Летняя сесія Парламенцкай асамблеі АБСЕ, аптымізацыя ў апараце парламента, а таксама сітуацыя ў раёнах Віцебскай вобласці... Гэтыя пытанні абмяркоўваліся падчас рабочай сустрэчы Прэзідэнта нашай краіны Аляксандра Лукашэнкі і старшыні Палаты прадстаўнікоў Нацыянальнага сходу Уладзіміра Андрэйчанкі.
Праз два тыдні ў нашай сталіцы адкрыецца 26-я летняя сесія Парламенцкай асамблеі АБСЕ. Кіраўнік дзяржавы, які пацвердзіў удзел у адкрыцці сесіі, цікавіўся ходам падрыхтоўкі да мерапрыемства:
— Хацеў бы ведаць, наколькі мы гатовы да гэтага. І што я павінен? Гэта значыць, мой кавалак працы. Вы стварылі камісію і павінны былі вызначыць мой удзел у гэтым — каб я мог спланаваць свой рабочы графік.
Безумоўна, цікавіўся кіраўнік краіны і тым, як працуе парламент:
— Парламент новы. Вы — чалавек вопытны. Можаце параўноўваць, рабіць пэўныя вывады... З гэтага пункту гледжання — які парламент сёння мае наша краіна?
Працэсы аптымізацыі адбываюцца і ў Нацыянальным сходзе. Кіраўнік краіны спытаў пра іх ход і звярнуў увагу, што няправільна разумець аптымізацыю як скарачэнне штату:
— Убаку дэпутат не можа стаяць ад гэтага. Таму, натуральна, аптымізацыя закране і парламент. Яшчэ раз хачу паўтарыць: калі нехта разумее аптымізацыю толькі як скарачэнне колькасці — гэта няправільна. Важнае пытанне скарачэння фінансавання, матэрыяльных затрат на ўтрыманне той ці іншай структуры. Вось што такое аптымізацыя. Таму ў гэтай частцы парламент як глядзіцца? Ну і ў вас ёсць яшчэ нейкія пытанні — калі ласка, скажыце мне пра іх.
Асобна Прэзідэнт папрасіў Уладзіміра Андрэйчанку ўдзяляць увагу Віцебскай вобласці:
— Я б вас прасіў не сыходзіць далёка ад роднай вобласці, каб вы бачылі, што адбываецца. Тым больш што вы адтуль дэпутат.
Уладзімір Андрэйчанка расказаў, што прадстаўляе ў Нацыянальным сходзе тры раёны Віцебскай вобласці: Докшыцкі, Глыбоцкі, Ушацкі.
— Што адбываецца ў Віцебскай вобласці: вашы ацэнкі, заключэнні?.. — пацікавіўся Аляксандр Лукашэнка.
Пазней у размове з журналістамі Уладзімір Андрэйчанка расказаў:
— Перш за ўсё абмяркоўвалася пытанне правядзення 26-й штогадовай сесіі Парламенцкай асамблеі АБСЕ. Як вядома, яна пройдзе з 5 па 9 ліпеня бягучага года. Гэта будзе самае маштабнае міжнароднае палітычнае мерапрыемства ў гісторыі Беларусі. Таму Прэзідэнт паставіў вельмі сур'ёзныя задачы ў плане падрыхтоўкі і годнага правядзення гэтай сесіі. Тэматыка сесіі — умацаванне ўзаемнага даверу і супрацоўніцтва ў імя міру і квітнення ў рэгіёне АБСЕ.
Уладзімір Андрэйчанка звярнуў увагу, што наша дзяржава невыпадкова выбрана месцам правядзення гэтай сесіі. Перш за ўсё гэта атрымалася дзякуючы таму, што наша краіна робіць значны ўнёсак у падтрыманне еўрапейскай бяспекі і ў цэлым праводзіць паслядоўную і прадказальную ўнутраную і знешнюю палітыку.
— Не сакрэт, што сёння асабліва заўважны недахоп даверу — гэта галоўная прычына таго, што краіны не могуць забяспечыць для сваіх людзей такія базавыя каштоўнасці, як мір, стабільнасць і дабрабыт, — заявіў спікер Палаты прадстаўнікоў. — Таму ў цэнтры ўвагі сесіі будуць менавіта гэтыя пытанні, а таксама будзе абмяркоўвацца барацьба з тэрарызмам, арганізаванай злачыннасцю, карупцыяй, сітуацыя ва Украіне, на Бліжнім Усходзе.
Адказваючы на пытанне карэспандэнта «Звязды», як прадстаўнікі ПА АБСЕ ацэньваюць ход падрыхтоўкі, Уладзімір Андрэйчанка паведаміў: станоўча.
— Мы спадзяёмся, што сесія будзе накіравана менавіта на зняцце напружанасці, якая сёння існуе паміж дзяржавамі, на ўмацаванне ўзаемнага даверу, а не на канфрантацыю паміж дзяржавамі. Што да падрыхтоўкі, то ў нас пастаянна гэтым пытаннем займаецца сакратарыят Парламенцкай асамблеі АБСЕ. Таму яны ацэньваюць нашу ступень гатоўнасці як высокую. Думаю, тут праблем у нас не будзе.
Надзея ЮШКЕВІЧ
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
