Перш чым рэкультываваць міні-палігоны, трэба знайсці, куды дзець адходы
Эканамічнае стымуляванне, павышэнне інвестыцыйнай прывабнасці, удасканаленне адміністрацыйных працэдур, рэфармаванне структуры і функцый Мінпрыроды, узмацненне інспектарскай службы, павышэнне якасці і эфектыўнасці інспектарскай дзейнасці, развіццё экалагічнай асветы — вось прыярытэтныя задачы эколагаў на 2015 год, якія былі агучаны на калегіі Міністэрства прыродных рэсурсаў і аховы навакольнага асяроддзя.
Сёлета спецыялістам прыродаахоўнай сферы давядзецца сур'ёзна папрацаваць над вырашэннем многіх актуальных экалагічных праблем. І ў першую чаргу — выканаць шэсць з дванаццаці асноўных паказчыкаў Праграмы сацыяльна-эканамічнага развіцця Рэспублікі Беларусь на 2011—2015 гады. Так, трэба знізіць на 50% плошчу палёў фільтрацыі; стварыць у гарадах з колькасцю 100 тыс. чалавек і больш сістэмы адвядзення і ачысткі паверхневага сцёку з гарадскіх тэрыторый; скараціць здабычу падземнай вады на 8-10% і на 20% — скідванне забруджвальных рэчываў у водныя аб'екты; давесці долю выкарыстання адходаў вытворчасці да 85%, а аб'ёмы выкарыстання вады на гаспадарча-пітныя патрэбы на душу насельніцтва — да 130 літраў за суткі.
Дыхаць — лягчэй?
Сярод асноўных вынікаў працы эколагаў можна адзначыць змяншэнне сукупных выкідаў забруджвальных рэчываў у атмасфернае паветра ад стацыянарных і мабільных крыніц на 1,4% у параўнанні з ростам ВВП на 1,6%. На 6,3% знізіўся і валавы выкід ад стацыянарных крыніц, пры адначасовым павелічэнні вытворчых магутнасцяў хімічнай, цэментнай, машынабудаўнічай галін. На ўзроўні 85-90 млн тон стабілізіраваліся і выкіды парніковых газаў.
Летась прадоўжылася праца і па развіцці альтэрнатыўных крыніц энергіі — сертыфікаты атрымалі 64 устаноўкі, што працуюць з выкарыстаннем энергіі сонца, ветру і біягазу (усяго ў краіне сертыфікавана 113 такіх установак).
Сёлета прыродакарыстальнікі павінны выканаць шматлікія мерапрыемствы па ахове атмасфернага паветра, будаўніцтве, рэканструкцыі, мадэрнізацыі газаачышчальных установак, якія забяспечваюць скарачэнне выкідаў забруджвальных рэчываў не менш як на 4,4 тыс. тон.
Смеціць — сабе шкодзіць
У мінулым годзе, дзякуючы дзейнасці цэнтралізаванай сістэмы збору і выкарыстання адпрацаваных тэхнічных маслаў больш за 4 тыс. тон гэтых забруджвальных рэчываў не трапілі ў навакольнае асяроддзе.
Між тым, па-ранейшаму існуюць праблемы ў гэтай сферы. Па словах першага намесніка міністра прыродных рэсурсаў і аховы навакольнага асяроддзя Іі Малкінай, наспела неабходнасць распрацоўкі цэласнай сістэмы абыходжання з адходамі, у першую чаргу, з камунальнымі.
Сёння ў краіне пакуль не існуе поўнай альтэрнатывы палігонам, не абсталяваным неабходнымі ахоўнымі інжынернымі збудаваннямі. Такіх аб'ектаў функцыянуе каля 25%, і іх эксплуатацыя з 1 студзеня бягучага года забаронена.
Рэфармацыя падыходаў у сферы збору і ўтылізацыі адыходаў, прадухіленне захавання другасных матэрыяльных рэсурсаў, узмацненне кантролю за гэтымі працэсамі і больш суровы падыход да парушальнікаў заканадаўства — менавіта гэтыя захады павінны змяніць сітуацыю, што склалася ў сферы.
Шляхам вывазу за межы краіны сёлета павінна быць зрушана з месца і праблема назапашаных непрыдатных пестыцыдаў.
Караць ці прадухіляць?
Летась органы Мінпрыроды праверылі 2645 суб'ектаў гаспадарання, да адміністрацыйнай адказнасці прыцягнута 19,6 тысячы парушальнікаў на суму 14,4 млрд рублёў, выяўлена больш як паўтары тысячы фактаў прычынення шкоды навакольнаму асяроддзю на суму 16,5 млрд рублёў.
Але адсутнасць сістэмнасці ў рабоце, а ў некаторых выпадках прынцыповасці і жорсткасці падчас ажыццяўлення кантролю за выкананнем прыродаахоўнага заканадаўства нашмат зніжае яго эфектыўнасць.
— Інспектарская функцыя павінна стаць асноўнай для нашых тэрытарыяльных органаў на месцах, — упэўнена Ія Малкіна. — Мы павінны працаваць так, каб суб'ектам гаспадарчай дзейнасці было больш выгадна выконваць заканадаўства, чым яго парушаць. Ужо выпрацаваны прапановы па карэкціроўцы Адміністрацыйнага кодэкса, накіраваныя на значнае ўзмацненне адказнасці за парушэнне прыродаахоўных патрабаванняў.
Адным з асноўных аб'ектаў пастаяннага кантролю з боку эколагаў павінна стаць і навядзенне парадку ў выкарыстанні земляў, перш за ўсё меліяраваных, а таксама прадухіленне іх дэградацыі.
Па словах намесніка прэм'ер-міністра Беларусі Міхаіла Русага, які прыняў удзел у пасяджэнні калегіі, пры вырашэнні праблем абыходжання з адходамі ўсё патрэбна быць разумна і выверана, без бяздумных падыходаў.
— Рэкультываваўшы міні-палігон і не стварыўшы іншага аб'екта складзіравання назапашанага рэсурсу, можна прывесці да сітуацыі, калі адходы «перакачуюць» у бліжэйшыя лясы і іншыя зручныя месцы. А потым мы будзем шукаць гэтых людзей, каб іх пакараць.
Калі чалавек забруджвае навакольнае асяроддзе ўсвядомлена, прадумаўшы, як загрузіць смецце, куды яго звезці і нікому не папасціся, да яго павінны быць прынятыя самыя суровыя меры адказнасці. Але, каб ён не трапіў у такую сітуацыю, перш мы павінны стварыць умовы для рэалізацыі яго права на выкананне прыродаахоўнага заканадаўства».
Міхаіл Русы таксама лічыць, што патрэбна пастаянна кантактаваць з органамі мясцовай і рэспубліканскай улады і даводзіць да іх экалагічную інфармацыю. Гэта паспрыяе падрыхтоўцы правільных кіраўніцкіх рашэнняў.
Яшчэ адна важная задача — супрацоўніцтва ўсіх органаў дзяржаўнага кіравання. «Чым больш мы драбнімся, тым больш ствараем «нейтральных зон», за якія ніхто не хоча несці адказнасць».
Вераніка Коласава
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».