Ад плоскаступнёвасці пакутуе амаль кожны пяты школьнік, хоць большасці з нас ад нараджэння дастаюцца здаровыя ногі, і ад нас саміх залежыць, ці захаваем мы іх у парадку да старасці.
— Плоскаступнёвасць — гэта дэфармацыя ступні, — кажа ўрач лячэбна-фізкультурнага комплексу 3‑й гарадской дзіцячай паліклінікі г. Мінска Антаніна ТОПТУН. — Наогул ступня складаецца са многіх касцей, звязак, сухажылляў і мышцаў, якія ўтвараюць два зводу: папярэчны і прадольны. Гэты фундамент нашага цела дапамагае нам захоўваць раўнавагу і абараняць не толькі каленны, тазасцегнавы, галёнкаступнёвы суставы, але і пазваночнік.
Пры плоскаступнёвасці ступня патоўшчаная і пашыраная ў пярэдняй і сярэдняй частках, падоўжны звод апушчаны, пятка адхіляецца вонкі. Папярэдні звод — гэта выемка ў аснове пальцаў. Пры яе адсутнасці скрыўляецца вялікі палец, з узростам дэфармуецца сустаў першага пальца — расце «костачка», на падэшве ўтвараецца цвёрды мазоль, хада становіцца нязграбнай. Дзіця з такой паталогіяй скардзіцца на тое, што ў яго баляць ножкі, яно стамляецца пасля працяглай хады.
І сабе, і дзецям падбірайце абутак правільна.
Абутак павінен быць па памеры, гнуткім, з натуральнай, эластычнай скуры. Насок — мяккі, прасторны, каб не сціскаў пальцы. Абавязковы атрыбут — абцасы. Недапушчальная для дзяцей адкрытая пятка. Самы вялікі вораг ступні — высокія і касыя абцасы, падэшвы-платформы. Высокі абцас цісне на пярэднюю частку ступні, расплюшчвае яе. Абутак неабходна падбіраць з супінатарам або класці сцілку-супінатар, якая падтрымае натуральную вышыню зводаў ступні. У некаторых выпадках трэба набываць артапедычны абутак.
Умацаваць мышачна-звязачны апарат ступні можна з дапамогай лячэбнай гімнастыкі, але пры ўмове, калі рабіць яе штодня. Выконваць спецыяльныя практыкаванні лепей раніцай, пакуль мышцы не стаміліся. Паўтараць кожнае практыкаванне 10–12 разоў. Вучыце такім практыкаванням і сваіх дзяцей.
* Сядзьце, пастаўце ступню на край тоўстай кнігі. Сціскаючы пальцы, абхапіце край кнігі.
* Захапіце пальцамі ступні які-небудзь дробны прадмет, перанясіце з аднаго месца ў другое.
* Прыцісніце да падлогі мяч і качайце спачатку адной нагой, пасля другой.
* Прыцісніце пальцы ног і трымайце 3–6 хвілін.
* Наступіце на палку нагой і качайце яе.
* Падцягніце пальцамі ног маленькі дыванок.
* Станьце басанож на падлогу, параўнуйце наскі. Адначасова згінаючы пальцы і не адрываючы пяткі ад падлогі, рухайцеся наперад «вусенічным крокам».
* Прайдзіцеся на насках у поўным прысесце.
* Зрабіце перапад з наскоў на пяткі.
* Хадзіце на насках з спружыністым крокам.
* Хадзіце на насках, пятках, на вонкавым і на ўнутраным краі ступні.
* Хадзіце басанож па дробных камянях, скошанай траве, рыхлай зямлі.
Дзіця, якое развіваецца правільна, пачынае хадзіць напрыканцы першага года. Часта яно спрабуе стаць на ножкі раней, а бацькі яшчэ і прыспешваюць гэты момант, чым наносяць непапраўную шкоду. Ранняе стаўленне на ножкі з'яўляецца празмернай нагрузкай для крохкіх касцей і слабаразвітых мышцаў. Як вынік — дэфармацыя ножак і плоскаступнёвасць.
Прадухіліце дэфармацыю ступняў
— Правільна падбірайце абутак.
— Трымайце постаць.
— Штодня рабіце агульнаўмацавальную гімнастыку.
— Вядзіце ў цэлым рухавы лад жыцця.
Святлана БАРЫСЕНКА.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?