Менавіта ў Маладзечне, у сярэдняй школе №11, працуе настаўнікам гісторыі пераможца конкурсу прафесійнага майстэрства педагагічных работнікаў «Настаўнік года Рэспублікі Беларусь — 2014» Віктар ЖУК. Яшчэ зусім малады хлопец, ён, тым не менш, ужо мае цвёрдыя перакананні ў важнасці прафесіі настаўніка і ўмее зацікавіць дзяцей.
buzhan-3321
— Я пераканаўся, што стану настаўнікам, пасля таго, як прайшоў педагагічную практыку падчас навучання ва ўніверсітэце, — прызнаецца суразмоўца. — У маёй працы мне падабаецца сам працэс стасункаў з дзецьмі, хуткі тэмп, якога патрабуе школа, прымушаючы рухацца наперад і не спыняцца на дасягнутым.
— Як зрабіць прафесію настаўніка больш папулярнай і запатрабаванай сярод выпускнікоў школ?
— На гэта можа паўплываць настаўнік сваім уласным прыкладам. У наступным годзе буду выкладаць у адзінаццатым класе, тады і паглядзім, ці ўплываю я на ўспрыманне дзецьмі гэтай прафесіі. Ужо цяпер ёсць некалькі вучняў, якія плануюць паступаць на гістарычны факультэт Беларускага дзяржаўнага педагагічнага ўніверсітэта.
— Чаму вы надаяце асаблівую ўвагу падчас навучальнага працэсу, стасункаў з дзецьмі?
— Шмат увагі ў працы з дзецьмі імкнуся надаваць развіццю асобы школьніка. У першую чаргу ў іх павінны фарміравацца ключавыя кампетэнцыі, якія дазволяць арыентавацца ў жыцці пасля таго, як яны пераступяць школьны парог. Таксама важна вучыць дзяцей мысліць крытычна. Праз нейкі час яны забудуцца шматлікія факты з падручнікаў, але важна — у маім выпадку — каб у іх сфарміравалася агульнае ўяўленне пра гістарычны працэс.
— Вы працуеце са школьнікамі па-за межамі школы?
— Як правіла, гэта краязнаўчая праца, паходы. Можна проста згуляць у футбол.
— Ці хацелі б вы перайсці працаваць у школу або ліцэй, дзе дзеці больш падрыхтаваныя?
— Нават калі б у мяне была магчымасць перайсці працаваць у гімназію, я адмовіўся б: на дадзеным этапе са звычайнымі школьнікамі працаваць цікавей.
Надзея ЮШКЕВІЧ
Фота Надзеі БУЖАН
Што за таемнымі дзвярыма?
