Учора Аляксандр Гур'янаў, намеснік міністра замежных спраў Беларусі, сустрэўся з міжведамаснай дэлегацыяй Злучаных Штатаў Амерыкі. Апошняя складалася з прадстаўнікоў кіраўніцтва Агенцтва ЗША па міжнародным развіцці, міністэрства абароны і Дзяржаўнага дэпартамента Злучаных Штатаў.
Як паведамляе прэс-служба Міністэрства замежных спраў, бакі абмеркавалі магчымасці аднаўлення і пашырэння ўзаемадзеяння паміж Беларуссю і Злучанымі Штатамі ў пэўных галінах, абмяняліся поглядамі на бягучы стан і перспектывы развіцця двухбаковых адносін. Падчас сустрэчы былі закрануты і тыя пытанні, па якіх сёння паміж бакамі існуюць рознагалоссі. Прадстаўнікі нашай краіны і ЗША выказалі па іх свае прынцыповыя пазіцыі, а таксама дамовіліся аб працягу дыялогу для забеспячэння нармалізацыі беларуска-амерыканскіх стасункаў.
Праграмай візіту міжведамаснай дэлегацыі ЗША запланаваны таксама сустрэчы ў Міністэрстве абароны, Міністэрстве эканомікі і Міністэрстве адукацыі Беларусі.
У апошнія гады стасункі з гэтай краінай, пасля дастаткова «халоднага» перыяду, паступова наладжваюцца. Кіраўніцтва Злучаных Штатаў разумее, што палітыка санкцый прыносіць шкоду і іх дзяржаве, у сваю чаргу і наша краіна імкнецца знайсці падыходы да супрацоўніцтва з заходнімі краінамі. Так, паміж Мінс-кам і Вашынгтонам вядуцца інтэнсіўныя закрытыя кансультацыі аб аднаўленні паўнавартаснай работы пасольстваў (з 2008 года дыпламатычныя прадстаўніцтвы не выдаюць віз). Акрамя таго, ЗША знялі санкцыі ў дачыненні да двух нашых прадпрыемстваў — «Белтэхэкспарту» і «БелОМА». Беларусь жа з 2013 года пашырыла сваё супрацоўніцтва з ЗША ў рамках Паўночнай размеркавальнай сеткі, па якой ажыццяўляецца забеспячэнне кантынгенту НATА ў Афганістане (праз нашу краіну ідзе чыгуначны транзіт).
Значную ролю ў змякчэнні адносін можа адыграць і факт інвестыцыйнай прывабнасці нашай краіны для амерыканскіх інвестараў. Нягледзячы на стрыманыя палітычныя адносіны, бізнесмены ЗША часта выбіраюць менавіта Беларусь у якасці краіны, куды можна ўкласці свой капітал. Так, ужо ў 2010 годзе ў рэспубліцы было зарэгістравана больш за 300 сумесных і замежных прадпрыемстваў з удзелам капіталу грамадзян Злучаных Штатаў.
Надзея ЮШКЕВІЧ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?