Вы тут

«Інтэграл» паправіў здароўе


Сёння «Інтэграл» — адно з тых прадпрыемстваў, якое апраўдала дзяржаўны грашовы ўклад на мадэрнізацыю вытворчасці. Так лічыць Міхаіл МЯСНІКОВІЧ, старшыня Савета Рэспублікі Нацыянальнага сходу Беларусі, які сустрэўся з працоўным калектывам кампаніі, а таксама падзяліўся поглядам на тое, як мусіць развівацца беларуская вытворчасць, ці варта падтрымліваць стратныя гаспадаркі, і даў свой прагноз, калі ажыве сусветная эканоміка.


Вынікі дапамогі

«Мы бачым, што мадэрнізацыя дала свае вынікі. Прадпрыемства цалкам разлічылася па крэдыце, які быў яму прадастаўлены, а таксама павялічыла аб'ём вытворчасці і выручкі», — кажа ён. Так, аб'ём вытворчасці «Інтэграла» за мінулы год перавысіў паўтара трыльёна беларускіх рублёў, а аб'ём экспарту склаў 83,5 мільёна долараў. Прадпрыемства працуе на знешнія рынкі, не толькі на Расійскую Федэрацыю, але і на Паўднёвую Карэю ды шэраг іншых краін з развітымі тэхналогіямі.

Міхаіл Мясніковіч упэўнены, што дзяржаўная падтрымка ў гэтым выпадку цалкам апраўдалася: «Дзяржава дала «Інтэгралу» магчымасць атрымаць крэдыт у памеры 30 мільёнаў еўра. Гадавы аб'ём выручкі ў два разы большы за яго! Адзінае, былі трохі зменшаны працэнты па крэдыце, бо так склалася фінансавая сістэма, што крэдыты цяпер досыць дарагія, і трэба было дапамагчы прадпрыемству абслужыць яго, з чым яно паспяхова справілася. Гэта яшчэ адно пацвярджэнне, што мадэрнізацыяй і тэхнічным пераўзбраеннем трэба займацца пастаянна».

Міхаіл Мясніковіч асобна спыніўся на Дырэктыве №3 «Аб прыярытэтных кірунках умацавання эканамічнай бяспекі дзяржавы», якая, перш за ўсё, скіравана на эканомію, і асабліва — энерганосьбітаў. Нягледзячы на пастаяннае зніжэнне энергаёмістасці валавога ўнутранага прадукту, усё ж трэба дабівацца таго, каб энергаспажыванне было ніжэйшым. Але гэты падыход павінен быць апраўданым і разумным.

— 70% беларускага імпарту — гэта прамежкавыя тавары, якія мы набываем, каб пасля апрацаваць і стварыць канчатковую прадукцыю, — патлумачыў спікер. — А з гэтага палова — прамыя энерганосьбіты. Мы набываем у Расійскай Федэрацыі каля 23 мільёнаў тон нафты за год, менш паловы ідзе на ўнутраны рынак у выглядзе нафтапрадуктаў, астатняе экспартуем і на тым зарабляем. Мы можам, вядома, адмовіцца ад 23 мільёнаў тон нафты, а набываць 12, каб знізіць энергаёмістасць, але гэта паўплывае на аб'ём экспартнай выручкі. Бо ў тым ліку за кошт гэтага маем цвёрдую валюту.

Памылкі і здабыткі мадэрнізацыі

Кажучы пра маштабы праведзенай у краіне мадэрнізацыі, старшыня Савета Рэспублікі прывёў прыклад сітуацыі з цэментнымі заводамі. Сёння іх тры, хоць хапіла б і двух. Калі прымаліся рашэнні аб мадэрнізацыі і, фактычна, новым будаўніцтве трох заводаў, тады панаваў моцны дэфіцыт цэменту. Магутнасці двух ледзь хапала, каб забяспечыць патрэбу ўнутранага рынку. А трэці, планавалася, будзе вырабляць прадукцыю на экспарт. У сувязі з падзеннем коштаў на энерганосьбіты эканомікі ўсіх дзяржаў сціснуліся, аб'ёмы спажывання сыравінных рэсурсаў значна знізіліся, патрэба ў працы трэцяга завода знікла.

Але гэта часовая з'ява, упэўнены спікер. «Па даручэнні Прэзідэнта я курырую працу Беларускага аўтамабільнага завода, і праз продаж кар'ернай тэхнікі мы можам упэўніцца, што ўсё ж такі сусветная эканоміка ўжо ажывае», — заявіў Міхаіл Мясніковіч і дадаў, што нядаўна БелАЗ выйграў тэндар і рыхтуецца заключыць кантракт на пастаўку сарака 110-тонных самазвалаў у Інданезію, якая здабывае вугаль і руды металаў.

Таксама ў працэсе падпісання кантракт на пастаўку 70 «БелАЗаў» у Кузбас, што ў Расіі. «Ужо ў студзені гэтага года мы маем кантракты больш чым на сто цяжкаважных кар'ерных машын. А раз з'явіўся попыт на самазвалы, значыць, павялічваецца здабыча вугалю і руды, а ўслед за гэтым вырастуць і аб'ёмы вытворчасці металу і іншых тавараў. Таму можна прагназаваць ажыўленне эканомікі ў найбліжэйшы час», — упэўнены ён.

