Вы тут

Ёсць пытанне? Вам адкажа юрыст!


Як даведацца нумар сваёй чаргі на сацыяльнае жыллё і ад чаго залежыць хуткасць яе руху? Ці можа наймальнік звольніць маці, якая гадуе дзіця-інваліда? На гэтыя пытанні адказвае юрыст Офіса па правах людзей з інваліднасцю Вольга ТРЫПУЦЕНЬ.

Стаю на чарзе на сацыяльнае жыллё...

Я маю дзіця-інваліда і знаходжуся на ўліку тых, хто мае патрэбу ў паляпшэнні жыллёвых умоў. Скажыце, як даведацца нумар сваёй чаргі на сацыяльнае жыллё і ад чаго залежыць хуткасць яе прасоўвання? (С.В., г. Мінск)

Базы даных аб грамадзянах, якія знаходзяцца на такім уліку, фарміруюць мясцовыя выканаўчыя і распарадчыя органы, іншыя дзяржаўныя органы і арганізацыі, якія ажыццяўляюць улік грамадзян, што маюць патрэбу ў паляпшэнні жыллёвых умоў. Звесткі аб чарговасці на аснове гэтага ўліку выдаюцца па просьбе грамадзян, якія маюць патрэбу ў паляпшэнні жыллёвых умоў.

Для таго каб даведацца нумар чаргі на кватэру, вам лепш за ўсё звярнуцца ў выканкам з пісьмовай просьбай. Каб ваш зварот стаў афіцыйным, зарэгіструйце яго ў выканкаме або адпраўце па пошце з паведамленнем аб уручэнні. Згодна з Законам "Аб зваротах грамадзян і юрыдычных асоб",

адказ вам павінны даслаць на працягу месяца.

У мінчан ёсць магчымасць даведацца інфармацыю аб сваёй чарзе на сайце Мінскага гарадскога выканаўчага камітэта па наступнай спасылцы httр://mіnsk.gоv.bу/ru/осh/.

Па пытанні аб'ёмаў будаўніцтва ў вашым раёне рэкамендуем таксама звярнуцца ў свой выканкам (адміністрацыю).

У мяне дзіця-інвалід. Ці могуць мяне звольніць?..

Ці можа наймальнік звольніць мяне, калі майму дзіцяці-інваліду яшчэ не споўнілася пяць гадоў? (Ірына К., г. Мінск)

Згодна з арт. 28 Працоўнага кодэкса Рэспублікі Беларусь ад 26 ліпеня 1999 года № 296-З, скасаванне працоўнага дагавора па ініцыятыве наймальніка з цяжарнымі жанчынамі, жанчынамі, якія маюць дзяцей ва ўзросце да трох гадоў, адзінокімі маці, якія маюць дзяцей ва ўзросце ад трох да чатырнаццаці гадоў (дзяцей-інвалідаў — да васямнаццаці гадоў), не дапускаецца, акрамя выпадкаў ліквідацыі арганізацыі, спынення дзейнасці індывідуальнага прадпрымальніка, а таксама ў сувязі з:

— Прагулам (у тым ліку адсутнасцю на працы больш за тры гадзіны на працягу працоўнага дня) без прычын;

— Сістэматычным невыкананнем работнікам без уважлівых прычын абавязкаў, ускладзеных на яго працоўным дагаворам ці правіламі ўнутранага працоўнага распарадку, калі да работніка раней прымяняліся меры дысцыплінарнага спагнання;

— З'яўленнем на працы ў стане алкагольнага, наркатычнага ці таксічнага ап'янення, а таксама распіццём спіртных напояў, ужываннем наркатычных сродкаў або таксічных рэчываў у працоўны час або па месцы працы;

— Здзяйсненнем па месцы працы крадзяжу маёмасці наймальніка, устаноўленага прысудам суда, які ўступіў у законную сілу, або пастановай органа, у кампетэнцыю якога ўваходзіць накладанне адміністрацыйнага спагнання;

— Аднаразовым грубым парушэннем правілаў аховы працы, якое пацягнула калецтва або смерць іншых работнікаў;

— Аднаразовым грубым парушэннем працоўных абавязкаў (гэта тычыцца пасад кіраўнікоў арганізацыі або адасобленага падраздзялення і яго намеснікаў, галоўных бухгалтараў і яго намеснікаў);

— Зменай уласніка маёмасці арганізацыі (у дачыненні да кіраўніка арганізацыі, яго намеснікаў і галоўнага бухгалтара);

— Парушэннем (без уважлівых прычын парадку і тэрмінаў выплаты заработнай платы і (або) дапамог (гэта тычыцца кіраўніка арганізацыі);

— Здзяйсненнем вінаватых дзеянняў работнікам, які непасрэдна абслугоўвае грашовыя і матэрыяльныя каштоўнасці, калі гэтыя дзеянні з'яўляюцца падставай для страты даверу да яго з боку наймальніка;

— Здзяйсненнем работнікам, які выконвае выхаваўчыя функцыі, амаральнага ўчынку, несумяшчальнага з працягам гэтай працы.

Пры гэтым у адпаведнасці з п. 22 Пастановы Пленума Вярхоўнага Суда Рэспублікі Беларусь ад 29 сакавіка 2001 г. № 2 "Аб некаторых пытаннях прымянення судамі заканадаўства аб працы" адзінокай маці лічыцца жанчына, якая нарадзіла дзіця па-за шлюбам, у выпадку, калі звесткі пра бацьку дзіцяці ў актавым запісе аб нараджэнні зроблены ва ўстаноўленым парадку па ўказанні маці.

Такім чынам, вы не можаце быць звольнены па ініцыятыве наймальніка (акрамя вышэй пералічаных выпадкаў):

— Да дасягнення дзіцем 3 гадоў — у любым выпадку;

— Калі ў вас ёсць дзіця ва ўзросце ад 3 да 14 гадоў (дзяцей-інвалідаў — да 18 гадоў) — у выпадку, калі вы з'яўляецеся адзінокай маці.

Святлана БУСЬКО.

Р.S. Калі ў вас узніклі нейкія дадатковыя пытанні, вы можаце звяртацца з імі да юрыстаў Офіса па правах людзей з інваліднасцю па тэл. +375 (17) 256-08-29, або па Е-mаіl: іnfо@dіsrіght.оrg

Кансультацыі бясплатныя.

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».