Штотыдзень у эфіры тэлеканала «Беларусь 3» гульня «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну, а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».
Ці ведалі вы, што:
су́бар — сумесь рознага збожжа;
гічаны́ — сцёблы буракоў;
асе́ліца — наваколле паселішча;
залётнік — ахвотнік заляцацца да жанчын;
кляшта́р — каталіцкі манастыр;
накольнік — гарэза, свавольнік;
разбівацца ў блін — рабіць усё магчымае і немагчымае, каб нечага дасягнуць. (Беларусы яшчэ скажуць: вылузвацца са скуры, выцягвацца ў нітку, зямлю грызці; рускія: разбиваться в доску);
разводзіць антымоніі — весці пустыя, непатрэбныя размовы. (Беларускія сінонимы: ліць ваду, разводзіць тары-бары, малоць языком, плесці кашалі, малоць не падсяваючы, тачыць лясы, араць дарогі, біць язык аб зубы, круціць вала за хвост; рускія адпаведнікі: толочь воду в ступе, чесать язык.)
Чарговыя выпускі тэлевіктарыны глядзіце ў эфіры «Беларусь 3» раніцай кожную суботу.
Ірына АСТАШКЕВІЧ
Сумесныя праекты ядзерных тэхналогій.