Мінскі кінафестываль упершыню правядзе конкурс нацыянальнага кіно
Першай навіной ад дырэкцыі кінафестываля «Лістапад», які ў гэтым годзе адбудзецца ў дваццаць першы раз, стала аб'ява аб арганізацыі новага конкурсу. «Нацыянальны конкурс», як ён названы ў прэс-рэлізе, павінен увабраць у сябе ігравыя, дакументальныя, анімацыйныя; кароткаметражныя і поўнаметражныя карціны, створаныя беларусамі. На апошнім варта зрабіць акцэнт: важна, каб фільм быў зняты беларусамі, але не важна, дзе гэта адбывалася. Ці павінна ў агульнай кінапалітры праграмы выяўляцца беларуская ментальнасць, ці конкурс закліканы выставіць на ўсеагульны агляд таленавітыя працы беларусаў, ці проста пераканацца і пераканаць у тым, што гэты крытэрый адбору можа выявіць нешта вартае? Скажам, можна чакаць выканання кожнага пункта.
Нягледзячы на тое, што ўсе карціны змяшаюцца ў агульным конкурсе, прадугледжаны тры ўзнагароды, якія атрымае ігравы, дакументальны і анімацыйны фільмы, а прысуджаць іх будзе асобнае міжнароднае журы.
«Лістапад» не зніжае планку. У конкурс будуць адабраны фільмы, якія адпавядаюць таму ўзроўню, які найбуйнейшы кінафорум краіны запытвае. Нават калі ўдзельнікаў будзе няшмат, можна быць упэўненым: яны вартыя ўвагі і ацэнкі. Такім чынам, у праграме (не важна, колькі фільмаў яна ў сябе змесціць) можна ўбачыць карціну сучаснай беларускай кінатворчасці.
Пачатак прыёму заявак абвешчаны адносна нядаўна, аднак з тых фільмаў, што паспелі даслаць у дырэкцыю кінафестывалю, ужо, кажуць, можна нешта вылучаць.
«Беларускае кіно так ці інакш заўсёды прысутнічала ў праграме кінафоруму. Гэта і «Кіндэрвілейскі прывід» Алены Туравай, і «У тумане» Сяргея Лазніцы, і «Роля» Кастуся Лапушанскага, — каментуе дырэктар праграм ігравога кіно кінафестывалю Ігар Сукманаў. — Мы падыходзім да выбару конкурсных карцін з павышанымі патрабаваннямі. Фільмы-ўдзельнікі — гэта фільмы, якія маюць сур'ёзную рэпутацыю, узнагароды на аўтарытэтных кінафорумах. Некаторыя абмежаванні таксама не дазваляюць нам запрашаць малыя формы, бо мы працуем у асноўным з фарматам поўнага метра. У сувязі з гэтым беларускаму кантэнту бывае складана далучыцца да фестывалю. Нам важны гонар мундзіра. З другога боку, «Лістапад» павінен мець нешта, звязанае з нацыянальным кіно. Таму мы вырашылі паспрабаваць зрабіць нацыянальны конкурс, не ставячы фільтраў. Мы прымаем поўны метр, кароткі метр, анімацыйнае, дакументальнае, вядомае, невядомае — любое кіно.
Крытэрый адбору ўсё роўна даволі высокі. Мы разглядаем толькі тыя фільмы, якія маюць дачыненне да паняцця «мастацтва кіно». Нас цікавяць беларускія аўтары, якія спрабуюць выказаць нешта звязанае з самаідэнтыфікацыяй. І не важна, у якой частцы свету яны жывуць».
Гэты конкурс, калі ён сапраўды прапануе не прадукт, а мастацтва, здольны заявіць пра беларускае кіно на міжнародным фестывалі, што павінна згуляць на руку яго іміджу. Пакуль невядома, колькі карцін будзе ўдзельнічаць у конкурсе. Але нават калі адпаведных крытэрыям адбору карцін будзе некалькі — яны на належным узроўні прадставяць нацыянальнае кіно.
«Наша ўяўленне пра беларускае кіно часцей за ўсё запаралелена з прадуктам «Беларусьфільма». Між тым перыядычна ўсплываюць цікавыя работы маладых аўтараў. Наша задача — кінуць невад і нешта з ім выцягнуць. Пакуль што складана сказаць, што мы з яго атрымаем. Я поўны аптымізму, бо за невялікі тэрмін з тых часоў, як абвешчаны адбор, бачу цікавыя працы, якія ў мяне выклікаюць энтузіязм», — прадоўжыў Ігар Сукманаў.
ХХІ Мінскі міжнародны кінафестываль «Лістапад» у гэтым годзе адбудзецца з 7 па 14 лістапада і, традыцыйна, абяцае стаць святам «мастацтва кіно», якога нам так не хапае.
Ірэна КАЦЯЛОВІЧ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?