Спікер даў прагноз і датычна цэн на нафту, якія ў апошні час «пацягнулі» сусветную эканоміку ўніз. На яго думку, цэны такімі нізкімі будуць нядоўга. «Хоць такія магчымасці ёсць у нафтаздабыўных дзяржаў, якія могуць працаваць на нізкіх цэнах — Саудаўскай Аравіі, Ірана, шэрагу іншых краін Персідскага заліва, дзе сабекошт здабычы вельмі нізкі. Што тычыцца кантынентальных дзяржаў або здабычы на шэльфе, то там сабекошт не 30 долараў, а значна вышэйшы. Я думаю, што ў найбліжэйшы час нафтаздабыўныя дзяржавы будуць больш уважліва глядзець на аб'ёмы здабычы, каб у пэўнай ступені праз іх уздзейнічаць на цэнавы фактар», — лічыць сенатар.

Ці трэба падтрымліваць стратныя прадпрыемствы?

Па словах парламентарыя, сёння беларуская эканоміка ў асноўным прадстаўлена буйнатаварнай вытворчасцю, і «ніхто і ніколі не будзе закрываць або драбіць вялікія прадпрыемствы». «Яны сёння канкурэнтаздольныя і могуць за кошт эфекту маштабу канкурыраваць на знешніх рынках. І, вядома ж, дзяржава павінна ствараць камфортныя ўмовы для таго, каб яны развіваліся», — лічыць старшыня верхняй палаты беларускага парламента.

Пры гэтым эканоміка Беларусі мусіць прырастаць новымі навукаёмістымі прадпрыемствамі, якія не вельмі матэрыяла- і энергаёмістыя, але даюць высокую дабаўленую вартасць. У якасці прыкладу спікер прывёў стварэнне лекаў, біяпрэпаратаў, мікраэлектронікі. У той жа час ён прызнае, што ёсць прадпрыемствы, неактуальныя сёння на рынку, і ўтрымліваць іх за кошт тых, што эфектыўна працуюць, сэнсу няма.

«Таму з банкруцтва, эканамічнай неплацежаздольнасці не трэба рабіць трагедыі. Усюды ў свеце ідзе гэты працэс: тое, што аджыло — сыходзіць. Тыя прадпрыемствы, якія выконвалі прымітыўныя аперацыі або жылі за кошт першаснай перапрацоўкі мінеральнай сыравіны — тут яшчэ трэба паглядзець, ці варта іх падтрымліваць. Таму што яны не маюць вялікай перспектывы. Яе маюць тыя, дзе высокая ўдзельная вага дабаўленай вартасці», — сцвярджае Міхаіл Мясніковіч.

З іншага боку, варта падтрымаць тых, хто ўласнымі сіламі стварае вытворчасці. Для падтрымкі такіх ініцыятыў у канцы 2015-га і быў прыняты закон аб дзяржаўна-прыватным партнёрстве.

— Гэты закон не рэйтынгавы, яго прынялі не таму, што ў свеце цяпер робіцца шмат у частцы супрацоўніцтва дзяржавы і прыватнага сектара. Гэта сапраўды заканадаўча замацаваны ўдзел прыватніка ў сферы матэрыяльнай вытворчасці. І нельга глядзець на яго як на злодзея. Прыватнік таксама працуе ў рамках прававога поля, і сёння часам нават больш эфектыўны за дзяржаўныя прадпрыемствы, — кажа старшыня Савета Рэспублікі.

Прыкладам разумнага выкарыстання магчымасцяў закона і прыцягнення замежнага капіталу можа быць стварэнне індыйскіх прадпрыемстваў у Беларусі. «Сёння мы актыўна працуем з індыйскімі кампаніямі, каб залучыць іх у Беларусь для стварэння вытворчасцяў лекаў. Індыя мае добрыя поспехі як па вытворчасці субстанцый, так і па вытворчасці гатовых лекавых формаў», — расказаў спікер. Па яго словах, у наступныя 2-3 гады ў Беларусі будуць пабудаваны як мінімум тры заводы такога кшталту з удзелам індыйскага капіталу. І толькі ў адным будзе доля беларускай дзяржавы, а ў астатніх — беларуска-індыйскі прыватны капітал.

pustavit@zviazda.by

Выбар рэдакцыі

Эканоміка

У Мінску прадаецца больш за 10 тысяч кватэр

У Мінску прадаецца больш за 10 тысяч кватэр

На другасным рынку жыллё працягвае таннець (у глабальным плане без перапынкаў) ужо з верасня мінулага года.

Грамадства

Падмануць Альцгеймера. Як захаваць ясны розум да глыбокай старасці?

Падмануць Альцгеймера. Як захаваць ясны розум да глыбокай старасці?

Няўжо гэтую цяжкую хваробу так лёгка абвесці вакол пальца?

Калейдаскоп

Разбіраем модныя мастхэвы надыходзячага сезона: чым папоўніць гардэроб?

Разбіраем модныя мастхэвы надыходзячага сезона: чым папоўніць гардэроб?

Мода вясны — 2021 прапануе некалькі глабальных кірункаў: мінімалізм, унісекс і 1990-я.