Вы тут

Дадайце ў адзенне «пярчынку рашучасці»


або Што апрануць гэтай восенню?

Футра, карункі, кепі. Спадніцы-гафрэ, сукенкі-футляры і штаны а-ля Марлен Дзітрых. Пра гэтыя ды іншыя модныя тэндэнцыі сезона восень-зіма 2014/2015 нам распавяла мастак-мадэльер беларускага «Цэнтра моды» Вікторыя КОЛБ:

— Для моды гэтага сезона характэрны функцыянальнасць і зручнасць. Але яна не пазбаўлена індывідуальнасці. Таму кожная модніца пры выбары адзення павінна памятаць, што няправільна выбраная вопратка можа сапсаваць не толькі яе воблік, але і настрой. Перш за ўсё адзенне павінна быць камфортным.

Сезону восень-зіма 2014/2015 уласцівы наступныя чатыры тэндэнцыі.

20-16

Па-першае, мужчынскі стыль у адзенні. Ён застаецца актуальным яшчэ з мінулых сезонаў. Своеасаблівая дзяўчына-дэндзі, апранутая ў жакет і штаны мужчынскага стылю. Такія ансамблі вызначаюцца кансерватыўнасцю. Могуць быць адна- ці двухбортныя, з аксесуарамі ці без. Тэндэнцыя гэта прадыктавана сацыяльным статусам некаторых сучасных жанчын. Яны цяпер самастойныя, незалежныя, самадастатковыя. Зварот да такой вось «мужнасці» дапамагае падкрэсліць пярчынку рашучасці ў іх вобразе.

Па-другое, колер-блокі. Гэта калі ідзе спалучэнне ў адным ансамблі двух яркіх колераў, што стаяць побач у спектральным крузе.

Па-трэцяе, шырокае выкарыстанне футра. Доўга- і кароткаворсавага. У асноўным дызайнеры робяць акцэнт на яркія, насычаныя колеры. Стракацяць футравыя калекцыі на подыумах! Гэта не вельмі функцыянальна для штодзённага жыцця. Але смелыя какеткі могуць дазволіць сабе і такі ўбор.

Па-чацвёртае, спалучэнне ў ансамблі адценняў аднаго колеру. Чарнейшае за чорнае, напрыклад. Тут вопратка будзе адрознівацца па фактуры. Ці цалкам бэжавы строй. Нават аксесуары: капелюшы, сумкі, абутак — усё павінна быць у адным колеры.

20-17

Сукенкі могуць быць самай рознай даўжыні — міні, мідзі і максі. Максі часцей за ўсё выбіраюць для вечара. А для офіса лепш падыдуць сукенкі-футляры ці іншыя мадэлі не надта прылеглага сілуэту, завужанага ўнізе. Рукаў ушыўны, спушчаны ці цэльнакроены. У любым выпадку сукенку трэба выбіраць на свой густ. Колер тут, дарэчы, мае вялікае значэнне. Увогуле, колер і сілуэт — самае галоўнае пры выбары сукенкі. Калі два гэтыя складнікі падабраны ўдала, вы адшукалі найлепшы варыянт.

Для штодня падыдуць як клятчастыя сукенкі, так і аднатонныя. Выкананыя з шарсцяных ці полівіскозных матэрыялаў. Увогуле акцэнт у гэтым сезоне робіцца на натуральныя тканіны — каб скура дыхала.

Для вячэрніх строяў застаюцца актуальнымі сукенкі з карункамі, гіпюравыя, расшытыя бліскаўкамі, упрыгожаныя пёркамі. Даўжыня — пераважна максі. А паўпразрыстая тканіна дапаможа падкрэсліць сексуальнасць жанчыны.

У паліто гэтай восенню аддаецца перавага прамым сілуэтам. У тым ліку дызайнеры выкарыстоўваюць мадэлі «оўверсайз» — нібы вы апрануліся не са свайго пляча. Гэта значыць, што паліто большае за патрэбны памер.

Выразна прагледжваецца тэндэнцыя на спушчаную лінію пляча і сілуэты «а-ля 60-я» ў мужчынскім стылі. У модзе застаюцца трэнчы, курткі і паркі з падсцёжкай і без, якія асабліва падабаюцца моладзі. Паліто могуць быць аднатонныя, у клетку ці нават у гарошак, двухбортныя ці аднабортныя, натуральныя ці штучныя футравыя паліто ўсіх колераў. З цэльнакройнымі рукавамі і скарочанымі — 7/8 ці 3/4. Часцяком выкарыстоўваецца некалькі несупастаўных матэрыялаў аднаго колеру. Гэта надае вопратцы фактурнасць.

Не выходзяць з моды А-падобныя спадніцы з падкрэсленай лініяй таліі. Не саступаюць і мадэлі, завужаныя ўнізе, сілуэта прамаго, гафрэ і плісэ. Модна асіметрыя. Яна можа праяўляцца ў дэталях (накладныя кішэні) ці ў кроі (мадэлі з запахам). Даўжыня выкарыстоўваецца самая розная — ад міні да максі. Часцей за ўсё, зразумела, жанчыны выбіраюць аптымальнае мідзі. Спадніцы максі таксама актуальныя, тым больш што яны дапамаюць жанчыне прыхаваць праблемныя зоны. А «хіт» сезона — спадніцы са скуры. Пажадана тонкай і натуральнай.

