Вы тут

Дзяржава скіроўвае грамадзян на індывідуальнае будаўніцтва


Па краіне колькасць свабодных участкаў перавышае колькасць чаргавікоў. Пад індывідуальныя забудовы выдзелена больш за 63 тысячы зямельных участкаў, а ў чарзе на іх стаіць 62 701 грамадзянін. З іх каля 59 тысяч — тыя, хто мае патрэбу ў паляпшэнні жыллёвых умоў. Але нягледзячы на гэтыя лічбы, сітуацыя ў Мінскім раёне складаная — не дзіўна, многія мараць стаць жыхарамі сталічнага рэгіёна.


«На 2018 год у Мінскай вобласці запланавана будаўніцтва амаль 1,1 мільёна квадратных метраў жылля. З гэтага аб'ёму 800 тысяч — гэта індывідуальнае жыллё, амаль 73 %. Калі казаць у дынаміцы, у 2015 годзе гэта было 69 %. Мы бачым, што кожны год лічба павялічваецца. Мы нарошчваем аб'ёмы індывідуальнага жылля. Пастаўлена задача — знізіць аб'ём урбанізацыі ў краіне, каб людзі пачалі жыць у малых населеных пунктах», — расказаў Вадзім Нікалаенка, намеснік старшыні камітэта архітэктуры і будаўніцтва Мінскага абласнога выканаўчага камітэта, галоўны архітэктар Мінскай вобласці, на прэс-канферэнцыі ў Доме прэсы.

У Мінскай вобласці для індывідуальных дамоў з 2009 года выдзелена амаль 29 тысяч участкаў, з іх больш за 23 тысячы для тых, хто мае патрэбу ў паляпшэнні жыллёвых умоў. Усяго ў чарзе стаіць 31 500 чалавек, 30 800 — тыя, чые жыллёвыя ўмовы нездавальняючыя. Амаль 65 % з іх жадаюць атрымаць зямлю менавіта ў Мінскім раёне.

«Мінская вобласць вялікая — 22 раёны, плюс горад Жодзіна. Але людзі хочуць жыць каля Мінска», — робіць выснову галоўны архітэктар Мінскай вобласці.

Вырашаць гэту праблему плануюць за кошт гарадоў-спадарожнікаў. І тут узнікае пытанне забеспячэння іх неабходнай інфраструктурай.

«Неабходна амаль усе ўчасткі забяспечыць мінімальнай інфраструктурай. Па-першае, гэта дарога. Хай яна будзе не асфальтаваная, а пясчана-гравійная, па якой чалавек зможа дабрацца да свайго ўчастка. Электрычнасць неабходная і вада. Гэта тры складнікі, якія павінны быць. У ідэале адразу, калі выканкам вызначыць участак для забудовы, будуць пракладзены гэтыя тры інжынерныя камунікацыі. Тады можна разгортваць будаўніцтва», — лічыць Аляксандр Аўраменка, начальнік упраўлення жыллёвай палітыкі Міністэрства архітэктуры і будаўніцтва.

Спецыяліст адзначае, што грошы з паветра не з'явяцца. І працягвае: «Ёсць такая думка — стварыць спецрахунак, куды будуць паступаць сродкі, якія атрымаюць ад продажу свабодных зямельных участкаў. І потым яны павінны ісці на развіццё інфраструктуры, а не ў агульным бюджэце раёна распыляцца».

Па словах Аляксандра Аўраменкі, неабходна рабіць упор на развіццё не проста індывідуальнага жыллёвага будаўніцтва, а і цэнтралізаванага, індустрыяльнага. Жыллё асабліва для тых, хто мае патрэбу, павінны будаваць спецыялісты, арганізацыя, якая ўсё зробіць пад ключ.

Інфраструктура ёсць, арганізацыю знайшлі, застаецца галоўнае пытанне — грошы. Тут на дапамогу прыходзяць банкі.

«Цяпер у нас кліентаў, якіх крэдытуюць на пабудову індывідуальных жылых дамоў, звыш 54 тысяч. У лідарах Брэсцкая вобласць, там іх звыш 20 тысяч. Сёння тэхналогіі дайшлі да таго, што ў горадзе Мінску існуюць падрадчыкі, забудоўшчыкі, якія прапануюць кліенту дом менш за 100 квадратных метраў, які ў прамым сэнсе перавязуць на ўчастак», — паведаміў Алег Працэнка, галоўны спецыяліст дэпартамента крэдытавання насельніцтва «Беларусбанка».

Па словах Алега Працэнкі, стаўка па крэдытах у «Беларусбанку» на нерухомасць адна з самых нізкіх на банкаўскім рынку — 13 % гадавых. Сям'і пры правільным падыходзе можна прафінансаваць да 90 % кошту будаўніцтва жылога дома крэдытам.

Марыя ДАДАЛКА

Дадаць каментар

Выбар рэдакцыі

Грамадства

Зміцер Жылуновіч. Таварыш пясняр

Зміцер Жылуновіч. Таварыш пясняр

Ён быў аўтарам Маніфеста аб абвяшчэнні Савецкай Беларусі, першым прэм'ер-міністрам рэспублікі, яго двойчы выключалі з партыі, ён мог стаць першым народным паэтам...

Грамадства

Прэзідэнт зрабіў кадравыя прызначэнні

Прэзідэнт зрабіў кадравыя прызначэнні

Аляксандр Лукашэнка даў згоду на прызначэнне рэктараў і кіраўнікоў раёнаў і прадпрыемстваў.

Калейдаскоп

Чым здзівіў Беларускі тыдзень моды

Чым здзівіў Беларускі тыдзень моды

Пазнаёміцца з навінкамі ад беларускіх дызайнераў можна было на тыдні моды, які праходзіў у Мінску з 7 да 11 лістапада.