Нямецкі дызайнер і пісьменніца Яна Франк — яркі прадстаўнік творчай прафесіі, які не па чутках ведае, як складана сумяшчаць натхненне з часам. На ўласным вопыце дзяўчына пераканалася, што «творчы беспарадак» ні да чаго добрага не прыводзіць. Я таксама лічу сябе крэатыўным чалавекам, і праблема недахопу часу мне вельмі знаёмая. У сутках усяго 24 гадзіны, а ў галаве столькі ідэй, думак, планаў... Вядома, хочацца ўсё ўвасобіць у рэальнасць. Але якім чынам? Аказваецца, існуе цэлая навука пра тое, як правільна арганізоўваць час. Яна называецца тайм-менеджмент. Пра гэта я ўпершыню даведалася з кнігі «Муза і пачвара». Нягледзячы на тое, што яна адрасавана творчым асобам, кожны зможа знайсці ў ёй для сябе штосьці карыснае. Бо я ўпэўнена: ва ўсіх людзей на Зямлі ёсць жылка крэатыўнасці. Хачу расказаць, як парады Яны Франк дапамагаюць мне хутчэй дасягаць пастаўленых мэт.
Парада першая: весці штодзённік. Запомніць усё не толькі немагчыма, але і не трэба. Тым больш, задачы, перанесеныя на паперу, выглядаюць лягчэй і больш рэальна. Гэта нібы візуалізацыя жаданняў. Дарэчы, калі занесці ўсе мэты ў штодзённік, высветліцца: іх зусім няшмат. А некаторыя са спраў настолькі простыя, што ўзнікае пытанне: чаму я да гэтага часу іх не зрабіла? Становіцца нават сорамна.
Праўда, не варта забываць: штодзённік — гэта не абшар для творчасці. Неабавязкова прыгожа афармляць яго каляровым чарнілам або малюнкамі: гэтак вы толькі дарма марнуеце час. Добра, калі прыгожая вокладка штодзённіка будзе натхняць вас на вялікія здзяйсненні. Аднак галоўнае — гэта выконваць складзены спіс спраў, а не любавацца ім.
Парада другая: адшукаць тое, што «крадзе» наш час. Яна Франк прапануе выканаць практыкаванне «хранаметраж» (запіс усіх дзеянняў, якія вы робіце за дзень). Яно падкажа, якія справы вы выконваеце занадта доўга, а ад якіх наогул лепш адмовіцца. У мяне такімі «выкрадальнікамі часу» былі, напрыклад, размовы па тэлефоне, прагляд тэлевізара, інтэрнэт. Часам мы нават не ўсведамляем бессэнсоўнасць сваіх дзеянняў. А «хранаметраж» — гэта красамоўны доказ таго, як часта мы дарма губляем час.
Парада трэцяя: не спрабаваць зрабіць адразу ўсё. Прачытаць, напісаць, купіць... Бясконцая колькасць дзеясловаў, з якіх пачынаюцца мэты ў штодзённіку. Дасягнуць усяго за адзін дзень у вас, напэўна, не атрымаецца. Таму важна выконваць найбольш значныя справы і адмаўляцца ад задач, якія вам пакуль што не па сілах. Сама Яна Франк піша: «Я вызначыла для сябе максімум таго, што магу зрабіць, і нават не спрабавала выконваць больш. У выніку ў мяне знік стрэс, а прадуктыўнасць значна павялічылася».
Часта важную ролю адыгрывае настрой. Так, калі я ўсведамляю, што мне не хочацца або надакучыла рабіць што-небудзь, адразу імкнуся пераключыцца на іншы занятак ці іду адпачываць. Лепш вярнуцца да справы пазней і на свежую галаву выканаць яе ў дзесяць разоў хутчэй. Галоўнае — не пераблытаць стомленасць з лянотай.
Парада чацвёртая: не шкадаваць часу на сон. Не выспаўшыся, я не здольная ні на што, акрамя бясконцага пазяхання. Таму ніколі не пагарджаю сном. Нядаўна мая сяброўка расказала, што выконвае мноства спраў... ноччу! Аказваецца, яна ўжо месяц жыла па-новым, вельмі дзіўным рэжыме. Дзяўчынка спала толькі дзве гадзіны, а ў астатні час паспявала зрабіць урокі, пачытаць кнігу, паглядзець фільм. Паводле яе слоў, зусім не адчувала стомленасці, і начное жыццё ёй нават больш падабалася. Некаторы час я зайздросціла ёй, але неўзабаве даведалася, што сяброўка пасля такіх эксперыментаў два тыдні ляжала дома з тэмпературай. Не дзіва, бо наш арганізм патрабуе паўнавартаснага адпачынку. А яшчэ сны часам могуць падказваць вельмі цікавыя ідэі. Мабыць, мне прысніцца сюжэт маёй будучай кнігі, якая аднойчы стане бестселерам?
Парада пятая: каб пазбегнуць боязі чыстага аркуша, трэба загадзя запісаць усе варыянты і ідэі. Калі ў мяне выпадае вольны час для творчасці (напрыклад, каб напісаць тэкст), я вельмі часта саджуся перад аркушам і западаю ў ступар: што ж мне рабіць далей? А калі праз некалькі гадзін у галаву прыходзіць нейкая ідэя, працу трэба ўжо заканчваць, таму што мяне чакаюць іншыя важныя справы. На наступны дзень усе геніяльныя думкі забываюцца.
Але гэта не значыць, што трэба чакаць натхнення. Яно ўсё роўна прыходзіць у працэсе. Галоўнае, каб пад рукой аказаўся спіс вашых задум. Дарэчы, гэта тычыцца кожнай творчай дзейнасці. Калі ў вас на працягу дня з'яўляецца нейкая геніяльная ідэя, перанясіце яе ў свой сшытак. У час творчасці зірніце на яе — і натхненне ахопіць вас з той жа секунды.
Парада шостая: не забываць пра адпачынак і раз у дзень выдаткоўваць гадзіну на штосьці прыемнае ці нават дзіўнае. На адной са старонак кнігі пісьменніца прыводзіць жартаўлівы спіс «важных» спраў. Напрыклад, «маляваць іерогліфы на твары» або «крытыкаваць рэкламныя плакаты». Думаеце, гэта ўсяго толькі жарт? Памыляецеся. Такія, на першы погляд, бессэнсоўныя рэчы сапраўды бываюць важнымі таму, што яны дапамагаюць адцягнуцца ад бясконцай працы. Таму я без дакораў сумлення магу ўключыць музыку і цэлую гадзіну ўяўляць, што я рок-зорка. Навошта? Бо мне гэта падабаецца! Да крэатыўных людзей свежыя ідэі і думкі часта прыходзяць менавіта ў такія хвіліны.
P.S. Ну вось, праца скончана, тэкст напісаны. Прыйшоў час заслужанага адпачынку. Пайду «маляваць іерогліфы на твары» :).
Ганна ЯЎСЕЙЧЫК,
вучаніца 11 класа
гімназіі №61 г. Мінска.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.