Штотыдзень у эфіры тэлеканала «Беларусь 3» гульня «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды». Ці ведалі вы, што:
Прыму́рак — выступ печы, на якім можна сядзець.
Кашта́рыс — дакумент планавання выдаткаў і прыбыткаў. Каштарыс складаюць фінансавыя супрацоўнікі.
Шчамлёткі (адно са знач.) — прыстасаванне для заціскання чаго-небудзь.
Пастро́нкі — рамяні, якія злучаюць ворчык з хамутом (пры запраганні каня).
Няўры́мслівы — які не можа супакоіцца; непаседлівы. Няўрымслівы характар, няўрымслівая натура.
Засма́глы — высахлы ад недахопу вільгаці. Засмаглыя губы.
Падмазваць пяткі — ратавацца ўцёкамі. Беларускія адпаведнікі: задаць драпака, навастрыць лыжы, даць драла, лататы, маху, цягу, стракача, ходу... Рускія: дать стрекоча, смотать удочки.
Як снег на галаву — вельмі нечакана, раптоўна. Беларусы яшчэ могуць сказаць: адкуль ні вазьміся, ні адтуль ні адсюль. Рускія: как гром среди ясного неба.
Чарговыя выпускі тэлевіктарыны глядзіце ў эфіры «Беларусь 3» раніцай кожную суботу.
Ірына АСТАШКЕВІЧ
Сумесныя праекты ядзерных тэхналогій.