Вы тут

Прэзідэнт — школьнікам: Вы будзеце стаяць на варце дзяржаўных інтарэсаў


У Дзень Канстытуцыі Беларусі Аляксандр Лукашэнка ўручыў пашпарты 25 вучням сярэдніх школ і гімназій. Упершыню гэта падзея адбылася ў Палацы Незалежнасці.


"Гэтае свята, якое мы адзначаем ужо не першы год, асаблівае. І вы ведаеце, чаму. Таму што сёння мы адзначаем 25-годдзе Асноўнага Закона нашай краіны і з гэтай нагоды лепшым з лепшых уручаем пашпарты грамадзян Рэспублікі Беларусь. Вы становіцеся законнымі, самымі паўнапраўнымі, самымі сапраўднымі грамадзянамі нашай краіны", — падкрэсліў беларускі лідар.

Пашпарты сёння ўручаюцца тым, хто ў свае 14 гадоў ужо дабіўся вялікіх поспехаў у вучобе, спорце, грамадскім жыцці, стаў гонарам бацькоў, а значыць — гонарам нашай краіны, адзначыў Аляксандр Лукашэнка. І сімвалічна, па меркаванні Прэзідэнта, што ў той год, калі яны з'явіліся на свет, маладой беларускай дзяржаве таксама споўнілася роўна 14 гадоў.

"Бачыць сёння вас, такіх мэтанакіраваных, паспяховых, таленавітых — дастойных дзяцей нашай суверэннай Беларусі — шчасце, не толькі для вашых бацькоў — для ўсяго нашага беларускага народа і, перш за ўсё, для мяне. Для ўсіх, хто стаяў ля вытокаў стварэння незалежнай краіны, вы — самая вялікая каштоўнасць", — адзначыў ён.

Прэзідэнт звярнуў увагу, што ў кожным з прысутных увасабляецца шматвекавая мара нашых продкаў — быць гаспадарамі на сваёй зямлі. Для ўдзельнікаў цырымоніі гэтая мара стала рэальнасцю, паколькі сёння яны вывучаюць гісторыю краіны і, напэўна, разумеюць, якое гэта шчасце — нарадзіцца і жыць у моцнай і незалежнай дзяржаве.

"Безумоўна, вы і вашы равеснікі — пакаленне новай фармацыі. І па сваім светапоглядзе вы грамадзяне свету", — сказаў Прэзідэнт.

Аляксандр Лукашэнка таксама звярнуў увагу, што лічбавая рэальнасць, якая стала часткай паўсядзённага жыцця падлеткаў, даўно сцёрла геаграфічныя межы і бар'еры ў зносінах, такія як адлегласць, культурныя і моўныя адрозненні. Але яны заўсёды павінны памятаць — іх Радзіма, іх дом — Беларусь. На яго думку, сувязь з роднай зямлёй, сваімі каранямі — гэта тое, што будзе заўсёды карміць іх жыватворнай энергіяй, даваць сілы на выкананне самых запаветных жаданняў.

"Сёння асаблівы дзень. Атрымліваючы пашпарт, вы робіце першыя крокі ў дарослае жыццё. Гэты дакумент сімвалізуе пачатак новага этапу абсалютна самастойнага жыцця, насычанага цікавымі і значнымі падзеямі. У тым ліку і палітычнымі, — падкрэсліў Аляксандр Лукашэнка. — Пройдзе зусім няшмат часу, і вы ўжо будзеце прымаць важныя рашэнні ў гісторыі Беларусі, стаяць на варце дзяржаўных інтарэсаў. Будзеце ствараць будучыню краіны, думаць пра яе дабрабыт, аб тым, што пакінеце сваім дзецям. А значыць, зробіце ўсё магчымае, каб захаваць нашы духоўныя каштоўнасці, культурны здабытак і, самае галоўнае, мір на сваёй зямлі".

Кіраўнік дзяржавы выказаў упэўненасць, што так і будзе, што наша родная Беларусь заўсёды будзе ў надзейных руках.

