Аб гэтым заявіў Аляксандр Лукашэнка на сустрэчы з Надзвычайным і Паўнамоцным Паслом Расійскай Федэрацыі ў Рэспубліцы Беларусь Аляксандрам Сурыкавым, які завяршае дыпламатычную місію ў нашай краіне.
У пачатку Прэзідэнт падарыў Аляксандру Сурыкаву некалькі падарункаў, галоўным з якіх стала выразаная з дрэва карта Беларусі. "Якой ты доўга служыў, сумленна служыў, – сказаў кіраўнік дзяржавы. – Дзе-небудзь павесіш, будзеш ісці міма – ўспомніш".
Беларускі лідар падзякаваў Сурыкаву за ўсё тое, што ён зрабіў для Беларусі і Расіі. На яго думку, праца дыпламата ў нашай краіне застанецца ў гісторыі значнай падзеяй. "І дай бог, каб тыя паслы, якія будуць тут працаваць, змаглі паўтарыць менавіта тое, што зрабіў пасол Сурыкаў, – падкрэсліў ён. – Калі будзе так, я буду толькі задаволены".
"Я выдатна разумею, што такое пасол і што ён усё роўна з'яўляецца чалавекам адносна несвабодным, ён адлюстроўвае пункт гледжання кіраўніцтва краіны, перш за ўсё – Прэзідэнта. Але тым не менш, як рускі чалавек, як чалавек, які нямала пражыў у той адзінай краіне – мне гэта вельмі падабалася і я гэта вельмі цаню – Аляксандр Аляксандравіч заўсёды бачыў Беларусь не як чужую, таму я і кажу: Беларусь – твая таксама, дакладна так, як і многіх беларусаў ", – падкрэсліў беларускі лідар.
Аляксандр Лукашэнка дадаў, што ведае афіцыйны пункт гледжання пасла Расіі ў Беларусі і ведае яго ўнутраны стан, калі ён кажа пра рускіх, беларусаў. "Я думаю, нашы пазіцыі супадаюць. Мы людзі, якія адбыліся ад аднаго кораня. Мы – народы аднаго дрэва, расіяне і беларусы, нікуды ад гэтага не дзецца", – дадаў кіраўнік дзяржавы.
Прэзідэнт звярнуў увагу, што ў дзвюх дзяржаў ёсць розныя інтарэсы, аднак беларускія ніколі не супярэчылі расійскім, а расійскія – беларускім. "Я нездарма гаварыў пра тое, што анёл-ахоўнік для Беларусі – Расія, дакладна так, як для Расіі – Беларусь, нягледзячы на розніцу ў велічыні. Гэта не мае ў дадзеным выпадку ніякага значэння", – сказаў беларускі лідар.
У сваю чаргу, Аляксандр Сурыкаў падзякаваў Прэзідэнту за вельмі высокую ацэнку яго працы. "Я, калі лічыць заўтрашні дзень, прапрацаваў у Беларусі 12,5 гадоў, – адзначыў дыпламат. – Гэта роўна палова тэрміну дыпламатычных адносін паміж Расіяй і Беларуссю. Паставіў, напэўна, своеасаблівы рэкорд сярод расійскіх паслоў у Беларусі. Думаю, і ў СНД, шчыра кажучы ", – дадаў ён.
Яшчэ пасол падзякаваў кіраўніку дзяржавы за канцэптуальна правільную ацэнку ўзаемаадносін дзвюх дзяржаў. "Я вельмі ўдзячны за тое, што за гэты перыяд усё-такі дзякуючы вам, Уладзіміру Уладзіміравічу, нейкімі намаганнямі нашых пасольстваў удалося, нягледзячы на шурпатасці, зблізіць пазіцыі народаў Расіі і Беларусі, – адзначыў Аляксандр Сурыкаў. – Калі ў гэтым ёсць хоць мая невялікая заслуга, то я таксама гэтаму надзвычай рады".
Акрамя таго, Аляксандр Лукашэнка дадаў, што размаўляў па тэлефоне з Прэзідэнтам Расіі. "Ён учора патэлефанаваў, у развіццё нашых дамоўленасцей у Сочы. Мы вызначыліся, калі мы сустрэнемся ў шырокім складзе, кіраўніцтва ўрада і гэтак далей. І я яму сказаў, што мы сустракаемся з Аляксандрам Аляксандравічам Сурыкавым. І я выказаў пункт гледжання наконт яго працы , – падзяліўся беларускі лідар. – Ён кажа: я вельмі рады, што ты так высока цэніш працу нашага пасла".
Нагадаем, на мінулым тыдні Уладзімір Пуцін прызначыў новага Надзвычайнага і Паўнамоцнага Пасла Расіі ў Беларусі, спецпрадстаўніка Прэзідэнта Расійскай Федэрацыі па развіцці гандлёва-эканамічнага супрацоўніцтва з Беларуссю – ім стаў Міхаіл Бабіч.
Даведка
Аляксандр Аляксандравіч Сурыкаў нарадзіўся 15 жніўня 1940 года ў Мурманску. Свой працоўны шлях пачаў у 1957 годзе ў якасці рабочага трэста "Куйбышаўтрансбуд". Адукацыя – вышэйшая, скончыў Саратаўскі політэхнічны інстытут у 1966 годзе. Пазней на розных пасадах працаваў на Заў'ялаўскім дарожна-будаўнічым участку, у "Алтайаўтадарбудзе", а таксама намеснікам старшыні Алтайскага краявога выканаўчага камітэта.
У пачатку 90-х гадоў стаў генеральным дырэктарам будаўніча-прамысловага канцэрна "Алтайбуд", пасля чаго ўзначаліў Алтайскі краявы Савет народных дэпутатаў, а пазней – Заканадаўчы сход Алтайскага краю. Да пачатку двухтысячных гадоў з'яўляўся членам Савета Федэрацыі Федэральнага Сходу Расіі, а таксама намеснікам старшыні Камітэта па бюджэце, падатковай палітыцы, фінансаваму, валютным і мытным рэгуляванні. Да 2004 года Аляксандр Сурыкаў працаваў на пасадзе кіраўніка адміністрацыі Алтайскага краю, пасля чаго два гады працаваў у якасці памочніка прадстаўніка Прэзідэнта Расіі ў Сібірскай федэральнай акрузе. З 2006 года па 2018 з'яўляўся Надзвычайным і Паўнамоцным Паслом Расіі ў нашай краіне.
Уладзіслаў ЛУКАШЭВІЧ
Фота БЕЛТА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
