III Міжнародныя навуковыя чытанні, прысвечаныя памяці заснавальніка беларускай школы нумізматыкі, прафесара Валянціна Рабцэвіча, адкрыюцца 16 мая ў БДУ. Удзел у іх возьмуць каля 50 навукоўцаў, даследчыкаў, нумізматаў, калекцыянераў і экспертаў з Беларусі, Расіі, Украіны, Кыргызстана, Літвы, Малдовы, Польшчы, Чэхіі і Швецыі.
Сярод дакладчыкаў — супрацоўнікі Нацыянальнага гістарычнага музея Беларусі, Дзяржаўнага Эрмітажа (Санкт-Пецярбург), Дзяржаўнага гістарычнага музея (Масква), Нацыянальнага музея Літвы, універсітэтаў Вільнюса, Санкт-Пецярбурга, Стакгольма, Харкава, а таксама прадстаўнікі Міжнароднага нумізматычнага клуба і сябры Беларускага нумізматычнага таварыства.
Запланавана работа пяці секцый: "Нумізматыка антычнасці і ранняга сярэднявечча", "Сфрагістыка, геральдыка, фалерыстыка", "Фальшываманецтва", "Грашовае абарачэнне ў XIV—XVI стагоддзях" і "Грашовае абарачэнне ў XVII-XX стагоддзях".
Асаблівая ўвага будзе нададзена пытанню падробкі грошай. Даследчыкі разгледзяць дадзеную праблему ў кантэксце розных гістарычных эпох. А працягне тэму фальшываманецтва выстаўка "Злачынныя грошы". Яе адкрыццё адбудзецца 17 мая ў Нацыянальным гістарычным музеі Беларусі (вул. К. Маркса, 12). Экспазіцыю складуць экспанаты з фондаў нумізматычнага кабінета музея гістарычнага факультэта БДУ, Нацыянальнага гістарычнага музея Беларусі, Музея крыміналістыкі Акадэміі МУС, а таксама з прыватных калекцый. На выставе можна будзе ўбачыць манеты, выпушчаныя ў розныя эпохі — ад антычнасці да сучаснасці (самая старажытная датуецца канцом IV да н.э.), а таксама банкноты, інструменты фальшываманетчыкаў і іншыя цікавыя тэматычныя экспанаты. Будуць прадстаўлены і скарбы фальшываманетчыкаў, у тым ліку Рагачоўскі скарб 1830-х гадоў
Арганізатарам чытанняў выступае гістарычны факультэт БДУ.
Рабцэвіч Валянцін Навумавіч (1934—2008) — прафесар, доктар гістарычных навук, вядомы вучоны ў галіне беларускай нумізматыкі. Аўтар кніг "Пра што расказваюць манеты" і "Нумізматыка Беларусі". Стваральнік нумізматычнага кабінета на гістарычным факультэце БДУ, асноўную частку экспазіцыі якога склала асабістая манетная калекцыя прафесара.
Надзея НІКАЛАЕВА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?