Вы тут

Фільм «Удовы» паказвае, як жанчыны вырашаюць свае праблемы


Вы думалі, што тут павінна разыграцца чарговая відовішчная гісторыя пра спланаванае і зладжанае абрабаванне, але ў фільме «Удовы» без трукаў і гламуру паказана вельмі мудрагеліста закручаная драма, у якой задзейнічаны тры ўдавы, злачынец-здраднік, брудная палітыка, адносіны бацькоў і дзяцей, сямейныя трагедыі і здольнасць сябраваць. Гэта ж Стыў МакКуін — аўтар адзначанага ў Канах «Голаду» і карціны «Сорам» з Майклам Фасбэндэрам у галоўнай ролі ды аскараноснага фільма «12 гадоў рабства». Чарговая гісторыя жаночага абрабавання, толькі, на шчасце, не ў традыцыйным выглядзе прыгодніцкага фільма, ідзе ў пракаце.


Колькі тут усяго намешана: і прыватнага, і замалёвачнага пра амерыканскае жыццё, і абыгрывання стэрэатыпаў — толькі абрабаванне становіцца не мэтай карціны/герояў/сюжэта, а іх інструментам. Ніякіх адрэпеціраваных і філігранных рухаў, зладжанай каманды, духу авантурызму, рамантызацыі рабавання, каштоўных камянёў і калье. Галоўныя гераіні аказаліся перад неабходнасцю ўзяцца за справу, калі іх мужчыны памерлі падчас спробы ўкрасці два мільёны долараў, і адной з іх — Вероніцы, якую іграе Віёла Дэвіс, — выставілі адпаведны рахунак. Перад неабходнасцю, трэба падкрэсліць.

У адной з акруг Чыкага ёсць дзве кандыдатуры на пост олдэрмена: Джэк Маліган (Колін Фарэл), што паходзіць з сям'і палітыкаў і пераймае сваю палітычную кар'еру ад бацькі ў спадчыну, і разбойнік-афраамерыканец Джамал Мэнінг (Браян Тайры Генры), які хоча пачаць новае жыццё і атрымаць магчымасць рэальнага ўплыву на людзей. Ёсць тут таксама і вядомы злачынец Гары Роўлінгс (Ліям Нісан) — муж Веронікі, — які аднойчы днём вырашае ўкрасці два мільёны ў Джамала Мэнінга і быццам памірае. Увогуле ўсе яны ў пэўным сэнсе злачынцы.

Карціна раскрывае свае сакрэты паступова, і тое, што падавалася звычайнай прыгодай, абарочваецца фільмам з даволі шматгранным сюжэтам. І ў гэтым сюжэце хапае сюрпрызаў, у тым ліку эмацыянальных для гледача, настолькі ў розныя цэлі мецяць эпізоды.

Працэс падрыхтоўкі і ўласна рабавання ў фільме займае даволі нязначнае месца, усё нават амаль абышлося без пафасных жыццесцвярджальных фраз — экран занялі разлад, спрэчкі і першапраходніцтва ва ўсім, што пацягнула за сабой некаторую вуглаватасць і недарэчнасць. На першы план вышлі якраз асабістыя перажыванні адзінокіх жанчын, вымушаных змагацца за існаванне ў новым для іх свеце з новымі правіламі. І драма паміж Веронікай і яе памерлым мужам Гары, які аказаўся кардынальна не тым, кім падаваўся.

«Удовы» выглядаюць вельмі спагадлівымі сучаснай рыторыцы, таму яшчэ цікавей разглядаць іх у кан'юнктурным кантэксце. Прычым карціна вызначаецца не такімі відавочнымі і простымі рашэннямі, якія прадэманстраваў, напрыклад, фільм «8 сябровак Оўшэна», зноў жа пра абрабаванне, у адказ сучасным павевам ператвораны са знакамітых «сяброў Оўшэна».

Так, «Удовы» таксама, свядома альбо не, адказваюць эпосе #MeТoo: невыпадкова амаль кожны мужчына ў фільме — адмоўны персанаж, а амаль кожная жанчына — церпіць ад правілаў, што той устанаўлівае. Адну з удоў яе мужчына біў, у другой браў і прагульваў грошы, ну а ўчынкі трэцяга і галоўнага з іх Гары Роўлінгса ўвогуле перавернуць усё з ног на галаву. Не выклікае спачування і Джэк Маліган, што, апроч іншага, «вымалёўвае «вобраз амерыканскай палітыкі і пяць мільёнаў долараў «адкатаў», якія стануць мэтай рабаўнікоў (што сімвалічна неяк аблягчае злачынства галоўных гераінь, бо грошы трапілі ў сейф палітыка незаконным шляхам). Пэўны стэрэатып абыгрываецца і ў бандзе Джамала Мэнінга, што займаецца разбоем, — яны, канешне, афраамерыканцы.

Шматзначны і склад галоўных гераінь, які падкрэслівае мультыкультурную Амерыку і таксама — ці то з іроніяй, ці то не — выкарыстоўвае стэрэатыпы. Адна з удоў Эліс паходзіць з Польшчы — яна прыгожая, вызначаецца лёгкасцю на пад'ём і выкарыстоўвае сваю прыгажосць, каб зарабіць грошы эскортам. Іспанскамоўная Лінда мае вялікую сям'ю, вынаходлівасць і тэмперамент. У Веронікі — афраамерыканкі — даволі сілы, каб пайсці найскладанейшым шляхам і правярнуць абрабаванне па схеме свайго мужа.

Усё ў выніку тэарэтычна пачалося са злачынстваў палітыка і рукамі жанчын, што праз абрабаванне ўстанавілі пэўную справядлівасць, на ім жа закальцавалася. Такім чынам у цалкам прагнілы свет, дзе тыя, хто мае ўладу, уступаюць у змовы з адкрытымі крыміналамі, дзе ўсё вырашаюць вялікія сумы, а шчырасці не засталося ні ў публічным жыцці, ні ў прыватным, жанчыны прынеслі пэўны баланс. І пайшлі дапамагаць бедным і бібліятэкам.

У пракаце фільм можна паглядзець да 19 снежня.

Ірэна КАЦЯЛОВІЧ

Загаловак у газеце: Сапраўдная сіла ў безвыходнасці

Выбар рэдакцыі

Грамадства

Пераможца «Жанчыны года-2018»: З трыма дзецьмі можа справіцца кожная пара

Пераможца «Жанчыны года-2018»: З трыма дзецьмі можа справіцца кожная пара

Тры гады таму прозвішча Трыкоза ўжо было на слыху.

Грамадства

Мэр Брэста Аляксандр Рагачук: Дзеці ў пясочніцах на касцях гуляць не будуць

Мэр Брэста Аляксандр Рагачук: Дзеці ў пясочніцах на касцях гуляць не будуць

Кіраўнік Брэсцкага гарвыканкама адмеркаваў рэзанансную тэму раскопак на тэрыторыі гета.

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.