Аксаміткі ўспрымаюцца паэтам адным з сімвалаў роднай зямлі. Гэтыя садова-паркавыя расліны з простымі і махровымі суквеццямі жоўтага, аранжавага ці карычняватага колераў з канца чэрвеня і да замаразкаў напаўняюць двары і вуліцы Давыд-Гарадка, што на Століншчыне, непаўторным водарам. Ён працінае душы жыхароў, узмацняе рамантычныя ўяўленні падлеткаў і моладзі, стварае ў іх памяці незабыўнае аблічча роднага дому, казачны вобраз маленства.
Аксаміткі — любімыя кветкі Любові Аляксееўны, маці паэта (гэта адлюстравана і ў вершаваным надпісе на яе надмагіллі ў Давыд-Гарадку). Мабыць, таму, што яны нагадваюць жаночы лёс: непатрабавальныя да глебы, але пажадныя да вільгаці; на пачатку росту вельмі адчувальныя да замаразкаў, але потым, калі ўбяруцца ў сілу, не палохаюцца іх і красуюць да позняй восені; добра развіваюцца і на сонцы, і ў паўцені і выглядаюць прыгожа ў кветніках, на бардзюрах і балконах, доўга трымаюцца ў букетах і заўсёды адорваюць прыемным спецыфічным пахам.
Песня «Аксаміткі», створаная Леанідам Дранько-Майсюком і Леанідам Захлеўным у апошнім дзесяцігоддзі мінулага стагоддзя, сваёй непасрэднай шчырасцю, пяшчотнай меладычнасцю адразу закранула душы слухачоў. Вакальны твор увайшоў у рэпертуар Ігара Качагарава (першы выканаўца), Анатоля Ярмоленкі, Якава Навуменкі і з'яўляецца не толькі песняй-прысвячэннем Давыд-Гарадку. Ён мажорна, з усхваляваным замілаваннем гучыць як сынава ўслаўленне роднай зямлі, як яе лірычны гімн.
Верш Леаніда Дранько-Майсюка
Музыка Леаніда Захлеўнага
Залатыя далячыні —
Аксаміт які!
Толькі на маёй Гарыні
Краявід такі.
І давеку не сатрэцца —
На маіх губах
Застанецца, застанецца
Аксамітны пах.
Прыпеў:
Аксаміткі, аксаміткі,
Аксаміткі зноў цвітуць.
Аксаміткі, аксаміткі —
Мне да ранку не заснуць.
Я ўбачу, я пачую
Непражытыя гады.
Бо ў маёй душы начуюць
Кветкі і сады.
На Гарыні — параходы,
Лодак — поўны плёс,
А навокал — агароды,
Агароды скрозь.
На Гарыні залацістай
І ва ўсіх дварах —
Самы ясны, самы чысты
Аксамітны пах.
Прыпеў.
Не загіне, уваскрэсне
У душы святынь,
Не знікай, маё Палессе,
Не знікай, Гарынь.
Дай мне моцы, дай мне сілы,
Забяры мой страх
І пакінь мне, Божа мілы,
Аксамітны пах.
Прыпеў.
Падрыхтаваў Міхась ШАВЫРКІН
Сумесныя праекты ядзерных тэхналогій.