90 працэнтаў юных беларусаў карыстаюцца інтэрнэтам, а 70 працэнтаў з іх заходзяць у сеціва штодня. Кіберпрастора стала неад’емнай часткай нашага жыцця. Але ці заўсёды знаходжанне дзяцей у сусветным павуцінні з’яўляецца бяспечным як для іх саміх, так і для блізкіх ім людзей? Хто хаваецца па той бок экрана? Якімі інтарэсамі і мэтамі кіруецца? Інтэрактыўная выстава для школьнікаў “Сусвет інтэрнэту” прымушае падрастаючае пакаленне пра гэта задумацца…
Выстаўка адкрылася ў Нацыянальнай бібліятэцы Беларусі. Гэта сумесны праект Міністэрства адукацыі, кампаніі МТС і дзіцячага фонду ААН ЮНІСЕФ.
“Сусвет інтэрнэту” уяўляе сабой шэсць інтэрактыўных зон. Яны прысвечаны гісторыі інтэрнэту, правілам паводзін у сеціве, бяспечнаму кантэнту і абароне асабістай інфармацыі. У гульнявой форме дзеці вандруюць ад планеты да планеты і вучацца карыстацца антывіруснымі праграмамі, генераваць надзейныя паролі, даведваюцца, як правільна кантактаваць у інтэрнэце, у тым ліку з незнаёмымі людзьмі, якую інфармацыю аб сабе можна пакідаць, а якую нельга размяшчаць у сацыяльных сетках.
Напрыканцы касмічнай вандроўкі дзяцей чакае кібертэст.
— Сёння віртуальная прастора становіцца ўсё больш “рэальнай”. Асабліва ярка гэта праяўляецца сярод дзяцей і падлеткаў, якія вольны час усё часцей праводзяць у інтэрнэце, і аддаюць перавагу не жывым стасункам, а абмену паведамленнямі ў сацыяльных сетках, — канстатуе дырэктар Галоўнага інфармацыйна-аналітычнага цэнтра Мінадукацыі Павел ЛІС. — Ва ўмовах усёпранікальнага працэсу лічбавай трансфармацыі немагчыма і бессэнсоўна пастаянна кантраляваць паводзіны дзяцей у сеціве, але ў нашых сілах зрабіць іх знаходжанне ў інтэрнэце больш бяспечным з дапамогай ненавязлівых адукацыйных праектаў. Інтэрактыўная выстава “Сусвет інтэрнэту” дазваляе данесці да хлопцаў і дзяўчат базавыя прынцыпы бяспечных паводзінаў у інтэрнэце ў цікавай і даступнай гульнявой форме.
— МТС — кампанія, дружалюбная дзецям. Выстава “Сусвет інтэрнэту” — гэта працяг праекта “Дзеці ў інтэрнэце”, які мы рэалізуем ужо больш за пяць гадоў. Для нас тэма бяспечнага інтэрнэту для дзяцей — стратэгічна важная, — падкрэслівае генеральны дырэктар МТС Уладзімір КАРПОВІЧ. — Гэта яшчэ адно пацверджанне прыхільнасці нашым каштоўнасцям і памкненням — мы хочам, каб сучасны свет інавацый і тэхналогій быў даступным, але, самае галоўнае, бяспечным для школьнікаў і моладзі. Дзякуючы супрацоўніцтву з Міністэрствам адукацыі і ЮНІСЕФ мы будзем імкнуцца дапамагаць дзецям выкарыстоўваць сучасныя тэхналогіі граматна і з карысцю, умацоўваць веды маладога пакалення ў галіне кібербяспекі, працаваць з тэмай кібербулінга, вучыць сеткаваму этыкету. Упэўнены, што аб'яднаўшы нашы намаганні, мы зможам зрабіць сучасны свет больш бяспечным для нашых дзяцей.
“Як паказала апошняе даследаванне ЮНІСЕФ, у Беларусі часцей за ўсё з булінгам у інтэрнэце сутыкаюцца падлеткі 13-17 гадоў. Інтэрактыўная выстава, якую мы запускаем, дапаможа ім разабрацца ў тым, як правільна паводзіць сябе ў той ці іншай складанай сітуацыі, і будзе садзейнічаць зніжэнню ўзроўню кібергвалту. Я б хацеў падзякаваць нашым партнёрам з МТС і Міністэрства адукацыі за прадуктыўную сумесную працу, бо менавіта такое дзяржаўна-прыватнае партнёрства ў інтарэсах дзяцей дапаможа ўнесці эфектыўны ўклад у дасягненне агульнасусветных Мэтаў ўстойлівага развіцця”, — падкрэсліў прадстаўнік Дзіцячага Фонду ААН ЮНІСЕФ у Беларусі доктар Рашэд Мустафа Сарвар.
Арганізатары збіраюцца ў рамках выставы правесці апытанне дзяцей на тэму кібербулінгу. Атрыманыя дадзеныя дапамогуць ацаніць сітуацыю, а ў будучыні стануць падмуркам для розных мерапрыемстваў, накіраваных на павышэнне бяспекі дзяцей у кіберпрасторы.
Наведаць выставу “Сусвет інтэрнэту” у Нацыянальнай бібліятэцы бясплатна змогуць усе жадаючыя: дзеці, бацькі і педагогі. Для гэтага трэба зарэгістравацца на сайце праекта. Рэгістрацыя адкрыецца 10 верасня. Арыенціровачны час правядзення інтэрактыўнай экскурсіі складае адну гадзіну. Дакладна вядома, што выстава будзе працаваць у Нацыянальнай бібліятэцы да канца кастрычніка, але час яе работы можа быць прадоўжаны. Усё будзе залежыць ад таго, наколькі праект будзе цікавы дзецям, бацькам педагогам і грамадскасці. Затым яна адправіцца ў абласныя цэнтры Беларусі. Мяркуецца, што за 2019 год выстаўка “Сусвет інтэрнэту” наведае ўсе абласныя цэнтры краіны.
Гісторыя праекта:
Інтэрактыўная выстава “Сусвет інтэрнэту” працягвае праект “Дзеці ў інтэрнэце”, які кампанія МТС рэалізуе ў рамках пагаднення з Міністэрствам адукацыі Рэспублікі Беларусь пры падтрымцы ГІАЦ Мінадукацыі. За час праекта бяспечным паводзінам у Сеціве навучана больш за 8 500 школьнікаў. Урокі прайшлі ва ўсіх абласцях краіны і шматлікіх раённых цэнтрах.
Надзея НІКАЛАЕВА
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.