Аб'яднанні працоўных — магутная сіла. Нездарма агульная колькасць членаў, што ўваходзяць у Федэрацыю прафсаюзаў Беларусі (ФПБ), — амаль палова ўсяго насельніцтва нашай краіны і 95% усіх эканамічна актыўных грамадзян. Учора кіраўнік нашай дзяржавы Аляксандр Лукашэнка сустрэўся з Міхаілам Ордам, старшынёй ФПБ, і абмеркаваў з ім шэраг важных для грамадства тэм.
Ад «пярвічкі» да кіраўніцтва
Першае пытанне, якое захацеў абмеркаваць Прэзідэнт, — гэта ўпарадкаванне структуры прафсаюзных арганізацый.
— Больш за чатыры мільёны чалавек у прафсаюзе — гэта і партыя, і грамадскі рух, — канстатаваў Аляксандр Лукашэнка. — Справа ў тым, што партыйная сістэма ў Беларусі ніякая, і штучна мы яе ствараць не будзем. Калі партыі здольныя да ўзнаўлення, умацавання, мы будзем гэты працэс падтрымліваць. Але ёсць дзве магутныя арганізацыі ў краіне: гэта прафсаюз — больш за чатыры мільёны — і грамадская арганізацыя «Белая Русь».
Па словах кіраўніка дзяржавы, прафсаюзныя арганізацыі іграюць істотную ролю ў жыцці нашага грамадства:
— Я не толькі кажу па тых пытаннях, якімі традыцыйна прафсаюзы займаліся і займаюцца, але і ўвогуле — у грамадска-палітычным жыцці. Я, напрыклад, хацеў бы гэтага. Таму для мяне вельмі важна, як ідзе структурная перабудова, пра якую мы некалі з вамі дамаўляліся. Перш за ўсё ўнізе: як ствараюцца пярвічныя арганізацыі на прадпрыемствах прыватнай формы ўласнасці, як там ідзе працэс, ці няма тармажэння. А наверсе — мы казалі пра галіновыя прафсаюзы. У нас ужо занадта іх было шмат.
Прэзідэнт нагадаў, што аб'яднанне галіновых прафсаюзаў павінна ісці на карысць.
— Паколькі, яшчэ раз падкрэсліваю, я буду значную ўвагу надаваць развіццю прафсаюзнага руху, — патлумачыў Аляксандр Лукашэнка. — Гэта наша апора. І мая, як Прэзідэнта. Я назіраю за тым, што адбываецца ў прафсаюзах.
Народны кантроль за цэнамі
Другім блокам размовы стаў удзел прафсаюзнага руху ў дасягненні найважнейшых сацыяльных мэт:
— Я бачу ў сродках масавай інфармацыі і вам удзячны за тое, што ініцыятыўным чынам вы далучаецеся да кантролю ў выкананні пастаўленых трох задач: цэнаўтварэнне, занятасць, заработная плата.
Прэзідэнт расказаў, што чуў аб ініцыятыве ФПБ арганізаваць народны кантроль за цэнамі ў магазінах.
— Усё ў справаздачах, у статыстыцы і правільна, і добра па методыках, і цэны не вельмі растуць, але ў магазінах па асноўных таварах, па асноўных прадуктах харчавання сітуацыя можа быць іншая, — прызнаў кіраўнік краіны. — Якая яна? Хто як не прафсаюз гэта лепш за ўсё ведае? Вельмі падтрымліваю гэтую ініцыятыву аб кантролі за цэнаўтварэннем — народным кантролем. Нават не цэнаўтварэннем, а за цэнамі ў гандлёвых арганізацыях непасрэдна — там, дзе людзі набываюць гэты тавар.
Аляксандр Лукашэнка таксама звярнуў увагу, што прафсаюзы заўсёды шмат увагі надавалі вырашэнню праблемы занятасці:
— І я таксама буду прасіць, каб вы ад гэтага пытання не адыходзілі. Ну і заработная плата — як вынік. Адступаць няма куды. Вы гэта разумееце не горш, чым я, паколькі сутыкаецеся кожны дзень з людзьмі, якім мы хочам падняць узровень заработнай платы. Таму гэтыя пытанні трымайце ў полі зроку.
Спартыўны пласт
Трэцяй тэмай, што паднімалася падчас сустрэчы, стаў спорт. Так, цяпер ідзе сур'ёзнае перафармаціраванне спартыўнай сферы краіны.
— Мы вельмі сур'ёзна вырашылі гэтым заняцца. Цяпер ідуць справаздачы і выбары ў федэрацыях. Спецыялісты прыходзяць да кіраўніцтва федэрацыямі. Ідэя такая, што федэрацыю павінен узначальваць спецыяліст — вызвалены чалавек.
А вось назіральныя саветы, па словах Аляксандра Лукашэнкі, узначаляць службовыя асобы высокага рангу.
Кіраўнік дзяржавы таксама заклікаў прафсаюзы больш актыўна ўдзельнічаць у развіцці вялікага спорту:
— У прафсаюзаў велізарны спартыўны пласт. Па вашых справаздачах, вы кожны год ледзь не паўтысячы выдаяце наверх спартсменаў, якія гатовы стаць вялікімі. А дзе яны? Іх не відаць. Таму тут нам таксама трэба нешта зрабіць, каб у вас цэлая галіна была. Можа быць, і не трэба нікуды іх перадаваць. А калі і перадаваць, то іх трэба весці, кантраляваць, каб мы іх не страцілі. А так вы, здаецца, 500 чалавек і перадалі, а вынікаў у вялікім спорце мы не бачым.
2018 год можа стаць Годам чалавека працы
Пасля сустрэчы з Прэзідэнтам Міхаіл Орда, старшыня Федэрацыі прафсаюзаў Беларусі, расказаў журналістам, што галоўныя пытанні падчас размовы датычыліся эканомікі.
— Мы ўнеслі прапановы па шэрагу пастаноў урада ў мэтах іх удасканалення, — паведаміў Міхаіл Орда. — У прыватнасці, пытанне па 744-й Пастанове ўрада, якая сёння вызначае фарміраванне заработнай платы. І мы сёння цалкам згодны з тым, што рост заработнай платы павінен суправаджацца ростам прадукцыйнасці працы. Адначасова мы бачым, што гэтая пастанова не ўлічвае шэрагу аб'ектыўных фактараў, якія ёсць сёння ў рабоце нашых прадпрыемстваў. Гэта і сезоннасць, і спецыфіка прадпрыемстваў. Сёння гэтая пастанова недзе падтарможвае развіццё прадпрыемстваў, а недзе нават штучна стрымлівае яго.
Старшыня ФПБ таксама паведаміў, што агучыў Прэзідэнту ініцыятыву арганізацыі: наступны год аб'явіць Годам чалавека працы. На думку Міхаіла Орды, гэта будзе садзейнічаць павышэнню прэстыжу рабочых прафесій.
Надзея ЮШКЕВІЧ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
