнняў у мінулым годзе адбылося ў Мінску, а таксама на Віцебшчыне і Гомельшчыне. Як правіла, няшчасныя выпадкі фіксаваліся ў ранішні, вячэрні і начны час. На станцыях і прыпыначных пунктах, якія часцей за ўсё размяшчаюцца або ў населеных пунктах, або побач з імі, летась былі траўміраваны 44 чалавекі, на перагонах — 48 грамадзян.
Органы ўнутраных спраў ва ўзаемадзеянні з супрацоўнікамі дзяржаўнага аб’яднання «Беларуская чыгунка» рэалізоўваюць комплекс арганізацыйна-тэхнічных мерапрыемстваў, накіраваных на забеспячэнне бяспекі грамадзян на чыгунцы. З гэтай мэтай прымаюцца дадатковыя меры па папярэджанні гібелі і траўматызму людзей.
— У сталіцы і абласных цэнтрах, дзе адзначаецца вялікі пасажырапаток, чыгуначныя пуці абсталёўваюцца металічнай агароджай, што стварае максімальныя ўмовы для бяспечнага руху цягнікоў і выключае магчымасць набліжэння да пуцей пабочных асоб, якія не ўдзельнічаюць у забеспячэнні перавозачнага працэсу, — адзначае начальнік упраўлення грамадскай бяспекі на аб’ектах транспарту МУС палкоўнік міліцыі Генадзь Ворса. — На буйных станцыях і прыпыначных пунктах пешаходныя пераходы абсталяваны аўтаматычнымі апавяшчальнікамі, якія паведамляюць аб набліжэнні цягніка. Перад прыбыццём цягнікоў на станцыях перадаецца інфармацыя, у тым ліку аб мерах бяспекі. Усе станцыі і прыпыначныя пункты ў начны час асветлены, у зімовы час своечасова ачышчаюцца ад снегу, наледзі.
З мэтай мінімізацыі трагедый на чыгунцы праводзяцца і шматлікія прафілактычныя і папераджальныя мерапрыемствы. Супрацоўнікі міліцыі нагадваюць аб правілах бяспечнага знаходжання на аб’ектах чыгуначнага транспарту ў сродках масавай інфармацыі, падчас выступленняў у працоўных калектывах, навучальных установах. Людзі звяртаюць увагу на прафілактычныя ўлёткі, бігборды, ролікі на інфармацыйных табло, экранах. Праваахоўнікі праводзяць рэйдавыя мерапрыемствы ў месцах пераходу грамадзянамі чыгуначных шляхоў там, дзе гэта не ўстаноўлена, нясуць службу на станцыях і прыпыначных пунктах.
Як заўважае Генадзь Ворса, па пытаннях прафілактыкі правапарушэнняў, няшчасных выпадкаў на аб’ектах транспарту летась супрацоўнікамі органаў унутраных спраў праведзена больш за 13,2 тысячы выступленняў у працоўных калектывах, 9,8 тысячы — сярод навучэнцаў устаноў адукацыі, 1,9 тысячы — у сродках масавай інфармацыі. «Дзякуючы гучнагаварыцельнай сувязі, кожны дзень на вакзалах чыгуначных станцый, у будынках аэравакзальных комплексаў, а таксама ў рухомых саставах ажыццяўляецца трансляцыя прафілактычнай інфармацыі, — дадае ён. — У залах чакання чыгуначных вакзалаў трансліруюцца відэаролікі па папярэджанні невытворчага траўматызму, дарожна-транспартных здарэнняў, прафілактыцы крадзяжоў маёмасці пасажыраў. З улікам павелічэння няшчасных выпадкаў з пажылымі грамадзянамі праводзіцца індывідуальная работа з названай катэгорыяй насельніцтва».
Каб не трапіць у сумную статыстыку пацярпелых на чыгунцы, варта выконваць простыя правілы, якія захаваюць жыццё і здароўе не толькі вам, але і вашым блізкім.
Па-першае, пераходзіць чыгуначныя пуці неабходна строга ва ўстаноўленых месцах, пераканаўшыся ў адсутнасці надыходзячага цягніка. Па-другое, забараняецца падлазіць пад вагоны, залазіць на вагоны, цыстэрны, заскокваць у вагон цягніка, які адыходзіць, альбо выходзіць з вагона да поўнага спынення цягніка. Па-трэцяе, нельга стаяць, гуляць на пуцях або каля краю платформы. І, вядома, тым, хто любіць хадзіць у навушніках, у такіх месцах, як чыгунка, рэкамендуецца іх здымаць. Не варта спадзявацца на добры зрок і асабістую ўважлівасць — шматлікія трагедыі, якія адбыліся фактычна па віне гэтага моднага дэвайса, даказваюць, што яны адцягваюць увагу і дэзарыентуюць чалавека.
У цэлым органы ўнутраных спраў на транспарце забяспечваюць грамадскую бяспеку, ахову грамадскага парадку і барацьбу са злачыннасцю не толькі на аб’ектах чыгуначнага транспарту. У зоне іх адказнасці — яшчэ і паветраны транспарт. Упраўленне грамадскай бяспекі на аб’ектах транспарту МУС ажыццяўляе распрацоўку і рэалізацыю кіраўніцкіх рашэнняў па забеспячэнні грамадскай бяспекі як на аб’ектах паветранага і чыгуначнага транспарту, так і Мінскага метрапалітэна. Праводзяцца прафілактычныя і іншыя мерапрыемствы па выяўленні фактаў незаконнага выкарыстання паветранай прасторы. Удасканальваецца заканадаўства ў сферы рэгулявання выкарыстання і прымянення беспілотных лятальных апаратаў і сродкаў радыёэлектроннай барацьбы. Усё з адной мэтай — гарантаваць бяспеку насельніцтву.
Заўтра калектыў гэтага найважнейшага падраздзялення Міністэрства ўнутраных спраў адзначыць 105-годдзе. Віншуем і жадаем, каб правапарушэнняў на транспарце было як мага менш.
Вераніка КАНЮТА
Фота прэс-службы МУС
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
