26 Верасень, серада

Вы тут

Краіна чакае маршрутчыкаў з дагаворамі


Транспартны рынак павінен рэгулявацца, бо гэта, перш за ўсё, — бяспека людзей пры перавозках, лічаць у Мінтрансе. Галоўную задачу міністэрства сумесна з аператарамі бачыць у тым, каб дапамагчы арганізаваць перавозкі і засцерагчы пасажыраў ад небяспекі, а не правяраць маршрутчыкаў. Яны па-ранейшаму могуць заязджаць па пасажыраў у розныя населеныя пункты і спыняцца па патрабаванні, калі там маюцца адпаведныя ўмовы. Расклад руху і кошт білетаў таксама прапануе сам перавозчык.


Маршрутаў, якія зніклі, і не існавала

— Закон «Аб аўтамабільным транспарце і аўтамабільных перавозках» распрацоўваўся з 2015 года, і многія, у тым ліку і я, хацелі зрабіць яго больш жорсткім, — адзначыў намеснік міністра транспарту і камунікацый Аляксандр ШЫШКО, расказваючы пра вынікі сустрэчы ў Адміністрацыі Прэзідэнта з удзелам прадстаўнікоў перавозчыкаў. — Мы знайшлі, лічу, добрае ўзаемаразуменне з перавозчыкамі. Растлумачылі змяненні ў правілах перавозак, расказалі, як заключаць дагаворы, падаваць заяву. У кожнай вобласці аператары наладзілі прыём дакументаў, і цяпер мы чакаем актыўнага жадання перавозчыкаў на заключэнне дагавораў. У многіх рэгіёнах перавозчыкі іх ужо заключаюць.

Адмененыя сёння маршруты, на думку намесніка міністра, — тыя рэйсы, якіх фактычна і не існавала. Гэта нерэгулярныя перавозкі. А баяцца конкурсу, які будзе праведзены праз некалькі месяцаў, не варта. Гэта ў інтарэсах і перавозчыкаў, і пасажыраў, бо існуе выбар.

Вадзіцелі маршрутак змогуць прапанаваць свае расклады руху, па якіх яны працавалі. Гэта робіцца дзеля таго, каб не абмяжоўваць іх у напрацоўках, якія яны мелі, і каб ім было лягчэй уваходзіць на рынак, падкрэсліў Аляксандр Шышко. Патрабаванне адзначацца ў дыспетчара перад адпраўкай у рэйс і па прыездзе ў новым законе скіравана на тое, каб засведчыць, што перавозчык прыехаў у канцавы пункт, каб аператар ведаў, што паездка завяршылася ўдала. Пры гэтым умешвацца ў тое, як маршрутчык наладжвае работу з пасажырамі, ніхто не будзе, галоўнае, каб гэта рабілася цывілізавана.

— У Адміністрацыі Прэзідэнта мы абмяркоўвалі арганізацыю рэгулярных маршрутаў, каб транспарт быў даступны пасажырам, каб яны ведалі яго расклад і былі ўпэўнены, што аўтобус прыйдзе, яму выдадуць білет і, разлічыўшыся, чалавек атрымае страхоўку на бяспечны праезд, — паведаміў намеснік міністра. — Білет на рэйсавы рэгулярны маршрут — наша страхоўка. Такім чынам мы заключаем з перавозчыкам дагавор. Калі рэйсавы аўтобус не прыедзе, чалавек можа звярнуцца да перавозчыка, каб кампенсаваць страты. А што можна прад'явіць перавозчыку? Чэк? Гэта пацвярджэнне прыёму грошай, а не дагавор на перавозку.

На Полацк і Маладзечна

У Мінтрансе лічаць, што дзяржава дала перавозчыкам усе ўмовы для працы. Бясплатная ліцэнзія, права выбару маршруту абслугоўвання, аўтавакзалы і дыспетчарскія станцыі краіны гатовы прыняць увесь паток аўтобусаў. Дарэчы, кошт заезду адной машыны на вакзал абыходзіцца ад аднаго да чатырох рублёў. У адказ ад маршрутчыкаў патрабуюць толькі працаваць у межах закона, што, на думку Мінтранса, створыць у краіне здаровую канкурэнцыю і якаснае абслугоўванне. Лавіць несумленных кіроўцаў транспартнікі не будуць.

— У райцэнтрах рэйсавы аўтобус стаіць літаральна пару хвілін. Усе будуць паспяваць адзначыцца. Ніхто не прымушае карыстацца інфраструктурай вакзала. Заехаў, адзначыўся, паехаў, — дадаў Аляксандр Шышко. — Перавозчыкі лічаць, што пасажыры для іх, але гэта яны для пасажыраў. Калі ты зарабіў сабе добрае рэнамэ — падтрымлівай яго. Але калі камусьці не хочацца працаваць у межах закона і фіскала, гэта іх справа. Ніхто нікога не збіраецца лавіць. Будуць парушаць — на гэта ёсць падатковая інспекцыя, якая прыцягне да адказнасці за незаконную прадпрымальніцкую дзейнасць.

Прадстаўнік Мінтранса ўдакладніў, што ў здаровай канкурэнцыі ніхто нікога не выганяе. Але калі хтосьці не выконвае патрабаванні, яго месца зойме перавозчык іншай формы ўласнасці, які прыйдзе. У Мінскай вобласці, дарэчы, больш рэгулярных перавозчыкаў, чым нерэгулярных, таму тут і не здарылася такіх праблем, як у напрамку Полацка ды Салігорска.

Дарэчы, каб звязаць Мінск з Віцебскам, Полацкам ды Наваполацкам, транспартнікі выдзелілі дадатковыя аўтобусы, а з сённяшняга дня (3 сакавіка) на Полацк па чыгунцы пойдуць дадатковыя 3-4 вагоны, колькасць якіх на выхадныя пэўна будзе павялічвацца.

У дагаворы з перавозчыкам будзе прапісаны таксама абавязак мець сродак навігацыі на транспарце. «Дзякуючы яму відаць, калі аўтобус раптам сапсаваўся, а таксама і калі вадзіцель парушае правілы. Калі дыспетчар бачыць на рэгулярных перавозках, што рэйса няма з нейкай прычыны, ён на яго месца ставіць іншую машыну. У бяспецы лібералізацыі быць не павінна», — растлумачыў неабходнасць прылады намеснік міністра. Новы закон, мяркуецца, дапаможа пераадолець таксама праблему цяжкасці падліку колькасці прыватных перавозчыкаў і іх пасажыраў.

Адносна кошту білетаў, які, на думку пасажыраў, можа адразу падскочыць, калі ў пэўным рэгіёне застанецца толькі адзін перавозчык, Аляксандр Шышко заўважыў:

— Перавозчыкі маюць такі добры прыбытак, што павінны вазіць людзей у два разы танней, чым цяпер. Рухомы састаў, што з'явіўся на перавозках, добры. Значыць, былі сродкі яго набыць. Працуйце, але ўносьце свой уклад у бюджэт. На жаль, некаторыя прыйшлі на рынак перавозак, каб урваць. А мы павінны зрабіць яго такім, каб ён быў для пасажыраў. А канкурэнцыю, калі ласка, выйгравайце.

Ірына СІДАРОК

Загаловак у газеце: Заехаў, адзначыўся, паехаў

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Выхоўваць ці любіць? Шчырая размова з педагогам пра бацькоўскія страхі

Выхоўваць ці любіць? Шчырая размова з педагогам пра бацькоўскія страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.