Вы тут

У Высокім Камянецкага раёна прайшлі абласныя дажынкі


Першай у краіне дажынкі адсвяткавала Брэсцкая вобласць. Самы заходні гарадок самага заходняга рэгіёна рэспублікі сустрэў удзельнікаў абласнога фестывалю-кірмашу надзвычай убраным і прыгожым.


Інфраструктура былога райцэнтра гадамі абнаўлялася па астаткавым прынцыпе. Дайшло да таго, што гадоў з дзесяць таму гараджане сталі збіраць подпісы за ўваходжанне пяцітысячнага горада ў склад Брэсцкага раёна. Вось тады на Высокае звярнулі ўвагу. Многае было зроблена па мадэрнізацыі, рамонце аб'ектаў за апошнюю пяцігодку. Але перад святам у Высокае зноў уклалі добрыя грошы. Фактычна за паўгода добраўпарадкавалі вуліцы, цэнтральную плошчу, сквер. Адрамантавалі дарогі і дамы. Другое дыханне атрымалі Цэнтр дадатковай адукацыі дзяцей і моладзі, дзіцячы садок, гарадскі Дом культуры, музычная школа, бальніца і паліклініка.

І менавіта з падзякі за гэту вялікую работу ў невялікім гарадку пачаў сваё выступленне на дажынках старшыня Брэсцкага аблвыканкама Анатоль ЛІС. Губернатар падкрэсліў, што свята адыдзе ў гісторыю, а ўсё пабудаванае і рэканструяванае застанецца на доўгія гады. Кіраўніцтва ж вобласці мае намер працягваць практыку правядзення дажынак у малых гарадах.

Сцяг дажынак даверылі ўзняць найлепшаму ў гэтым сезоне камбайнеру — Аляксандру Юшчуку з ААТ «Камароўка» Брэсцкага раёна. Не нашмат адсталі ад лідара Сяргей Бурак з ААТ «Жарабковічы» Ляхавіцкага раёна і Аляксандр Кіндрук з ААТ «Дварэцкі» Лунінецкага раёна. Героямі дня сталі таксама кіроўцы, аператары зернесушыльных комплексаў, спецыялісты і кіраўнікі сельгаспрадпрыемстваў. І ўпершыню за доўгія гады пераможцам спаборніцтва ў вытворчасці збожжа прызнаны Лунінецкі раён. А самы важкі каравай па агульным намалоце ўжо не першы раз атрымаў Баранавіцкі раён.

Усе, ад кіраўніка вобласці да механізатара, адзначалі бягучы год як надзвычай складаны для земляробаў, таму і не ўдалося дасягнуць леташніх паказчыкаў ураджайнасці. Але і атрыманыя 29 цэнтнераў збажыны з гектара ў гэтай сітуацыі выглядаюць дастойным вынікам, тым больш што гэта найлепшы вынік сярод абласцей краіны.

Увогуле, людзей сабралася шмат — думаю, што насельніцтва горада ў суботу павялічылася амаль удвая. Кірмаш парадаваў разнастайнасцю пачастункаў ды напіткаў. На кожнай з загадзя падрыхтаваных пляцовак праходзілі канцэрты, гучала музыка. Самадзейныя артысты адзначылі свята ўраджаю ўдарнай працай. Не смешачкі вам: цэлы дзень радаваць публіку выступленнямі. І галоўны канцэрт на цэнтральнай плошчы, і невялікія імправізаваныя прайшлі на ўзроўні.

Да святкавання арганізатары прымеркавалі адкрыццё гандлёвага цэнтра «Санта Рытэйл» па вуліцы Сацыялістычнай і пляцоўкі міні-футбольнага поля са штучным пакрыццём на школьным стадыёне. І гэта ўдала ўпісалася ў праграму: урачыстыя цырымоніі пераразання стужак апладысментамі падтрымалі шматлікія гледачы.

Цікава, што на свята ў Высокае прыехала многа жыхароў Брэста. Самыя актыўныя потым дзяліліся ўражаннямі проста ў зале аўтавакзала. Аказваецца, яны ездзяць на падобныя мерапрыемствы з ахвотай. (Былі і на Дні пісьменства ў Іванаве тыдзень таму.) Праўда, чакаць транспарту ім даводзіцца доўга і дабіраюцца з праблемамі. Не дадумаліся арганізатары пусціць некалькі дадатковых аўтобусаў у абласны цэнтр. Варта ўлічыць гэта на наступных дажынках.

Святлана ЯСКЕВІЧ

Загаловак у газеце: Будзем з хлебам!

Выбар рэдакцыі

Спорт

Тры медалі ў беларусаў на этапе Кубка свету па скачках на батуце

Тры медалі ў беларусаў на этапе Кубка свету па скачках на батуце

Больш за 150 спарт­сме­наў з 36 кра­ін све­ту — гэта са­мыя моц­ныя ба­ту­тыс­ты су­час­нас­ці. 

Грамадства

Што шукаюць сем'і, якія едуць да айца Валерыяна ў пасёлак Смілавічы?

Што шукаюць сем'і, якія едуць да айца Валерыяна ў пасёлак Смілавічы?

Звязацца з храмам у гонар Георгія Перамаганосца, дзе служыць айцец Валерыян, можна па тэлефоне, які няцяжка знайсці ў інтэрнэце. 

Эканоміка

На «ТІБО-2019» Белпошта паказала новыя тэхнічныя цікавінкі

На «ТІБО-2019» Белпошта паказала новыя тэхнічныя цікавінкі

Якія неўзабаве ўвойдуць у прафесійны побыт.

Грамадства

Пастырскае Пасланне Мітрапаліта Тадэвуша Кандрусевіча на Вялікдзень

Пастырскае Пасланне Мітрапаліта Тадэвуша Кандрусевіча на Вялікдзень

Глыбокапаважаныя святары, кансэкраваныя асобы, браты і сёстры!