Спецыяльны фармат "Карты госця", брэндаваны для II Еўрапейскіх гульняў, плануецца выпусціць да 1 снежня, паведаміў сёння ў прэс-цэнтры БЕЛТА дырэктар УП "Мінгардаведка" Барыс Васільеў.
Праект "Карта госця" рэалізуе прадпрыемства "Мінгардаведка" са студзеня 2018 года пры падтрымцы міністэрстваў спорту і турызму, культуры Беларусі, інфармацыйна-турыстычнага цэнтра "Мінск". Усяго выпушчана каля 6 тыс. карт, з якіх рэалізавана больш за 700. На думку Барыса Васільева, гэта нядрэнныя вынікі. "Напрыклад, "Карта госця Санкт-Пецярбурга", якая існуе ўжо восем гадоў, на трэці год прадавалася ў колькасці 3 тыс. у год пры 7 млн турыстаў", - адзначыў ён.
Часцей за ўсё "Карту госця" купляюць госці з Расіі, а таксама грамадзяне ЕС. Але ў апошні час і прадстаўнікі Кітая, Японіі, ЗША сталі набываць прадукт. "Праект развіваецца. Калі ў пачатку сезона ў ім было прадстаўлена 74 аб'екта, у тым ліку каля 25 музеяў, цяпер больш за 200. Прычым колькасць музеяў і галерэй павялічылася з 55 больш чым да 90", - сказаў Барыс Васільеў.
На працягу першага сезону спецыялісты УП "Мінгардаведка" сумесна з навукоўцамі прааналізавалі турыстычныя асаблівасці рэгіёну, патрэбы самастойных турыстаў. Даследаванні паказалі перспектыўнасць праекта для развіцця унутрыкраіннага міжрэгіянальнага турызму. З улікам гэтага ён уключаны ў Рэспубліканскую праграму мерапрыемстваў па правядзенні ў Беларусі Года малой радзімы ў 2018-2020 гадах. Распрацоўваюцца міжрэгіянальныя фарматы "Карты госця", прызначаныя спецыяльна для жыхароў Беларусі. "Мы арыентаваны на індывідуальных турыстаў і прапануем ім варыянты паездкі са зніжкамі і бонусамі, інфармацыяй пра славутасці ва ўсіх рэгіёнах краіны. Фармат карты на год ідэальна падыходзіць тым, хто любіць падарожнічаць па краіне", - лічыць Барыс Васільеў.
"Карту госця Мінска" можна купіць у пяці фарматах - VIP, Прэміум, Люкс, Бізнес і Эканом, выдаткаваўшы ад Br5,5 да Br69. Сярод замежнікаў у першую чаргу попытам карыстаецца фармат VIP, які дае права безлімітнага праезду ў транспарце і бясплатнага наведвання дзевяці музеяў і заапарка. Беларусы часцей бяруць карты, якія танней. Таксама яны адрозніваюцца па часе дзеяння - на 24 гадзіны, двое, трое, пяць, сем, дзесяць сутак, на 12 месяцаў. Тут гаворка ідзе пра бясплатнае або са зніжкамі наведванне музеяў, на ўсіх іншых аб'ектах бонусы захоўваюцца на працягу трох гадоў.
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.