Вы тут

Хто будзе прадстаўляць інтарэсы выбаршчыкаў?


Рэгістрацыя кандыдатаў у члены Савета Рэспублікі сёмага склікання пройдзе ў Беларусі 9—13 кастрычніка, а рэгістрацыю кандыдатаў у дэпутаты Палаты прадстаўнікоў Нацыянальнага сходу сёмага склікання правядуць акруговыя выбарчыя камісіі 8—17 кастрычніка.


Да гэтага часу ва ўсіх абласцях і ў Мінску адбылося вылучэнне прэтэндэнтаў на месцы ў верхняй палаце парламента. Такім правам валодаюць прэзідыумы мясцовых Саветаў дэпутатаў базавага ўзроўню і адпаведныя выканкамы, а ў сталіцы — прэзідыум Мінгарсавета і Мінгарвыканкам.

Галасаванне па зарэгістраваных ЦВК кандыдатах у сенатары праходзіць на пасяджэннях дэпутатаў мясцовых Саветаў базавага ўзроўню, Мінгарсавета. Абраным лічыцца кандыдат, які набраў больш за палову галасоў.

Нагадаем, што Савет Рэспублікі — палата тэрытарыяльнага прадстаўніцтва. Парадак яе фарміравання спалучае элементы выбарнасці і прызначэння. Па восем членаў абіраюцца ад кожнай вобласці і Мінска шляхам тайнага галасавання, яшчэ восем сенатараў прызначае Прэзідэнт. Усяго ў склад верхняй палаты парламента ўваходзіць 64 чалавекі.

Што датычыцца рэгістрацыі кандыдатаў у дэпутаты Палаты прадстаўнікоў, то яна таксама ўжо распачалася. Кандыдатамі ў дэпутаты Палаты прадстаўнікоў Нацыянальнага сходу сёмага склікання вылучылася 703 чалавекі. Усяго ў выбарчыя камісіі да гэтага часу паступіла 824 камплекты дакументаў. Такая інфармацыя па стане на 9 кастрычніка размешчана на сайце ЦВК.

Прэтэндэнты на месца ў парламенце часцей за ўсё аддавалі перавагу аднаму з трох спосабаў вылучэння (шляхам збору подпісаў, ад працоўнага калектыву, ад палітычнай партыі) — такіх 82,9 %. Двума спосабамі скарысталіся 16,9 % вылучэнцаў. Адзін чалавек вылучыўся трыма спосабамі.

Палітычныя партыі вылучылі 424 патэнцыйныя кандыдаты ў дэпутаты, або 51,5 % ад іх агульнай колькасці. У лідарах Ліберальна-дэмакратычная партыя (15,2 %), Аб'яднаная грамадзянская партыя (8 %), Камуністычная партыя Беларусі (7,7 %). Шляхам збору подпісаў вылучылася 33 % кандыдатаў у дэпутаты, ад працоўных калектываў — 15,5 %.

Жанчын сярод прэтэндэнтаў на дэпутацкія партфелі 25 %, маладых людзей да 30 гадоў — 8,8 %. Пераабрацца паспрабуюць 34 дэпутаты Палаты прадстаўнікоў дзеючага склікання (4,8 %). Трапіць у парламент паспрабуюць і дэпутаты мясцовых Саветаў, іх 8,3 % ад агульнай колькасці вылучэнцаў.

Што датычыцца прафесійнай дзейнасці вылучэнцаў, то занятых у прамысловасці, будаўніцтве, сферы транспарту сярод іх 16,5 %, прадстаўнікоў навукі, адукацыі, аховы здароўя, культуры і спорту — 15,2 %, дзяржслужачых — 10,1 %.

Дарэчы, перадвыбарная агітацыя на парламенцкіх выбарах у Беларусі стартуе ў сярэдзіне кастрычніка пасля рэгістрацыі кандыдатаў у дэпутаты. На наступны дзень пасля яе заканчэння акруговыя выбаркамы правядуць паміж кандыдатамі жараб'ёўку для таго, каб вызначыць дату і час іх выступлення на дзяржаўных радыё і ТБ.