Класічныя чорныя штаны ўстойліва трымаюцца як на подыумах, так і ў нашых шафах. Для офіса зручнымі будуць яны ж, але ўжо са стрэлкамі ці кансерватыўна шырокія. «Разынкай» сезона з'яўляюцца штаны а-ля Марлен Дзітрых са складкамі каля пояса. У расфарбоўцы пераважна сустракаецца клетка, палоска ці аднатон: чорны, каньячны, гарчычны, бледна-жоўты.

У абутку перавага аддаецца абцасам тоўстым, устойлівым, скошаным, а таксама шпількам. У модзе застаюцца ўлюбёныя жанчынамі чорныя лодачкі і «лакіроўкі». А туфлі з абцасамі-цвікамі падыдуць для асаблівых жанчын. Насы мусяць быць завостранымі і П-падобнымі. Для моладзі дызайнеры прапаноўваюць красоўкі на плоскай падэшве ці на платформе (снікерсы). Або вельмі брутальныя — з байкерскай атрыбутыкай і «трактарнай» шырокай падэшвай.

У галаўных уборах перамагаюць футравыя мадэлі і вязаныя ці з палітовай тканіны берэты. Насіць апошнія можна класічна ці на бок — як модніца пажадае. У шапках гэтага сезона аднолькава выкарыстоўваецца буйная і дробная вязкі.

Застаюцца актуальнымі капелюшы, але яны крыху мяняюць сваю форму: ужо высокія з вузкімі палямі. Асаблівым попытам карыстаюцца кепі, якія падыйдуць для спартыўнага стылю ці класічнага ансамбля.

Папулярныя сярод жыхарак Беларусі легенсы ў гэтым сезоне таксама сустракаюцца. Але іх пажадана насіць толькі тады, калі гэта дазваляе фігура. У іншым выпадку легенсы можна замяніць штанамі-дудачкамі ці іншымі вузкімі мадэлямі.

Сярод колераў перавага аддаецца кобальту, сіняму, бэзаваму, гарчычнаму, адценням чырвонага і каньячнага. Што тычыцца прынтоў, карыстаюцца попытам сюжэты флоры і фаўны: леапарды, тыгры, зебры, гепарды, а таксама кветкі. Не адступаюць і геаметрычныя матывы.

Жанчынам зусім не абавязкова апранацца цалкам па-мужчынску. Дастаткова выкарыстаць адну такую рэч, а астатнія — класічныя. Гэта будзе таксама модна, бо змяшэнне стыляў у гэтым сезоне лічыцца актуальным.

Для пышных дам падыдуць А-падобныя спадніцы і спадніцы-алоўкі ці сілуэт, завужаны знізу. Таксама паліто «оўверсайз» зможа апрануць кожная жанчына — ад 42-га да 56-га памеру. Мадэль можа быць 46-га памеру, а падыдзе жанчыне 50-га. Прыгожа будзе выглядаць на даме, якая не мучыць сябе дыетамі, паліто з запахам, паліто-трансформер. Яны ўніверсальныя, камфортныя і не перашкаджаюць руху. Штаны лепш выбіраць даўжыні 7/8 — па шчыкалатку.

— У наступным сезоне ды і ўвогуле па жыцці жанчынам рэкамендуецца... палюбіць сябе, — кажа Вікторыя. — Да мяне часта прыходзяць заказчыцы і кажуць: «Зрабіце мяне больш стройнай». Гэта, вядома, магчыма выканаць з дапамогай канструктыўных прыёмаў. Але... Перш за ўсё чалавек павінен палюбіць сябе такім, які ён ёсць. Прыняць сябе і сваю знешнасць. І тады не толькі адзенне, але і ўсё ў жыцці будзе мець прывабныя, на ўсе часы модныя колеры.

Вераніка ПУСТАВІТ

 

Дадаць каментар

Выбар рэдакцыі

Грамадства

Зміцер Жылуновіч. Таварыш пясняр

Зміцер Жылуновіч. Таварыш пясняр

Ён быў аўтарам Маніфеста аб абвяшчэнні Савецкай Беларусі, першым прэм'ер-міністрам рэспублікі, яго двойчы выключалі з партыі, ён мог стаць першым народным паэтам...

Грамадства

Трансфармацыя адукацыі: поўнае паглыбленне... у лічбу

Трансфармацыя адукацыі: поўнае паглыбленне... у лічбу

Ці спросціць «Электронная школа» жыццё педагогам і як гэта адаб'ецца на якасці ведаў?

Грамадства

Прэзідэнт зрабіў кадравыя прызначэнні

Прэзідэнт зрабіў кадравыя прызначэнні

Аляксандр Лукашэнка даў згоду на прызначэнне рэктараў і кіраўнікоў раёнаў і прадпрыемстваў.

Калейдаскоп

Чым здзівіў Беларускі тыдзень моды

Чым здзівіў Беларускі тыдзень моды

Пазнаёміцца з навінкамі ад беларускіх дызайнераў можна было на тыдні моды, які праходзіў у Мінску з 7 да 11 лістапада.