Нашым трэцім сапернікам на чэмпіянаце свету ў Санкт-Пецярбургу стала грозная Канада. Падапечныя Біла Пітэрса ў гэтым годзе яшчэ не ведаюць горычы паражэнняў, як і ў мінулым, у Празе, калі ў складзе зборнай Канады блістаў Сіднэй Крозбі. На папярэднім планетарным першынстве хакеісты «Кліновага ліста» здабылі дзесяць перамог з дзесяці, а ў фінале перайгралі расіян з лікам 6:1. Сёлета, вядома, склад у нашых сапернікаў не настолькі зорны, але яны ўсё адно паказваюць выдатны, хуткі, тэхнічны хакей. Такую гульню канадцы прадэманстравалі і ў матчы з беларускімі хакеістамі.
Лік быў адкрыты толькі напрыканцы першага перыяду, калі наша каманда была ў меншасці. Беларусаў зноў падводзілі выдаленні. Канадцы ў той вечар былі мацнейшымі ва ўсім: хуткасці, адборы шайбы, пераўзышлі па колькасці кідкоў па варотах. Вынік - 8:0 на карысць "Клінава ліста".
Гульню ў варотах пачаў Кевін Лаланд, аднак пасля пяці прапушчаных шайбаў, яго замяніў Дзмітрый Мільчакоў. Адзначым, наша каманда дазаявіла на чэмпіянат свету яшчэ аднаго гульца, ім стаў малады абаронца Мікіта Усціненка.
Арцём Дзямкоў, нападаючы зборнай Беларусі:
- Першы перыяд склаўся для нас больш менш удала, а потым наша каманда чамусьці зноў спынілася. Я не магу назваць прычыну, па якой гэта адбываецца, мы проста не змаглі размеркаваць сілы на ўсю гульню, хоць раней гэта атрымлівалася. Нягледзячы на лік, на трэці перыяд мы выходзілі з устаноўкай гуляць да канца і спрабавалі выканаць яе.
Наступны матч у нас са Славакіяй, таму мы павінны адпрацоўваць сістэму, якую будзем гуляць з імі. Паказваць характар, працаваць да канца і ісці далей.
Дзмітрый Мільчакоў, варатар зборнай Беларусі:
- Мы гулялі з трыма вельмі моцнымі сапернікамі, але безумоўна ў гэтых матчах маглі згуляць лепш, у першую чаргу ў абароне. Тым не менш, чэмпіянат свету - гэта не тры гульні, таму мы глядзім наперад, у будучыню. У матчы з Канадай з аднаго боку мне складана было выходзіць у сярэдзіне гульні, але з іншага - лік быў ужо 5:0, таму ніякага ціску не адчуваў.
Дэйв Льюіс, галоўны трэнер зборнай Беларусі:
- З боку саперніка мы ўбачылі дынамічны, разнастайны хакей, яны прадэманстравалі прыгожыя падыходы да гульні. Асабліва гэта выявілася ў другім і трэцім перыядзе, што даставіла нам шмат праблем. Я не ведаю, як у прынцыпе можна спыніць зборную Канады. Галоўнай нашай задачай было абараняць сярэдзіну пляцоўкі і пазбягаць вялікай колькасці адбору шайбы, але ў нейкі пераломны момант гэтага зрабіць не атрымлівалася.
Біл Пітэрсан, галоўны трэнер зборнай Канады:
- Гульня была вельмі добрай, на высокім спаборніцкім узроўні. Беларусаў у першую чаргу падвяла гульня ў меньшасці, але каманда Льюіса вельмі добра арганізавана, працаздольна і, я лічу, што яна яшчэ праявіць сябе ў рамках чэмпіянату.
Сумесныя праекты ядзерных тэхналогій.
