Галоўная кніга адна, а ў ёй усё: і любоў, і здрада, і дараванне, і зноў любоў — з разуменнем, што чалавек слабы, але можа ўмацаваць сябе, выхаваць душу. Добра, вядома, было б жыць адразу так, як прапануюць дзесяць біблейскіх запаведзяў, каб не было што выпраўляць. Як напісана ў Слове Божым. Але ж ці ўсе чыталі?
Няма праблем пачытаць: цэлая выстава друкаваных выданняў прадстаўлена была на адкрыцці Дзён праваслаўнай кнігі ў Нацыянальнай бібліятэцы Беларусі. Выданняў сучасных, але зробленых з душой і для душы ў розных выдавецтвах: Беларускага экзархата, Свята-Елісавецінскага манастыра альбо брацтва ў гонар Архістратыга Міхаіла. Шмат выдавецтваў, якія з падобнай прадукцыяй стукаюць у сэрцы людзей і ўжо не з адной кнігай: да сучаснага чалавека мудрасць прыходзіць праз жыццяпісы святых, праз гутаркі і словы духоўных настаўнікаў, праз філасофскае асэнсаванне чалавечай гісторыі і развагі пра жыццё на прыкладах канкрэтных асоб. Кніга — больш чым чытанне. Кніга можа стаць суразмоўцай і дарадчыцай, і сябрам па жыцці.
— Усё ідзе наперад, развіваецца. Якім будзе заўтрашні дзень, вядома толькі Богу, але несумненна адно: калі чалавек будзе далучацца да духоўнай спадчыны, якую нам пакінулі нашы набожныя продкі, то гэтае развіццё будзе гарманічным, яно будзе ў міры, аднадумстве, любові і ўзаемнай падтрымцы, — епіскап Барысаўскі і Мар'інагорскі Веньямін, старшыня Выдавецкага савета Беларускай Праваслаўнай Царквы, у прывітальным слове на адкрыцці Дзён праваслаўнай кнігі засяродзіўся на традыцыі беларускай кніжнай культуры. — Сёння трэба клапаціцца, каб не знікалі тыя намаганні, якія рабіла прападобная Еўфрасіння, ігумення Полацкая, яшчэ сваімі рукамі перапісваючы кнігі і клапоцячыся аб іх распаўсюджанні. А пасля гэтую справу ўзнялі і іншыя нашы вялікія ўгоднікі Божыя: свяціцель Кірыла Тураўскі, полацкія свяціцелі Міна, Дыянісій, Сымон і іншыя. Хачу пажадаць, каб гэтая справа працягвалася ў наш час, і з яе дапамогай людзі рабіліся дабрэйшымі, чысцейшымі, больш дасканалымі, а разам з гэтым станавілася больш прыгожай наша родная краіна Беларусь.
Але каб думаць пра краіну, трэба глядзець у кожнага чалавека, які мае вырасці яе грамадзянінам. Пра выхаваўчую ролю кнігі казаў на ўрачыстым адкрыцці Дзён праваслаўнай кнігі Мітрапаліт Мінскі і Заслаўскі Павел, патрыяршы Экзарх усяе Беларусі: так, мы цяпер усе «тэхнічныя» людзі, але тэхніка толькі дапамагае чалавеку (у тым ліку рабіць кнігі), а кніга з'яўляецца сапраўднай крыніцай мудрасці. Самых лепшых у гэтай справе адзначылі ўзнагародамі. Сярод іх тыя, хто трымае сцяг асветніцтва з часоў Еўфрасінні: выдавецтва Спаса-Еўфрасіннеўскага жаночага манастыра Полацка, ці вось яшчэ выдавецкі аддзел Гродзенскай епархіі ды гістарычная камісія Выдавецкага савета Беларускай Праваслаўнай Царквы. Але ж ёсць і моладзь, якая зусім не цураецца спраў духоўных — студэнцкі часопіс «Ступени» адзначаны граматай Патрыяршага Экзарха ўсяе Беларусі.
Мінулае і сучаснасць не існуюць у адрыве адно ад другога. Дні праваслаўнай кнігі, якія праходзяць у розных гарадах, епархіях, установах нашай краіны, прымеркаваны да выхаду ў свет у 1564 годзе друкаванай кнігі «Апостала», выдадзенай Іванам Фёдаравым і Пятром Мсціслаўцам. Нам тут ёсць чым (і кім) ганарыцца. Гэта падкрэсліў і намеснік Упаўнаважанага па справах рэлігій і нацыянальнасцяў Рэспублікі Беларусь Уладзімір Ламека: праваслаўная кніжнасць прадстаўляе значную частку гісторыка-культурнай спадчыны беларускага народа.
Словы правільныя. Друкаваныя. Прамоўленыя. І нават праспяваныя: хор «Усіхсвяцкі» і святочны хор Свята-Елісавецінскага жаночага манастыра дапамаглі адчуць узнёсласць слоў.
Ларыса ЦІМОШЫК
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?