Вы тут

Як стаць пераможцам у ІT-сферы?


Пра гэта ведаюць у Цэнтры юных пажарных горада Мазыра. У 1991-м — годзе заснавання — тут давалі ў першую чаргу веды па бяспечнай жыццядзейнасці, адсюль пайшла і замацавалася назва ўстановы. Ну а праз два гады ўзнік гурток па праграмаванні, які ўзначаліў у той час яшчэ студэнт Аляксей Баруноў.


Дырэктар Цэнтра юных пажарных Аляксандр БАРАВІК паказвае памяшканні, дзе і цяпер займаюцца выхаванцы. Кожны ганарыцца, калі яго здымак трапляе ў галерэю, якая размяшчаецца ўздоўж крутой лесвіцы, што вядзе ў класы. Чым вышэй — тым большыя дасягненні тых, чые выявы на фота. У аўдыторыях на паліцах — старажытныя «мышкі» і мацярынскія платы, на падлозе — гантэлі і іншыя трэнажоры для падтрымання фізічнай формы. Здагадваешся, што не «батанікі» растуць.

Педагог дадатковай адукацыі Аляксей Баруноў між тым падышоў да справы сур'ёзна. За чвэрць стагоддзя ён стварыў у Мазыры моцную школу юных айцішнікаў, якую ведаюць не толькі ў краіне, але і ва ўсім свеце. Аляксей Валянцінавіч — адзін з трэнераў абласной каманды школьнікаў па праграмаванні, шматразовы лаўрэат Спецыяльнага фонду Прэзідэнта Рэспублікі Беларусь па падтрымцы таленавітай моладзі. Пачыналі з распрацоўкі праграм для штогадовых тыдняў навукі і тэхнічнай творчасці, але хутка даведаліся пра спартыўнае праграмаванне і цяпер захапляюцца ім.

Першую сур'ёзную перамогу — 3-е месца — школьнікі з Мазыра атрымалі ў 2007 годзе. Тады Аляксей Ропан, Яўген Грыцкевіч і Аляксандр Куліцкі прывезлі «золата» Усерасійскай каманднай алімпіяды школьнікаў па праграмаванні ў Санкт-Пецярбургу. Пасля перамог і медалёў самай высокай вартасці стала значна больш. Асабліва тут ганарацца дасягненнямі Сяргея Куліка і Адама Бардашэвіча. Цяпер у мазырскага цэнтра 45 дыпломаў заключнага этапу рэспубліканскай алімпіяды па інфарматыцы, 17 дыпломаў маскоўскай Адкрытай алімпіяды школьнікаў па праграмаванні, восем дыпломаў і чатыры медалі Усерасійскай каманднай алімпіяды школьнікаў па праграмаванні, сем медалёў на міжнародных алімпіядах школьнікаў па інфарматыцы.

Некаторыя выпускнікі цэнтра ўваходзяць у лік самых моцных праграмістаў свету. Як і 25 гадоў таму, на заняткі можна прыйсці «з вуліцы». Затрымліваюцца, зразумела, не ўсе, але ж з самымі руплівымі будуць займацца індывідуальна. Бясплатна. Тут ёсць своеасаблівая іерархія. Малодшая, сярэдняя і старэйшая групы. У апошняй — тыя, хто дасягнуў вынікаў на рэспубліканскіх ці міжнародных алімпіядах. У кожнага свой тэмп навучання, ёсць складаная сістэма рэйтынгаў і матывацыі для дзяцей згодна з іх узростам. Адзнак няма, але той, хто прайшоў далей па праграме навучання, мае права заняць больш магутны камп'ютар. Рэйтынгі ўвесь час абнаўляюцца, а дзеці пастаянна спаборнічаюць паміж сабой. Часцей перамагаюць не тыя, каму ўсё лёгка даецца, а тыя, хто мэтанакіраваны і гатовы ўпарта працаваць.

Большасць былых вучняў мазырскага Цэнтра юных пажарных зараз працуе ў ІT-сферы. Яны раз'ехаліся па розных гарадах Беларусі і Расіі. А педагог Аляксей Баруноў не збіраецца кідаць свой праект і працягвае ставіць задачы перад школьнікамі, якія, магчыма, выведуць іх асабіста і ўсю нашу краіну на прынцыпова новы ўзровень.

Апошнія дасягненні:

  • У снежні на XVІІІ Усерасійскай алімпіядзе школьнікаў па праграмаванні ў Санкт-Пецярбургу дзве каманды мазыран (КЮП#1 — Дзяніс Півавараў, Аляксандр Крывашэеў, Сяргей Піскун і КЮП#4 — Іван Рэўт, Арцём Ганчарук, Вячаслаў Акуленка) атрымалі дыпломы ІІІ ступені Міністэрства адукацыі і навукі Расійскай Федэрацыі.
  • Дзяніс Півавараў заваяваў сярэбраны медаль па інфарматыцы на XІV Міжнароднай Жаўтыкоўскай алімпіядзе па матэматыцы, фізіцы і інфарматыцы, якая праходзіла з 10 па 15 студзеня ў Алматы (Казахстан).

Ірына АСТАШКЕВІЧ

іоst@zvіаzdа.bу

Выбар рэдакцыі

Спорт

Апублікаваны даведнік «Мінск» — карысны для турыстаў і падарожнікаў

Апублікаваны даведнік «Мінск» — карысны для турыстаў і падарожнікаў

Ён быў падрыхтаваны адмыслова напярэдадні II Еўрапейскіх гульняў.

Грамадства

У Полацку ўпершыню знойдзена пахаванне князя

У Полацку ўпершыню знойдзена пахаванне князя

Сярод знаходак — нямала сенсацый.

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.

Грамадства

Прэтэндэнты на студэнцкі білет здалі тэст па матэматыцы

Прэтэндэнты на студэнцкі білет здалі тэст па матэматыцы

Пазнаць у гарадскім натоўпе абітурыентаў можна без праблем.