"І хай пашпарт і кніга з сімвалічнай назвай "Я грамадзянін Рэспублікі Беларусь", якія сёння будуць вам урачыста ўручаны, стануць апорай і парадай у вашым доўгім, шчаслівым і напоўненым вялікімі справамі жыццёвым шляху", — дадаў Прэзідэнт.

Пасля адбылася цырымонія ўрачыстага ўручэння пашпартоў грамадзяніна Беларусі.

Потым школьнікам правялі экскурсію па Палацу Незалежнасці.


“Прэзідэнт — ён такі ж, у прынцыпе, як і мы” — уражаннi дзяцей, якія атрымалі пашпарты

Як распавяла журналістам вучаніца гімназіі з гарадскога пасёлка Глуск Дар'я Камінская, уражанні ад сустрэчы з Прэзідэнтам і атрымання пашпарта ў яе вельмі добрыя. "Нават словамі немагчыма апісаць. Прэзідэнт — ён такі ж, у прынцыпе, як і мы. Ён такi добры ў зносінах, вельмі прыемна было размаўляць з ім, нават пару слоў віншаванняў. Уражанні вельмі моцныя", — падзялілася яна.

Школьніца дадала, што асабліва хвалявалася ў дзень, калі даведалася пра будучую сустрэчу з Аляксандрам Лукашэнкам. Потым стала спакайней, але асаблівае трапятанне ў яе выклікаў момант перад самым уручэннем. "Далонькі пацеюць", — з усмешкай патлумачыла Дар'я Камінская.

Яна станоўча ацаніла і экскурсію па Палацу Незалежнасці, асабліва адзначыла асабісты кабінет кіраўніка дзяржавы. На яе думку, сам Палац выдатна падыходзіць для мерапрыемстваў любога маштабу.

Вучань Глушанскага вучэбна-педагагічнага комплекса (Бабруйскі раён) Максім Пархімчык трапіў на гэтую цырымонію, таму што ён выдатна вучыцца і часта ўдзельнічае ў алімпіядах па фізіцы і матэматыцы.

Эмоцыі ад атрымання пашпарта ў хлопца выдатныя. "Толькі фатаграфія ў пашпарце, шчыра кажучы, не вельмі атрымалася, — са смехам сказаў школьнік. — Але я вельмі рады, што Прэзідэнт асабіста ўручыў мне гэты дакумент. Вядома, я гэтага не чакаў. Калі я даведаўся, што кіраўнік дзяржавы будзе ўручаць мне пашпарт, я быў у шоку".

Вучаніца сярэдняя школы №7 г. Барысава Ганна Кісялёва адзначыла, што адчувае гонар, радасць і шчасце ад таго, што трапіла ў Палац Незалежнасці і атрымала пашпарт ад Аляксандра Лукашэнкі. "Так пашанцавала, што менавіта нам — 25 з тысяч дзяцей, якія атрымліваюць пашпарт, — выпала ўдача атрымаць пашпарт з рук кіраўніка дзяржавы. Мы запомнім гэтую падзею на ўсё жыццё", — сказала яна.

Школьніца таксама асабліва адзначыла кабінет Прэзідэнта — па яе словах, у ім адчуваецца ўлада і палітыка.

Уладзіслаў ЛУКАШЭВІЧ

Фота БЕЛТА

Выбар рэдакцыі

Грамадства

Пераможца «Жанчыны года-2018»: З трыма дзецьмі можа справіцца кожная пара

Пераможца «Жанчыны года-2018»: З трыма дзецьмі можа справіцца кожная пара

Тры гады таму прозвішча Трыкоза ўжо было на слыху.

Грамадства

Мэр Брэста Аляксандр Рагачук: Дзеці ў пясочніцах на касцях гуляць не будуць

Мэр Брэста Аляксандр Рагачук: Дзеці ў пясочніцах на касцях гуляць не будуць

Кіраўнік Брэсцкага гарвыканкама адмеркаваў рэзанансную тэму раскопак на тэрыторыі гета.

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.