Артысты будуць спяваць на арэне, дзе амаль 50 гадоў таму хакеісты СССР разграмілі канадцаў
Стала вядома месца правядзення юбілейнага, 60-га міжнароднага песеннага конкурсу «Еўрабачанне-2015». Арганізатары яго, тэлекампанія OFR, спынілі свой выбар на сталіцы Аўстрыі — Вене, паведамляе афіцыйны сайт конкурсу. За права прымаць найвялікшае забаўляльнае шоу ў Еўропе спаборнічалі таксама Лінц, Клагенфурт, Грац і Інсбрук.
«Мы вельмі задаволены рашэннем. Бо ўпэўнены, што Вена — горад музыкі і мастацтва — мае дастаткова вопыту, кадраў і сродкаў для правядзення перадавой забаўляльнай падзеі сусветнага ўзроўню, — зазначыў выканаўчы прадзюсар Еўрапейскага вяшчальнага саюза Джон Ола Санд, — і мяркуем, што ўбачым тры дзівосныя шоу». Дарэчы, Вена ўжо была фестывальнай сталіцай у 1967 годзе — тады конкурс праходзіў у знакамітым палацы Хофбург.
Як звычайна, два паўфінальныя і фінальны тур конкурсу пройдуць у маі — папярэднімі датамі канцэртаў называюць 19, 21 і 23 мая адпаведна. Месцам правядзення абраны найбуйнейшы ў Вене крыты стадыён «Вінер Штадтхале», які змяшчае да 16 тысяч гледачоў (на гэтай арэне, між іншым, адбыўся знакаміты хакейны матч СССР—Канада ў 1967 годзе).
А вось канчатковы спіс краін, якія возьмуць удзел у «Еўрабачанні», стане вядомы толькі напрыканцы студзеня 2015 года. Сёлета, нагадаем, у конкурсе выступалі прадстаўнікі 37 краін свету, а перамогу гледачы і журы аддалі, бадай, самаму скандальнаму ўдзельніку — «жанчыне з барадой» Канчыце Вурст з Аўстрыі. Паглядзелі ж шоу у тэлетрансляцыі больш чым 195 мільёнаў чалавек з 40 краін свету.
Дакладных звестак, ці зменіцца штосьці ў правілах і фармаце «Еўрабачання-2015», пакуль што таксама няма. Затое вядома, што з'явіцца новае афармленне і лагатып — такім чынам арганізатары мяркуюць адзначыць дзве даты: 60-годдзе песеннага спаборніцтва і 10-годдзе самога лагатыпа.
Вікторыя ЦЕЛЯШУК
Сумесныя праекты ядзерных тэхналогій.