У Гомельскай вобласці пражываюць 148 ветэранаў Вялікай Айчыннай вайны

У Гомельскай вобласці пражываюць 148 ветэранаў Вялікай Айчыннай вайны. Такія даныя прывяла першы намеснік старшыні камітэта ідэалагічнай работы і па справах моладзі Гомельскага аблвыканкама Таццяна Кручко на пасяджэнні аблвыканкама, перадае БелТА.

У пасяджэнні аб арганізацыі мерапрыемстваў у гонар 80-й гадавіны вызвалення Беларусі ад нямецка-фашысцкіх захопнікаў і Перамогі савецкага народа ў Вялікай Айчыннай вайне прыняў удзел кіраўнік спраў Прэзідэнта Юрый Назараў.

У паўднёва-ўсходнім рэгіёне, як і ў рэспубліцы ў цэлым, удзяляецца першарадная ўвага ветэранам Вялікай Айчыннай вайны, запэўніла Таццяна Кручко. Паводле звестак на 20 сакавіка, у Гомельскай вобласці пражываюць 148 ветэранаў Вялікай Айчыннай вайны, 1490 асоб, якія пацярпелі ад наступстваў вайны. Кожнаму з іх аказваецца ўсебаковая падтрымка. «З 25 красавіка па 4 мая плануецца выплаціць матэрыяльную дапамогу да Дня Перамогі за кошт сродкаў рэспубліканскага бюджэту. Агульная сума складзе каля Br2 млн», — абазначылі ў аблвыканкаме.

Пастаянна шэфскую дапамогу аказваюць прадпрыемствы, арганізацыі і ўстановы. Усе пытанні і запыты вырашаюцца максімальна аператыўна.

Так, за тры месяцы з пачатку года абследавалі ўмовы жыцця ўсіх ветэранаў ВАВ і асоб, якія пацярпелі ад наступстваў вайны. Паступіла 28 заявак ад ветэранаў і 115 — ад пацярпелых ад наступстваў вайны. Гэта просьбы аб уборцы прыдамавой тэрыторыі і жылля, аб забеспячэнні палівам, тэхнічнымі сродкамі рэабілітацыі, аб сацыяльным абслугоўванні і інш. Усе заяўкі, якія паступілі, выкананы.

У Гомелі ветэранам Вялікай Айчыннай вайны бясплатна прадастаўляюць транспартныя паслугі «Сацыяльнае таксі». Ва ўсіх раёнах вобласці праводзяцца дабрачынныя акцыі «У дапамогу ветэрану», «Клопат», «Эстафета добрых спраў», «Эстафета цяпла», «Эстафета дабра» і інш. Прымаюцца ўсе неабходныя меры па паляпшэнні іх медабслугоўвання, санаторнага аздараўлення і інш.

У гонар 80-й гадавіны вызвалення Беларусі ад нямецка-фашысцкіх захопнікаў і Перамогі савецкага народа ў Вялікай Айчыннай вайне ў Гомельскай вобласці намечана маштабная праграма мерапрыемстваў. «Не застаюцца без увагі і дзеці вайны. Ніхто не павінен быць забыты», — пазначыла пазіцыю ў рэгіёне Таццяна Кручко.

Старшыня Гомельскага аблвыканкама Іван Крупко акцэнтаваў увагу на значнасці захавання гістарычнай памяці. «У падрыхтоўцы да святкавання знакавага юбілею не можа быць абыякавасці і фармалізму. Гэта датычыцца і ўвагі да нашых паважаных ветэранаў, і стану помнікаў, і іншых форм работы», — рэзюмаваў ён.

Прэв'ю: БелТА