Выступленні кандыдатаў у дэпутаты па радыё і тэлебачанні пройдуць з 21 кастрычніка да 6 лістапада па рабочых днях. Радыёвыступленні будуць з 7.00 да 8.00, тэлевізійныя (яны будуць суправаджацца субцітрамі ці перакладам на мову жэстаў) — з 19.00 да 20.00. Эфірны час кандыдатаў, якія будуць балатавацца па Мінску, выдзеляць «Радыё-Мінск», канал Беларусь 3, па Мінскай вобласці — радыёстанцыя «Мінская хваля», СТБ. Тым, хто будзе вылучацца па іншых абласцях, час вызначаць адпаведныя абласныя тэлерадыёкампаніі.

Для тэледэбатаў эфірны час рэзервуецца з разліку не больш за пяць хвілін аднаму кандыдату. Парадак арганізацыі і правядзення дэбатаў, даты іх правядзення і вядучага вызначаюць тэлерадыёкампаніі.

Сваю перадвыбарчую праграму прэтэндэнты на месцы ў парламенце маюць права апублікаваць альбо ў адной з рэспубліканскіх газет («Звязда», «Рэспубліка»), альбо ў адпаведнай абласной газеце, альбо ў раённых, гарадскіх газетах, якія выдаюцца на тэрыторыі іх акругі. Тэкст кандыдаты павінны прадставіць у СМІ не пазней 27 кастрычніка.

Нагадаем, што выбары ў Палату прадстаўнікоў прызначаныя на 17 лістапада, у Савет Рэспублікі — на 7 лістапада.


Больш за палову прэтэндэнтаў на дэпутацкі мандат у Віцебскай вобласці вылучаны партыямі

У гэтым рэгіёне па 14 выбарчых акругах падалі дакументы на рэгістрацыю ў якасці кандыдатаў у дэпутаты Палаты прадстаўнікоў 97 чалавек, з якіх амаль 58 % вылучаны палітычнымі партыямі, паведамілі БелТА ў абласной выбарчай камісіі.

На цяперашнім этапе выбарчай кампаніі ў сярэднім на адзін дэпутацкі мандат ад Віцебскай вобласці прэтэндуе сем чалавек. Гэта вышэй, чым на ўсіх папярэдніх выбарах, прычым канкурэнтнасць павысілася за кошт росту колькасці прэтэндэнтаў, якія жадаюць балатавацца ў парламент па сельскіх акругах. Самая вострая барацьба намячаецца па Аршанскай-Дняпроўскай акрузе № 26, дзе кандыдатамі ў дэпутаты вылучаюцца дзесяць грамадзян.

Амаль 85 % прэтэндэнтаў палічылі за лепшае вылучацца адным з трох магчымых спосабаў. У прыватнасці, здалі подпісы ў падтрымку сваёй кандыдатуры 14 ініцыятыўных груп, палітычныя партыі дэлегуюць у парламент па акругах у Віцебскай вобласці 55 актывістаў. Акрамя таго, 15 прэтэндэнтаў скарысталіся падвойным спосабам вылучэння: ад грамадзян шляхам збору подпісаў і працоўнымі калектывамі (14 чалавек), ад грамадзян і палітычных партый (1).

На дэпутацкія мандаты ад Віцебскай вобласці прэтэндуюць прадстаўнікі васьмі партыйных арганізацый. Ліберальна-дэмакратычная партыя вылучыла 14 актывістаў, Камуністычная партыя Беларусі дэлегуе ў парламент 13 чалавек. Далей па актыўнасці ідуць Рэспубліканская партыя працы і справядлівасці (вылучыла сем сваіх членаў), Беларуская партыя левых «Справядлівы свет», Аб'яднаная грамадзянская партыя, Партыя БНФ (па 6), Беларуская сацыял-дэмакратычная партыя (Грамада) (3), Рэспубліканская партыя (1).

У цяперашняй кампаніі актыўна ўдзельнічаюць жанчыны — 19 чалавек, або кожны пяты прэтэндэнт, а таксама дэпутаты мясцовых Саветаў (13). Сярод удзельнікаў выбарчага марафону ўдзельная вага моладзі крыху больш за 4 %. На новы тэрмін маюць намер балатавацца тры дэпутаты Палаты прадстаўнікоў.

Акруговыя камісіі прыступілі да праверкі камплектаў дакументаў і рэгістрацыі кандыдатаў у дэпутаты, якая павінна завяршыцца да 17 кастрычніка ўключна.

Паводле БелТА

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.