19 Жнівень, нядзеля

Вы тут

Аршанскі авіярамонтны завод стаў дзяржаўным


Адпаведную заяву ўчора зрабіў Аляксандр Лукашэнка, наведваючы дадзенае прадпрыемства.


Кіраўнік дзяржавы падкрэсліў, што ўласніка — акцыянераў украінскага публічнага акцыянернага таварыства «Матор Січ» і беларускай кампаніі «Сістэмы інвестыцый і інавацый» — тут ужо няма. Цяпер уласнікі — гэта дзяржаўныя арганізацыі. «Усе ўласнікі, якія тут былі, яны адмовіліся самі ад гэтага завода. Таму дзейнічайце. Гэта дзяржаўнае прадпрыемства з сённяшняга дня», — цытуе беларускага лідара БелТА.

Працэс вяртання прадпрыемства ва ўласнасць дзяржавы падрыхтаваны, і ўсе пытанні ў гэтай сферы павінны быць вырашаны на працягу бягучага месяца, даў даручэнне Прэзідэнт. Пры гэтым Аляксандр Лукашэнка крытычна выказаўся наконт Міністэрства транспарту і камунікацый, якое ў папярэдні перыяд самаўхілілася ад таго, што адбываецца на заводзе. Прэзідэнт падкрэсліў: тое, што ў дзяржавы не было акцый, — гэта не апраўданне. На думку беларускага лідара, галоўная задача — нармальная заработная плата ў людзей, і не важна, каму належаць акцыі.

«Завод павінен працаваць, чаго б гэта ні каштавала, — заявіў Прэзідэнт. — Заводу не толькі быць — гэты завод павінен мець перспектыву развіцця. І пакладзіце мне на стол архітэктурны праект і іншае з улікам таго, што тут робіць бізнес для пашырэння аэрапорта і іншае».

Ён дадаў, што сёння вытворчасць і мадэрнізацыя верталётаў, іх аднаўленне і рамонт даюць сапраўды добры кавалак працы, бо ў свеце такіх машын шмат.

Кіраўнік дзяржавы звярнуў увагу на сітуацыю з цяжкасцямі пры пастаўках камплектуючых і запчастак ад традыцыйных партнёраў. Па словах беларускага лідара, у такім выпадку трэба шукаць новыя варыянты, а таксама сваімі сіламі ажыццяўляць вытворчасць неабходнага. «Не трэба хадзіць і думаць, што мы нічога не можам. Трэба займацца гэтай справай, калі ёсць рынак і верталёты для рамонту і мадэрнізацыі», — падкрэсліў ён.

Магчыма, пэўная дапамога і падтрымка можа быць аказана прадпрыемству і з боку дзяржавы, дадаў Прэзідэнт.

Аршанскі авіярамонтны завод быў створаны 12 ліпеня 1941 года, са снежня 1956-га атрымаў новае месца дыслакацыі на аэрадроме Балбасава і быў перайменаваны ў 571-ы авіярамонтны завод Міністэрства абароны СССР. За гады работы на ім ажыццяўляўся рамонт верталётаў, самалётаў — як ваенных, так і грамадзянскіх. На дадзены момант прадпрыемства працягвае рамантаваць і мадэрнізаваць ваенную і грамадзянскую авіяцыйную тэхніку, а яшчэ яно займаецца рамонтам абсталявання, камплектуючых, агрэгатаў і кантрольна-праверачнай апаратуры.

З 2015 года на тэрыторыі Балбасава ствараецца мультымадальны прамыслова-лагістычны комплекс — пра гэта таксама гаварылі на сустрэчы. Рэалізацыяй праекта займаецца ТАА «Брэміна груп», тэрмін рэалізацыі — 31 снежня 2023 года.

Зараз будуецца першая чарга — аўтамабільны тэрмінал са складскім будынкам і адміністрацыйна-бытавым корпусам для размяшчэння мытных і іншых дзяржаўных службаў. Аб'ект уключае ў сябе складское памяшканне з прыбудаваным адміністрацыйна-бытавым комплексам, стаянку грузавых аўтамабіляў, а таксама сеткі інжынернай інфраструктуры.

Акрамя таго, кіраўнік дзяржавы закрануў тэму развіцця населенага пункта Балбасава, дзе і знаходзіцца завод. Аляксандр Лукашэнка запатрабаваў да 7 лістапада завяршыць работы па яго добраўпарадкаванні, а яшчэ звярнуць увагу на два фактары — сацыяльная інфраструктура і новыя рабочыя месцы. Прэзідэнт даручыў прадставіць план развіцця населенага пункта, які распрацоўваецца.

Каментарый у тэму

Міністр транспарту і камунікацый Беларусі Анатоль Сівак:

— Што датычыцца завода, то інвестыцыйны дагавор, які быў заключаны міністэрствам транспарту з інвестарамі, не развіваецца так, як хацелася б, інвестар не выконвае свае абавязацельствы.

У гэтай сувязі паўсталі пэўныя прэтэнзіі да інвестара. У частцы гэтых прэтэнзій ёсць даручэнне кіраўніка дзяржавы, што краіна павінна больш актыўна займацца гэтым заводам.

З улікам таго, што ўзлётна-пасадачная паласа знаходзіцца ў кіраванні завода, а яна павінна сёння працаваць не толькі на завод, як заводскі аэрадром, а працаваць на цэлую групу лагістычных аб'ектаў, якія тут будуюцца. Таксама было прынята рашэнне, што паласа павінна быць дзяржаўнай.

У гэтай частцы пастаўлены задачы ў кароткі тэрмін зрабіць так, каб паласа прымала любыя тыпы паветраных суднаў, у першую чаргу — грузавыя.

Генеральны дырэктар ААТ «Аршанскі авіярамонтны завод» Павел Случак:

— Прэзідэнт ацаніў бягучы стан спраў на прадпрыемстве, паставіў канкрэтныя задачы і тэрміны. Найперш — гэта істотнае павелічэнне загрузкі прадпрыемства, выхад на бясстратную працу, павелічэнне заработнай платы да нарматыўнай. І задача такая: каб да 2020 года гэта быў квітнеючы завод.

Фінансавая сітуацыя складаная, ёсць моцная закрэдытаванасць ад банкаў, ёсць дэбіторская запазычанасць. Таму рэалізацыя праектаў па рамонце тых дзесяці верталётаў, якія ўжо стаяць у ангары, дазволіць знізіць крэдытную нагрузку прыкладна на адзін мільён. Планаваныя праекты, якія таксама былі агучаны Прэзідэнту, дазволяць практычна разлічыцца з банкамі і жыць за ўласныя сродкі.

Уладзіслаў Лукашэвіч

Загаловак у газеце: Ёсць рынак — трэба працаваць

Каментары

Сначала те отжали потом государство обратно.И правильно
Хто "отжимал"? Усе акцыі ў 2011 г., самім Лукашэнкам, і былі прададзены за 20 млрд. бел. руб.

Дадаць каментар

Выбар рэдакцыі

Грамадства

Выбіраем школьную форму разам з вучнямі

Выбіраем школьную форму разам з вучнямі

Штогод «Беллегпрам» выпускае да навучальнага года сотні мадэляў адзення. 

Грамадства

Як актыўная ацэнка заахвочвае да вучобы?

Як актыўная ацэнка заахвочвае да вучобы?

Гэтым летам у Акадэміі паслядыпломнай адукацыі прайшоў ужо другі фестываль актыўнай ацэнкі.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра жніво, Мулявіна і падатковага інспектара.