У эпоху баляў і паядынкаў музычная адукацыя лічылася асновай свецкіх манер, статусу і адукаванасці чалавека. Аднак тады засвоіць прафесійную ігру на інструменце маглі толькі сапраўдныя арыстакраты. Цяпер жа кожны ахвотны, незалежна ад свайго паходжання і ўзросту, можа гэта зрабіць, прыйшоўшы ў музычную школу. Якую карысць тоіць у сабе ігра на музычным інструменце, якія напрамкі можна асвоіць, і як гэта — быць кіраўніком музычнай школы, нам расказала трыццацідвухгадовая Ірына Касцюк, дырэктар школы мастацтваў Дзяржынска.
— Я — музыка з адукацыяй. Скончыла з адзнакай Беларускі дзяржаўны ўніверсітэт культуры і мастацтваў, аддзяленне «Мастацтва эстрады». Пачала свой шлях з педагагічнай дзейнасці, дзесяць гадоў прапрацавала настаўнікам па класе скрыпкі. Вельмі люблю сваю прафесію, ні разу ў жыцці не пашкадавала, што выбрала гэтую ніву. Менавіта дырэктарам школы мастацтваў з’яўляюся адносна нядаўна. Прапанова ўзначаліць яе паступіла ў 2021 годзе. Гэта новы этап і новы бясцэнны вопыт, усведамленне таго, чым займаешся і якую місію выконваеш. Наша галоўная задача — выхаванне і адукацыя падрастаючага пакалення. Гэтыя мэты дапамаглі мне прыняць рашэнне і ўзначаліць школу мастацтваў. Усе мае пакуль яшчэ нешматлікія дасягненні як дырэктара ўспрымаю не як асабістыя перамогі, а як заслугу ўсяго калектыву, бо мы робім адну справу. Аднак самыя яскравыя перамогі яшчэ чакаюць нас наперадзе!
Ірына адзначае, што абавязкі дырэктара вельмі разнапланавыя. Трэба быць добрым арганізатарам, гаспадарнікам, псіхолагам, яшчэ ў гэтай прафесіі важна быць чалавекам творчым. Працаваць менавіта кіраўніком, як прызнаецца наша гераіня, вельмі і вельмі няпроста, але пры гэтым не менш цікава. У першы год у яе ўзнікала мноства пытанняў, не хапала ведаў у пэўнай сферы, бо яна атрымлівала зусім іншую адукацыю і з кіраўніцкай дзейнасцю сутыкнулася ўпершыню, давялося вучыцца на хаду. Але дзякуючы калегам, якія заўсёды гатовы прыйсці на дапамогу і аказаць патрэбную кансультацыю, Ірына стала прафесіяналам сваёй справы.
— Зараз сумяшчаю дырэктарства з педагагічнай дзейнасцю, але, вядома, ужо не ў такім аб’ёме, як раней. Лічу, што вельмі важна перадаваць веды, якімі ты напоўнены. Мне ёсць чым падзяліцца са сваімі вучнямі, бо яны ў мяне самыя лепшыя!
Дзяржынская школа мастацтваў працуе па наступных кірунках: музычны, харавы, харэаграфічны і мастацкі. З 2021 года актыўна развіваецца і набірае абароты эстраднае аддзяленне.
— Важным вектарам з’яўляецца прафарыентацыйная работа. Штогод пяць-шэсць навучэнцаў паступаюць у профільныя сярэднія спецыяльныя і вышэйшыя навучальныя ўстановы краіны, паказваючы высокі ўзровень падрыхтоўкі. Але самае прыемнае, калі выпускнікі вяртаюцца ў сцены роднай школы ў статусе настаўнікаў, каб далей працягваць свой творчы шлях.
На пытанне, што ж дае навучанне музыцы, акрамя навыкаў ігры на інструменце ці пастаўленага вакалу, наша гераіня адказала без роздумаў:
— Музыка развівае гарманічную асобу, яна ўплывае на работу мозга, маторыку рухаў, мысленне, дапамагае развіваць слых і рытм, паляпшае памяць. Упэўнена на сто працэнтаў, што чалавек, які хоць крыху дакрануўся да творчасці ў любых яе праявах, адчуў гэта на сабе. А з-за таго, што дзіцячае ўспрыманне больш адчувальнае, мысленне гнуткае і рухомае, карысць ад заняткаў узмацняецца ў шмат разоў.
Як мы ўжо казалі ў пачатку, цяпер у музычнай школе могуць навучацца ахвотныя ўсіх узростаў, аднак ёсць нюанс. З расповеду Ірыны мы даведаліся, што дзіцячы мозг валодае ўнікальнай здольнасцю апрацоўваць і ўспрымаць інфармацыю ў разы хутчэй. З узростам нашы суставы і мышцы становяцца менш рухомыя, а гэта прыводзіць да пэўных цяжкасцяў. Музыка, як і спартсмен, павінен увесь час падтрымліваць сябе ў рабочай форме.
— Калі казаць пра класічную музычную адукацыю, то яна адназначна перажывае пэўныя змены. У свеце, які імкліва развіваецца, калі кожны дзень дыктуе новыя тэндэнцыі, цяжка ўтрымліваць лідзіруючыя пазіцыі. Я ўпэўнена, што немагчыма пабудаваць новае без моцнага падмурка. Гэта як аснова, як важнае звяно, якое нельга ўпускаць, асабліва што датычыцца адукацыі дзяцей. Вядома, электронныя музычныя інструменты цяпер заваёўваюць цікавасць у іх, гэта бясспрэчна. З вялікім задавальненнем падлеткі навучаюцца ігры на электрагітары і ў нашай школе. У нас у планах ёсць развіццё «Лічбавага кірунку», бо гэта зараз вельмі папулярна, але пытанне патрабуе дэталёвай прапрацоўкі.
Ангеліна НОВІКАВА
Фота дадзены гераіняй
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
