23 Верасень, нядзеля

Вы тут

АЭС будуць ахоўваць комплексы «Тор-М2»


1 чэрвеня непадалёку ад Астраўца быў урачыста адкрыты ваенны гарадок 1146 гвардзейскага зенітнага ракетнага палка. Ён будзе прыкрываць Беларускую АЭС з паветра. Станцыя знаходзіцца адсюль у зоне прамой бачнасці. 


Полк узброены зенітнымі ракетнымі комплексамі «Тор-М2», якія зусім нядаўна паступілі ў армію. Усяго адна такая машына здольна адначасова знішчыць да васьмі цэляў. 

— Полк на паўночна-заходнім кірунку выконвае задачы прыкрыцця паветранай прасторы Беларусі, — паведаміў міністр абароны Беларусі Андрэй Раўкоў. — Падчас працы агульнай сістэмы ППА полк будзе ажыццяўляць фізічнае прыкрыццё атамнай электрастанцыі, якая ўводзіцца ў эксплуатацыю ў наступным годзе. Чаму для ўзбраення выбраны менавіта комплексы «Тор-М2»? Гэты накірунак мы лічым адным з самых важных. І лагічна, што яго прыкрые найноўшая зброя.  

Акрамя таго, 1146 гвардзейскаму зенітнаму ракетнаму палку быў уручаны Баявы Сцяг. Знамянальна, што гэтая падзея ў гісторыі фарміравання адбылася ў юбілейны год Узброеных Сіл. Полк быў сфарміраваны ў 1956 годзе на базе 36-га гвардзейскага асобнага зенітна-артылерыйскага дывізіёна, які ў 1941 годзе ахоўваў Дарогу жыцця ў блакадны Ленінград.

- Уручэнне Баявога Сцяга зойме асаблівае месца ў гісторыі палка, - сцвярджае камандзір палка гвардыі падпалкоўнік Дзяніс Зык. - Тут падабраны лепшыя з лепшых ваеннаслужачых ВПС і войск ППА. У другім паўгоддзі сілы будуць скіраваны на падрыхтоўку і правядзенне тактычнага вучэння з баявой стральбой на палігоне Ашулук у Расіі.

Сімвал воінскага гонару і славы ваеннаслужачыя часці сустракалі ў новым ваенным гарадку. Ён з’яўляецца ўнікальным для нашай краіны. Будаўніцтва гарадка распачалося не так і даўно – у лютым 2016 года. Усе яго складнікі – штаб, навучальны корпус, казармы, клуб, парк машын, сталовая, пакоі вольнага часу, інфармавання – узведзены з нуля і цалкам прыстасаваны пад патрэбы цяперашняга часу.

- Навучальны корпус змяшчае ў сабе дзевяць класаў для кожнай спецыяльнасці, - гаворыць старшы памочнік начальніка штаба, капітан Аляксандр Навумчык. - Яны абсталяваны самай сучаснай камп’ютарнай тэхнікай, узорамі і макетамі ўзбраення, тэматычнымі плакатамі з асноўнымі тактыка-тэхнічнымі характарыстыкамі. На кожным камп’ютары ўстаноўлены спецыяльныя праграмы, якія рыхтуюць спецыялістаў да працы на зенітна-ракетных комплексах. Тэсты таксама праводзяцца дыстанцыйна на камп’ютарах.

Спрадвечнае жыллёвае пытанне таксама вырашаецца. Прычым вырашана абысціся без інтэрнатаў. Так, для афіцэраў палка ў Астраўцы ўзведзены 84-кватэрны службовы дом. Мяркуецца, што ўжо ў ліпені кампанію яму складзе яшчэ адзін дом, але гэтая новабудоўля будзе разлічана ўжо на 40 кватэр.

Для размяшчэння ж асабістага саставу пабудаваны новыя прасторныя і ўтульныя казармы. Побач з кожнай казармай месціцца невялікі спартыўны куток са снарадамі. Вялікая спартыўная зала нагадвае час заняткаў фізічнай культурай у школе – яна такая ж прасторная і цудоўна падыходзіць для камандных гульняў з мячом. Побач з ёй – сучасная трэнажорная зала. З дапамогай розных мудрагелістых прыстасаванняў тыя, хто хоча “цягаць жалеза”, качаюць мышцы – зусім як і ў грамадзянскім жыцці. Ёсць тут і стадыён са спецыяльнай бегавой дарожкай.

Тут жа месціцца і клуб – сучасны будынак з прасторнымі фае і вялікімі шклянымі сценамі. Яго таксама абсталявалі па-сучаснаму – велізарная глядацкая зала абарудавана мультымедыйнай і гукаўзмацняючай апаратурай. Дайшлі новыя тэндэнцыі і да бібліятэкі. Акрамя звыклага кніжнага фонду, тут ёсць і некалькі аўтаматызаваных працоўных месцаў.

- Увядзенне ў строй новага ваеннага гарадка – гэта падзея, - працягвае Андрэй Раўкоў. - Вельмі важна стварыць для воінскай часці такія ўмовы, у якой салдаты і афіцэры будуць займацца толькі баявой падрыхтоўкай, мінімальна пры гэтым адцягваючы сваю ўвагу на разнастайныя гаспадарчыя пытанні. Знакавая гэта падзея і для асабістага саставу. У такіх умовах, якія створаны тут, некаторыя байцы, пэўна, нават дома не жылі. Таму трэба, каб яны служылі добра, на радасць бацькам і славу краіне.

Валяр'ян ШКЛЕННІК

Фота Таццяны ТКАЧОВАЙ

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.